សាខាកាកបាទក្រហមកម្ពុជាខេត្តស្ទឹងត្រែង បើកវគ្គបណ្តុះបណ្តាលគោលការណ៍គ្រឹះ និងវិជ្ជាសង្គ្រោះបឋម ជូនដល់យុវជនកាកបាទក្រហមកម្ពុជាថ្មី
ភ្នំពេញ៖ នៅថ្ងៃទី ២០-២១ ខែកញ្ញា ឆ្នាំ២០២៤ សាខាកាកបាទក្រហមកម្ពុជាខេត្តស្ទឹងត្រែង បានបើកវគ្គបណ្តុះបណ្តាលគោលការណ៍គ្រឹះ និងវិជ្ជាសង្គ្រោះបឋម ជូនដល់យុវជនកាកបាទក្រហមកម្ពុជាថ្មី សរុបចំនួន ២៥នាក់ដែលមកពីវិទ្យាល័យហ៊ុនសែនស្ទឹងត្រែង ចំនួន១៧នាក់ វិទ្យាល័យព្រះរាជបូជនីយកិច្ចចំនួន០៦នាក់ និងទីប្រឹក្សា ចំនួន ០២នាក់ ក្រោមវត្តមាន លោក សាយ ព្រលឹង នាយកប្រតិបត្តិសាខា និងបានបំពាក់កន្សែងជូនដល់យុវជនកាកបាទក្រហមទាំងថ្មី និងឆ្នាំចាស់ សរុបចំនួន៣៨នាក់ ស្រី២០នាក់ក្រោមអធិបតីភាព លោកស្រី សន សុខា ប្រធានស្តីទីគណៈកម្មាធិការសាខា។
វគ្គនេះប្រព្រឹត្តទៅ នៅស្នាក់ការសាខាកាកបាទក្រហមកម្ពុជា ខេត្តស្ទឹងត្រែង ដែលមានរយៈពេល២ថ្ងៃ ដោយផ្ដោតលើមេរៀនសំខាន់ៗមួយចំនួនរួមមាន ៖
១- ប្រវត្តិចលនាអន្ដរជាតិ កាកបាទក្រហម និងអឌ្ឍចន្ទក្រហម
២- គោលការណ៍គ្រឹះទាំង៧ប្រការ
៣- ការប្រើប្រាស់បដិរូប
៤- គោលនយោបាយ និងតួនាទីយុវជនកាកបាទក្រហម
៥-វិជ្ជាសង្គ្រោះបឋម
៦-បញ្ជ្រាប ពីការប្រែប្រួលអាកាសធាតុ សុវត្ថិភាពចរាចរណ៍ និងការងារសុខភាព ជាមួយគ្នានោះដែរ សូមអោយយុវជន និងអ្នកស្មគ្រ័ចិត្តភូមិ ចូលរួម និងផ្សព្វផ្សាយ ក្នុងការកាត់បន្ថយការប្រើប្រាស់ថង់ប្លាស្ទិក ក្រោមពាក្យស្លោក «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលជាការរួមចំណែកមួយដល់សំខាន់ក្នុងការជួយដល់ការងារបរិស្ថាន ។
ក្នុងឪកាសមានមតិសំណេះសំណាលបើកវគ្គ លោក សាយ ព្រឹលង នាយកសាខា បានមានប្រសាសន៍ និងពាំនាំប្រសាសន៍ផ្តាំផ្ញើ សួរសុខទុក្ខពីសំណាក់ ឯកឧត្តម សរ សុពុត្រា អភិបាលនៃគណៈអភិបាលខេត្ត ដោយក្តីស្រលាញ់ និងក្តីនឹករលឹក ជូនដល់អ្នកស្ម័គ្រចិត្ត និងប្អូនៗយុវជនកាកបាទក្រហមទាំងអស់ ដែលតែងតែលះបង់ពេលវេលាដ៏មានតម្លៃចូលរួមចំណែកបំរើសកម្មភាពការងារមនុស្សធម៌ ដោយស្ម័គ្រចិត្តមិនគិតពីការនឿយហត់។
លោកបានបន្តថា នៅក្នុងវគ្គយល់ដឹងជាមូលដ្ឋានដែលមានរយៈពេល២ថ្ងៃពេញនេះ ប្អូនៗនឹងបានដឹងអំពីប្រវត្តិគោលការណ៍គ្រឹះ ចលនាអន្តរជាតិកាកបាទក្រហម អឌ្ឍចន្ទក្រហម វិជ្ជាសង្គ្រោះបឋម និងបានស្គាល់ពីកាកបាទក្រហមកម្ពុជា កាន់តែច្បាស់ រចនាសម្ព័ន្ធកាកបាទក្រហម ពីថ្នាក់ជាតិរហូតដល់ថ្នាក់មូលដ្ឋាន ពិសេសប្អូនៗនឹងបានស្គាល់ពីតួនាទីភារកិច្ចរបស់ខ្លួនកាន់តែច្បាស់។ បន្ទាប់ពីឆ្លងកាត់វគ្គនេះហើយ សង្ឃឹមថាប្អូនៗយុវជន ទាំងអស់ ក្លាយជាយុវជន កក្រក ដែលពោរពេញទៅដោយសមត្ថភាពក្នុងការរួមចំណែកជាមួយសាខាក្នុងការផ្តល់សេវាកម្មមនុស្សធម៌ តាមសហគមន៍ និងសាលារៀនបានល្អ ស្របតាមបណ្តុំទស្សនៈទាន “យុវជនគឺជា ចលករ និងជាភ្នាក់ងារនៃការផ្លាស់ប្តូរជាវិជ្ជមាន កំពុងនាំគ្នាធ្វើសកម្មភាព ធ្វើឱ្យបានកាន់តែច្រើនជាងមុន ធ្វើឱ្យកាន់តែល្អជាងមុន ធ្វើឱ្យកាន់តែស៊ីជម្រៅ និង ទៅឱ្យបានកាន់តែឆ្ងាយជាមុន” ។
នាឱកាសបិទវគ្គ លោកស្រី សន សុខា បានមានប្រសាសន៍ផ្តាំផ្ញើដល់អ្នកចូលរួម និងក្មួយៗយុវជន កក្រក សូមយកខ្លឹមសារក្នុងមេរៀននីមួយៗ ទៅអនុវត្តន៍បន្ត និងបង្ហាត់បង្ហាញ់ដល់មិត្តរួមថ្នាក់ ពិសេសត្រូវចែករំលែកចំណេះដឹងដែលបានរៀនសូត្រនេះ ដល់ក្រុមគ្រួសារ៕
