អាមេរិក រៀបចំកញ្ចប់ជំនួយសព្វាវុធ មានតម្លៃ ៨ពាន់លានដុល្លារ សម្រាប់អ៊ុយក្រែន ក្នុងអំឡុងដំណើរទស្សនកិច្ចរបស់លោក Zelenskiy

បរទេស៖ មន្ត្រីសហរដ្ឋអាមេរិក២រូប បានឲ្យដឹងថា សហរដ្ឋអាមេរិកគ្រោងនឹងប្រកាសជំនួយយោធាដែលមានតម្លៃជាង៨ពាន់លានដុល្លារ សម្រាប់ប្រទេសអ៊ុយក្រែន ក្នុងអំឡុងពេលដំណើរទស្សនកិច្ចរបស់ប្រធានាធិបតីអ៊ុយក្រែន លោក Volodymyr Zelenskiy ទៅកាន់ទីក្រុងវ៉ាស៊ីនតោន។

រដ្ឋបាលរបស់លោកប្រធានាធិបតី Joe Biden បានចូលរួមក្នុងកិច្ចពិភាក្សាជាបន្ទាន់ជាមួយសភាដើម្បីអនុញ្ញាតឱ្យខ្លួនប្រើប្រាស់ជំនួយយោធាចំនួន ៥,៦ពាន់លានដុល្លារ សម្រាប់អ៊ុយក្រែន មុនថ្ងៃទី៣០ ខែកញ្ញា ជាចុងបញ្ចប់នៃឆ្នាំសារពើពន្ធសហព័ន្ធ ដែលអាជ្ញាធរបានកំណត់។

កាលពីថ្ងៃព្រហស្បតិ៍ មន្ត្រីបានឲ្យដឹងថា សេតវិមានមានបំណងជូនដំណឹងដល់សភាថា ខ្លួនបន្តដំណើរការជាមួយនឹងការប្រកាសដកប្រាក់ចំនួន ៥,៦ពាន់លានដុល្លារពីស្តុកអាវុធរបស់សហរដ្ឋអាមេរិក។ មន្ត្រីបានបន្តថា ខ្លឹមសារនៃកញ្ចប់នោះមិនទាន់កំណត់ច្បាស់លាស់។