ឯកឧត្តម ចាន់ សុធា បើកកិច្ចប្រជុំផ្សព្វផ្សាយអនុក្រឹត្យស្ដីពីការកំណត់មុខតំណែងវិជ្ជាជីវៈ និងការពិពណ៌នាមុខតំណែងនានាក្នុងរចនាសម្ព័ន្ធរបស់រដ្ឋបាលក្រុង ស្រុក ខណ្ឌ

ភ្នំពេញ៖ នៅថ្ងៃព្រហស្បតិ៍ ២រោច ខែភទ្របទ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៩ ខែកញ្ញា ឆ្នាំ២០២៤ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញជាអធិបតីបើកកិច្ចប្រជុំផ្សព្វផ្សាយអនុក្រឹត្យស្ដីពីការកំណត់មុខតំណែងវិជ្ជាជីវៈ និងការពិពណ៌នាមុខតំណែងនានាក្នុងរចនាសម្ព័ន្ធរបស់រដ្ឋបាលក្រុង ស្រុក ខណ្ឌ ក៏មានការអញ្ជើញចូលរួមពី ឯកឧត្តម រដ្ឋលេខាធិការក្រសួងមុខងារសាធារណៈ តំណាងអគ្គនាយកដ្ឋានរដ្ឋបាល ក្រសួងមហាផ្ទៃ ព្រមទាំងថ្នាក់ដឹកនាំ និងមន្ដ្រីពាក់ព័ន្ធនៃរដ្ឋបាលក្រុងសៀមរាប និងស្រុកពួក សរុបប្រមាណ៥០រូប។

កិច្ចប្រជុំនេះមានគោលបំណង ដកស្រង់មេរៀន បទពិសោធន៍ និងកែលម្អឯកសារជំនួយស្មារតីស្ដីពីរបៀបនៃការប្រើប្រាស់បញ្ជីមុខតំណែងវិជ្ជាជីវៈ និងការពិពណ៌នាមុខតំណែងក្នុងរចនាសម្ព័ន្ធរបស់រដ្ឋបាលក្រុង ស្រុក។

ក្នុងឱកាសនោះផងដែរ ឯកឧត្តម ចាន់ សុធា បានមានប្រសាសន៍ក្នុងពិធីបើកថា កិច្ចប្រជុំផ្សព្វផ្សាយអនុក្រឹត្យជូនរដ្ឋបាលក្រុងសៀមរាប និងស្រុកពួក ជាជំហានដំបូងនេះ គឺជាការបង្កើនចំណេះដឹងដល់មន្ត្រីថ្នាក់ដឹកនាំនៃរដ្ឋបាលក្រុង ស្រុក ក្នុងការលើកកម្ពស់ប្រសិទ្ធភាពនៃការគ្រប់គ្រងបុគ្គលិកក្នុងដែនសមត្ថកិច្ចរបស់ខ្លួន និងដកស្រង់មេរៀន បទពិសោធន៍ ដើម្បីកែលម្អឯកសារពាក់ព័ន្ធនានា ក្នុងគោលដៅ រៀបចំផ្សព្វផ្សាយជូនរដ្ឋបាល ក្រុង ស្រុក ខណ្ឌ ទូទាំងប្រទេស ៕