សម្ដេចធិបតី៖ ពេលទទួលជួបភ្ញៀវបរទេស មិនថាកម្រិតណាទេ ខ្ញុំតែងស្វាគមន៍មកកាន់វិមានសន្តិភាព និងប្រាប់ថាវិមាននេះកសាងដោយកូនខ្មែរទាំងស្រុង
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា គ្រប់ពេលដែលសម្ដេចទទួលជួបសម្ដែងការគួរសម និងពិភាក្សាការងារជាមួយភ្ញៀវ ថ្នាក់ដឹកនាំបរទេស មិនថាកម្រិតណាទេ សម្ដេចតែងតែស្វាគមន៍មកកាន់វិមានសន្តិភាព និងប្រាប់ថាវិមាននេះកសាងដោយ ស្នាដៃកូនខ្មែរទាំងស្រុង ។
ក្នុងឱកាសអញ្ជើញ ប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច សរុបចំនួន៣,៥៣០នាក់ នាថ្ងៃទី២៦ ខែកញ្ញា ឆ្នាំ២០២៤ សម្ដេចធិបតីបញ្ជាក់ថា «ពេលដែលខ្ញុំទទួលភ្ញៀវ ថ្នាក់ដឹកនាំបរទេស មិនថាកម្រិតណាទេ ជាច្រើនខ្ញុំតែងតែថា ស្វាគមន៍មកកាន់វិមានសន្តិភាព។ ហើយខ្ញុំតែងតែប្រាប់គាត់ពីលក្ខណៈពិសេសមួយ ដែលថានេះគឺជាវិមានរបស់រាជរដ្ឋាភិបាល ដែលមានកម្រិតធំ ឥឡូវមិនធំជាងគេទេ ប៉ុន្តែជាធំមួយដែលពេលកសាងនោះ កសាងដោយកូនខ្មែរទាំងស្រុង ដោយគ្មានពឹងវិស្វករមកពីប្រទេសណាទេម្ចាស់ការ»។
សម្ដេចធិបតី ហ៊ុន ម៉ាណែត បន្តថា នៅពេលបច្ចុប្បន្ននេះសមត្ថភាពកូនខ្មែរពិតជាអាចម្ចាស់ការដោយខ្លួនឯងបាន សូម្បីតែការកសាងស្ពាន ផ្លូវថ្នល់ អគារខ្ពស់ៗ វិស្វករក៏សុទ្ធតែជាកូនខ្មែរនោះដែរ។ មិនតែប៉ុណ្ណោះ សព្វថ្ងៃនេះកូនខ្មែរក៏អាចបង្កើតនូវកម្មវិធីកុំព្យូទ័របានដោយខ្លួនឯង ហើយក៏អាចផលិតកម្មវិធីផ្សេង និងធ្វើផែនការម្ចាស់ការ ទាំងនៅតាមស្ថាប័នថ្នាក់ជាតិ និងថ្នាក់ក្រោមជាតិ ព្រមទាំងដឹកនាំអនុវត្តជាប្រចាំ។
សម្ដេចធិបតី បន្ថែមថា អតីតកាលកម្ពុជាត្រូវការជំនាញការបរទេសជាច្រើន ដើម្បីមកជួយដឹកនាំ ឬមកផ្ដួចផ្ដើមគំនិតក្នុងការកសាងអ្វីមួយ ដែលការនោះមានទាំងជំនាញការរុស្ស៉ី វៀតណាមជាដើម។ សម្ដេចរំលឹកថា សូម្បីតែសាស្ដ្រាចារ្យបង្រៀននៅតាមសាកលវិទ្យាល័យមួយចំនួន ក៏ជាជនជាតិបរទេសដែរ ប៉ុន្ដែក្រោយមកបានត្រឡប់ទៅវិញ ដោយសារមើលឃើញពីសមត្ថភាពរបស់សាស្ដ្រាចារ្យដែលជាជនជាតិខ្មែរ ៕
