តំណាងមូលនិធិ Dubai Cares បង្ហាញចំណាប់អារម្មណ៍ ក្នុងការលើកកម្ពស់កិច្ចសហប្រតិបត្តិការ ជាមួយក្រសួងអប់រំកម្ពុជា
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៩ ខែកញ្ញា ឆ្នាំ២០២៤ បានទទួលជួបសម្តែងការគួរសម និងពិភាក្សាការងារជាមួយ ប្រតិភូមូលនិធិ Dubai Cares ដឹកនាំដោយ លោកស្រី Abeer Farah, Rep of Dubai Cares ។
ក្នុងឱកាសជំនួបនេះ តំណាងមូលនិធិ Dubai Cares បានបង្ហាញចំណាប់អារម្មណ៍ក្នុងការលើកកម្ពស់កិច្ចសហប្រតិបត្តិការ ជាមួយក្រសួងអប់រំ យុវជន និងកីឡា តាមរយៈការបន្តជួយគាំទ្រដល់ផែនការយុទ្ធសាស្ត្រអាទិភាពរបស់ក្រសួង និងបានលើកឡើងពីគម្រោងនៅកម្ពុជាដែលកំពុងទទួលការគាំទ្រដោយមូលនិធិ Dubai Cares ដូចជា វគ្គបណ្តុះបណ្តាលយុវជនកម្ពុជាឱ្យមានជំនាញខ្ពស់ក្នុងវិស័យបដិសណ្ឋារកិច្ច, ការបណ្តុះបណ្តាលអ្នកជំនាញចុងភៅ កម្រិតមធ្យម និងខ្ពស់, ការពង្រឹងស្ថិរភាពហិរញ្ញវត្ថុ Academy of Culinary Arts Cambodia (ACAC) និងការគាំទ្រដល់ការចាប់ផ្តើម គម្រោងសាកល្បងនៅវិទ្យាល័យ ស្តីពីការបណ្តុះបណ្តាលផ្នែកបដិសណ្ឋារកិច្ច ក្រោមកិច្ចសហប្រតិបត្តិការជាមួយក្រសួងអប់រំកម្ពុជាក្នុងកំឡុងឆ្នាំ ២០២២ និង ២០២៣។
ជាមួយនេះដែរភាគី Dubai Cares ក៏លម្អិតពី កម្មវិធីបណ្តុះបណ្តាល ACAC ដែលបានផ្តល់ជូននិស្សិតដែលបានបញ្ចប់ការសិក្សាដោយជោគជ័យនូវសញ្ញាបត្រដែលមានវិញ្ញាបនបត្រដែលទទួលស្គាល់កម្រិតអន្តរជាតិ និង Swiss Hospitality Management School of Luzern និងជួយពួកគេឱ្យទទួលបានឱកាសការងារក្នុងវិស័យបដិសណ្ឋារកិច្ចសំខាន់ៗ ទាំងក្នុង និងក្រៅប្រទេស ពិសេសនៅប្រទេសអារ៉ាប់រួម UAE ។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះការគាំទ្រវិស័យអប់រំនៅកម្ពុជារបស់មូលនិធិ Dubai Cares និងបានចែករំលែកអំពីប្រវត្តិកម្ពុជាពាក់ព័ន្ធនឹងការអភិវឌ្ឍធនធានមនុស្ស ការវិឌ្ឍន៍នៃវិស័យអប់រំជាច្រើនជំនាន់ និងទិដ្ឋភាពទូទៅក្នុងវិស័យអប់រំកម្ពុជាបច្ចុប្បន្ន ដោយគូសបញ្ជាក់ពី អាទិភាពរបស់ក្រសួងអប់រំ យុវជន និងកីឡា ក្នុងរាជរដ្ឋាភិបាល អាណត្តិទី ៧ ដែលកំពុងផ្តោតការយកចិត្តទុកដាក់យ៉ាងខ្លាំងលើការពង្រឹងគុណភាពអប់រំគ្រប់កម្រិត ចាប់ពីកម្រិតមត្តេយ្យសិក្សាទៅ ការបណ្តុះបណ្តាលជំនាញបច្ចេកទេស (Mid Skilled Level) តាំងពីកម្រិតវិទ្យាល័យ ,ការលើកកម្ពស់ការផ្សារភ្ជាប់ការរៀនទ្រឹស្តីទៅនឹងការអនុវត្តជាក់ស្តែង ដោយផ្តល់ឱកាសដល់សិស្សនិស្សិតចុះកម្មសិក្សានៅតាមរោងចក្រក្រុមហ៊ុននានាក្នុងតំបន់សេដ្ឋកិច្ចពិសេសកម្ពុជា ក៏ដូចជាទៅក្រៅប្រទេសតាមរយៈការគាំទ្រដោយពីដៃគូអភិវឌ្ឍន៍ និងជំរុញលើកទឹកចិត្តឱ្យសាកលវិទ្យាល័យទាំងអស់បន្តធ្វើបច្ចុប្បន្នភាពកែលម្អកម្មវិធីសិក្សាឱ្យឆ្លើយតបនឹងទីផ្សារការងារបច្ចុប្បន្ន និងអនាគត។
ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបង្ហាញនូវក្តីរីករាយស្វាគមន៍ និងចូលរួមសហការគាំទ្រសម្របសម្រួលនូវរាល់គំនិតផ្តួចផ្តើមកិច្ចសហប្រតិបត្តិការនានាលើវិស័យអប់រំ ក្នុងគោលដៅជំរុញនូវការអភវិឌ្ឍន៍ និងបណ្តុះបណ្តាលធនធានមនុស្សនៅកម្ពុជាឱ្យកាន់តែរីកចម្រើន ដើម្បីឈានទៅសម្រេចចក្ខុវិស័យកម្ពុជា ២០៣០ និង២០៥០៕
