ក្រសួងមុខងារសាធារណៈ ជួបជាមួយគ្រប់ក្រសួង ស្ថាប័នកម្រិតបច្ចេកទេស ដើម្បីពិភាក្សាលើការរៀបចំគោលការណ៍រួមនៃការជ្រើសរើស និងការគ្រប់គ្រងមន្រ្តីផ្អែកលើកិច្ចព្រមព្រៀងការងារ

ភ្នំពេញ៖ ក្រោយការសិក្សា​ ប្រជុំពិភាក្សាពិគ្រោះយោបល់ និងតាក់តែងឯកសារសេចក្តីព្រៀងជាច្រើនដំណាក់កាលយ៉ាងហ្មត់ចត់រួចមក សេចក្តីព្រាង ព្រះរាជក្រឹត្យ ស្តីពីគោលការណ៍រួមនៃការជ្រើសរើសនិងការគ្រប់គ្រងមន្រ្តីផ្អែកលើកិច្ចព្រមព្រៀងការងារ​ឈានដល់ការពិគ្រោះយោបល់កម្រិតបច្ចេកទេសជាមួយក្រសួងស្ថាប័ន​នានា។
​​
កិច្ចប្រជុំមួយត្រូវបានរៀបចំ នាព្រឹកថ្ងៃទី២៦ ខែកញ្ញា ឆ្នាំ២០២៤ ដឹកនាំដោយឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈនិងជាប្រធានអនុគណៈកម្មាធិការប្រតិបត្តិនៃ គ.វ.រ. នៅក្នុងសាលាភូមិន្ទរដ្ឋបាល ដោយមានការអញ្ជើញចូលរួមពី តំណាងគ្រប់ក្រសួង ស្ថាប័ន ព្រមទាំងថ្នាក់ដឹកនាំនិងមន្រ្តីបច្ចេកទេសក្រសួងមុខងារសាធារណៈ ជាច្រើនរូប។

កិច្ចប្រជុំនេះ រៀបចំឡើងក្នុងគោលបំណងពិភាក្សា និងផ្តល់មតិយោបល់ជាធាតុចូលថ្មីៗ រួមជាមួយការសម្រេចឯកភាពនានា ដើម្បីរៀបចំកែសម្រួលខ្លឹមសារតាមជំពូក មាត្រា សម្រាប់ការតាក់តែងព្រះរាជក្រឹត្យប្រកបដោយភាពត្រឹមត្រូវច្បាស់លាស់គ្រប់ជ្រុងជ្រោយបន្ថែមទៀត។

សូមជម្រាបថា​ ការជ្រើសរើសនិងគ្រប់គ្រងមន្រ្តីផ្អែកលើកិច្ចព្រមព្រៀងការងារ គឺជាផ្នែកមួយនៃកំណែទម្រង់រដ្ឋបាលសាធារណៈ ក្នុងការកែលម្អប្រព័ន្ធជ្រើសរើសមន្រ្តីរាជការ ដើម្បីជ្រើសរើសមន្រ្តីឱ្យចំគោលដៅដែលមានគុណវុឌ្ឍិ ចំណេះជំនាញ បច្ចេកទេស វិជ្ជាជីវៈច្បាស់លាស់ ដែលជាតម្រូវការរបស់ក្រសួង ស្ថាប័ននានា ឱ្យកាន់តែមានប្រសិទ្ធភាពខ្ពស់ ដើម្បីបម្រើការងារនៅក្នុងរាជរដ្ឋាភិបាល ៕