សមាគមមិត្តភាពពាណិជ្ជកម្មឈើស៊ីនៅកម្ពុជា ឈ្វេងយល់អំពីតំបន់សក្កានុពលរបស់ខេត្តកំពង់ស្ពឺ ដើម្បីស្វែងរកឱកាសបណ្ដាក់ទុនវិនិយោគបន្ថែម

ភ្នំពេញ៖ កាលពីថ្ងៃទី២៦ ខែកញ្ញា ឆ្នាំ២០២៤ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ អនុញ្ញាតឱ្យ លោកWANG WENHUI ប្រធានសមាគមមិត្តភាពពាណិជ្ជកម្មឈើស៊ីនៅកម្ពុជា និងប្រតិភូ ចូលជួបសម្តែងការគួសម និងពិភាក្សាការងារ ជូនពរក្នុងឱកាសបុណ្យកាន់បិណ្ឌ និងភ្ជុំបិណ្ឌប្រពៃណីជាតិ។

លោក WANG WENHUI ប្រធានសមាគម បានបញ្ជាក់ជូនអំពីទីតាំងស្ថានភាពភូមិសាស្ត្រ និងសក្តានុពលសំខាន់ៗ របស់សមាគម និងបានថ្លែងអំណរគុណចំពោះ ឯកឧត្តមបណ្ឌិត អភិបាលខេត្ត ដែលបានផ្តល់ឱកាសឱ្យប្រតិភូចុះបំពេញទស្សនៈកិច្ចសិក្សាឈ្វេងយល់អំពីតំបន់សក្កានុពលរបស់ខេត្តកំពង់ស្ពឺ និងពិភាក្សាការងារពាក់ព័ន្ធ និងដៃគូវិនិយោគនានា ឱ្យមកបណ្តាក់ទុនបន្ថែមទៀត នៅខេត្តកំពង់ស្ពឺ នាពេលខាងមុខ។

ឯកឧត្តមបណ្ឌិត អភិបាលខេត្ត បានបញ្ជាក់ជូនពីទីតាំងភូមិសាស្ត្រ និងសក្កានុពលនានាដែលរដ្ឋបាលខេត្តកំពង់ស្ពឺ សម្រេចបាន និងស្វាគមយ៉ាងកក់ក្តៅចំពោះ លោកប្រធានសមាគម និងប្រតិភូ ដែលបានផ្តល់កិត្តិយសទាក់ទាញអ្នកវិនិយោគមកបណ្ដាក់ទុនជាបន្តបន្ទាប់នៅប្រទេសកម្ពុជា ក៏ដូចជានៅខេត្តកំពង់ស្ពឺ។ ក្នុងនាមរដ្ឋបាលខេត្ត សូមគាំទ្រទាំងស្រុង និងសូមស្វាគមន៍យ៉ាងកក់ក្តៅ ទន្ទឹមនេះ រដ្ឋបាលខេត្ត តែងតែគិតគូយកចិត្តទុកដាក់ទាំងការរក្សាសន្តិសុខ សុវត្ថិភាព ការដោះស្រាយសំណើសំណូមពរ និងបញ្ហាផ្សេងៗដែលកើតមានឡើងចំពោះអ្នកវិនិយោគផងដែរ៕            \