លោកជំទាវ ជា សុផាកន្នី អញ្ជើញសំណេះសំណាលជាមួយដូនជី តាជី បងប្អូនកម្មករ កម្មការិនី ចែកមុងជ្រលក់ថ្នាំ និងដាំកូនឈើ នៅមជ្ឈមណ្ឌលវប្បធម៌ ព្រះពុទ្ធសាសនាកម្ពុជា ខេត្តកំពង់ស្ពឺ

ភ្នំពេញ៖ លោកជំទាវ ជា សុផាកន្នី ភរិយាឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានកិត្តិយសគណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន បានអញ្ជើញជាអធិបតីក្នុងពិធីជួបសំណេះសំណាលជាមួយដូនជី តាជី បងប្អូនកម្មករ កម្មការិនី ចែកមុងជ្រលក់ថ្នាំ និងដាំកូនឈើ នៅមជ្ឈមណ្ឌលវប្បធម៌ ព្រះពុទ្ធសាសនាកម្ពុជា ខេត្តកំពង់ស្ពឺ ដោយមានការចូលរួមពីលោកជំទាវឧកញ៉ា អគ្គមហាឧបាសិកា ញឹក ប៊ុនថា ប្រធានមជ្ឈមណ្ឌលវប្បធម៌ព្រះពុទ្ធសាសនាកម្ពុជា លោកជំទាវ ម៉ុម ថានី ប្រធានគណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន លោក កៅ សុណ្ណារិទ្ធ អភិបាលរង នៃគណៈអភិបាលខេត្តកំពង់ស្ពឺ ឯកឧត្តម ម៉ម ច័ន្ទសិរីវឌ្ឍន: សមាជិកក្រុមប្រឹក្សា ខេត្ត ថ្នាក់ដឹកនាំ សមាជិក មន្រ្តីរាជការ នៃសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន។

បន្ទាប់ពីបានស្តាប់នូវមតិស្វាគមន៍របស់លោក កៅ សុណ្ណារិទ្ធ អភិបាលរងខេត្ត និងរបាយការណ៍ស្វាគមន៍របស់លោកជំទាវឧកញ៉ា អគ្គមហាឧបាសិកា ញឹក ប៊ុនថា រួចមកលោកជំទាវ ជាសុផាកន្នី បានមានប្រសាសន៍ថា ថ្ងៃនេះខ្ញុំពិតជាមានសេចក្តីរីករាយ ដោយបានមកចូលរួមក្នុងពិធីសំណេះសំណាលជាមួយលោកយាយ លោកតា បងប្អូនកម្មករ-កម្មការិនី នៅមជ្ឈមណ្ឌលវប្បធម៌ព្រះពុទ្ធសាសនាកម្ពុជាឧទ្យានជាតិព្រះសុរាម្រិតកុសុមៈគីរីរម្យ មិនត្រឹមតែជារមណីយដ្ឋានទេសចរណ៍ធម្មជាតិដ៏គួរឱ្យ ទាក់ទាញប៉ុណ្ណោះទេ តែក៏ជាបូជនីយដ្ឋានវប្បធម៌ដ៏ធំមួយរបស់កម្ពុជា។ ដូច្នេះទាំងភ្ញៀវទេសចរជាតិ និងអន្តរជាតិក្រៅពីទស្សនាទេសភាពធម្មជាតិ ហើយនោះក៏អាចចូលទៅទស្សនាមជ្ឈមណ្ឌលវប្បធម៌ព្រះពុទ្ធសាសនានេះដែលមានទេសភាពម្លប់ឈើត្រឈឹងត្រឈៃ សាកសមជាទីសម្មាទានសីល និងទីកន្លែងសក្ការៈសម្រាប់ប្រជាជនគ្រប់ទិសទី។

លោកជំទាវបានបន្តថា ពុទ្ធចក្រ និងអណាចក្រត្រូវដើរទន្ទឹមគ្នា និងអាស្រ័យគ្នាទៅវិញទៅមក ពុទ្ធចក្រជួយផ្នែកស្មារតីខាងផ្នែកទស្សនវិជ្ជា ដោយសារមានពុទ្ធចក្រទើបអាណាចក្រអាចរុងរឿងបាន។ ពុទ្ធសាសនានៅកម្ពុជាយើង បានការរីកចម្រើនមកដល់សព្វថ្ងៃនេះ ដោយកត្តាធំៗចំនួន៤ ដែលធ្វើឱ្យយើងសម្រេចបានសមិទ្ធផលធំៗជាបន្តបន្ទាប់ នោះគឺ៖ ទី១.កត្តាសន្តិភាព, ទី២.កត្តាសេរីភាពសាសនា, ទី៣.កត្តាលទ្ធភាព ដែលកើតចេញអំពីការកើនឡើងនៃជីវភាពរស់នៅរបស់ប្រជាពលរដ្ឋ និងទី៤.កត្តាវប្បធម៌នៃការចែករំលែក។ ដូច្នេះ ការអប់រំខាងសាសនាបានធ្វើឱ្យមនុស្សចេះជួយគ្នា គោរពគ្នា យោគយល់គ្នា ហើយកត្តាធំៗទាំង៤នេះ បានជួយឱ្យយើងរួមគ្នាកសាងសមិទ្ធផលធំៗជាបន្តបន្ទាប់។

ជាមួយគ្នានេះ ដើម្បីគិតគូរពីសុខទុក្ខ និងសុខមាលភាព នៅក្នុងឱកាសនៃពិធីបុណ្យកាន់បិណ្ឌ និងវស្សាន្តរដូវ ដែលកំពុងមានភ្លៀងធ្លាក់ជោគជាំ លោកជំទាវ និងគណៈអធិបតី ក៏បាននាំយកមុងជ្រលក់ចំនួន ១០០មុង, វ៉ែនតាចំនួន១០០, អង្ករចំនួន ៤០បាវ ស្មើនឹង ៤០០គីឡូក្រាម និងគ្រឿងឧបភោគបរិភោគមួយចំនួនធំ ប្រគល់ដូនជី តាជី និងបងប្អូនកម្មករកម្មារនីដែលកំពុងសម្មាទានសីល និងបំរើការងារនៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា។

ក្នុងឱកាសនោះដែរ គណៈប្រតិភូទាំងអស់ក៏បានអញ្ជើញទៅទស្សនា កន្លែងវិបស្សនា នៅឧទ្យានជាតិព្រះសុរាម្រិតកុសុមៈគីរីរម្យ ដែលស្ថិតក្នុងបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដែលជាគំនិតផ្តួចផ្តើមកសាងរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងលោកជំទាវ និងបន្តអញ្ជើញដាំដើមឈើជានិមិត្តរូប ដើម្បីបណ្តុះ ពន្លកនៃភាពស្អាត ភាពបៃតង និងចីរភាពជាពិសេសរួមចំណែកបង្កើនប្រភេទពូជឈើប្រណីត និងប្រភេទឈើផ្សេងៗ បន្ថែមលើវត្តមានរបស់រុក្ខជាតិនៅក្នុងព្រៃស្រាប់ និងបង្ហាញសម្រស់កាន់តែស្រស់ស្អាតបន្ថែមទៀត ទៅដល់ភ្ញៀវទេសចរដែលបានមកទស្សនាផងដែរ ៕