អភិបាលខេត្តពោធិ៍សាត់ នាំយកអំណោយរបស់សម្តេចកិត្តិព្រឹទ្ធបណ្ឌិត ទៅប្រគល់ជូនក្រុមគ្រួសារក្មេងស្រីរងគ្រោះ ដែលត្រូវឃាតកររំលោភសម្លាប់

ភ្នំពេញ៖ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការ សាខាកាកបាទក្រហមខេត្ត នាំយកអំណោយដ៏ថ្លៃថ្លា របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅប្រគល់ជូនក្រុមគ្រួសារក្មេងស្រីរងគ្រោះ ដែលត្រូវឃាតកររំលោភសម្លាប់ យ៉ាងអាណោចអាធម នៅថ្ងៃទី២៤ ខែកញ្ញា ឆ្នាំ២០២៤ ដល់គេហដ្ឋាននៃសព ស្ថិតក្នុងភូមិខ្លាក្រពើរ ឃុំអន្លង់ត្នោត ស្រុកក្រគរ។

ក្នុងឱកាសនោះ ឯកឧត្តម ខូយ រីដា ក៏បាននាំនូវការផ្តាំផ្ញើរសាកសួរសុខទុក្ខ និងចូលរួមរំលែកទុក្ខដ៏ក្រៀមក្រំបំផុត ពីសំណាក់សម្តេចកិត្តិព្រឹទ្ធបណ្ឌិត ជូនចំពោះក្រុមគ្រួសារសព ដែលបានបាត់បង់កូនស្រីជាទីស្រឡាញ់ដែលត្រូវឃាតកររំលោភសម្លាប់ យ៉ាងអាណោចអាធម។ ជាមួយគ្នានោះ ឯកឧត្តមអភិបាលខេត្ត ប្តេជ្ញានឹងជម្រុញប្រតិបត្តិការរុករក និងវែកមុខឃាតករ ដើម្បីផ្តន្ទាទោសឱ្យខាងតែបាន។

អំណោយដ៏សប្បសធម៌របស់សម្តេចកិត្តិព្រឹទ្ធបណ្ឌិត ដែលត្រូវបានយកទៅប្រគល់ជូនគ្រួសារសពក្មេងស្រីរងគ្រោះ រួមមាន៖ ថវិកា ៤លានរៀល និងអង្ករ ១០០គីឡូក្រាម។ ក្រៅពីនោះមានថវិកា រដ្ឋបាលខេត្តពោធិ៍សាត់ ចូលរួមបុណ្យសព ២លានរៀល និងថវិកាមន្ទីរអប់រំ យុវជន និងកីឡាខេត្ត ១០ម៉ឺនរៀលទៀតផងដែរ។

សូមជម្រាបជូនថា សាកសពក្មេងស្រីសិស្សសាលា អាយុ១៦ឆ្នាំម្នាក់ ត្រូវបានប្រជាពលរដ្ឋ ប្រទះឃើញស្លាប់ នាវេលាម៉ោង០០និង០៥នាទី ថ្ងៃទី២៣ ខែកញ្ញា ឆ្នាំ២០២៤ នៅក្នុងចំការស្វាយចន្ទីមួយកន្លែង ស្ថិតក្នុងភូមិខ្លាក្រពើរ ឃុំអន្លង់ត្នោត ស្រុកក្រគរ ខេត្ដពោធិ៍សាត់ ត្រង់ចំណុចត្រពាំងសម្រែ សង្ស័យជាករណីរំលោភសម្លាប់។

ជនរងគ្រោះ ត្រូវបានគេស្គាល់ឈ្មោះ ភឿង ស្រីល័ក្ខណ៍ ភេទស្រី អាយុ១៦ឆ្នាំ សញ្ជាតិខ្មែរ មុខរបរសិស្សសាលា រៀនថ្នាក់ទី១០ បច្ចុប្បន្នរស់នៅភូមិខ្លាក្រពើរ ឃុំអន្លង់ត្នោត ស្រុកក្រគរ ខេត្តពោធិ៍សាត់។ ក្រោយពេលក្រុមគ្រូពេទ្យខេត្ត និងកម្លាំងនគរបាលជំនាញ ធ្វើកោសល្យវិច្ច័យសាកសព និងពិនិត្យកន្លែងកើតហេតុរួចរាល់ សមត្ថកិច្ចជំនាញ បានដាក់ការសណ្ឋានថា ករណីខាងលើអាចពាក់ព័ន្ធនឹងករណីឃាតកម្ម (សង្ស័យករណីរំលោភសម្លាប់)។ សាកសពក្មេងស្រីរងគ្រោះ ត្រូវបានក្រុមគ្រួសាររៀបចំធ្វើ បុណ្យ តាមប្រពៃណី និងបានបូជារួចរាល់ហើយ។ ដោយឡែកជនសង្ស័យ សមត្ថកិច្ចបាននឹងកំពុងធ្វើការស្រាវជ្រាវយ៉ាងមមាញឹក ដើម្បីកំណត់មុខសញ្ញា ចាត់ការតាមនីតិវិធី ៕