អគ្គនាយកដ្ឋានពន្ធនាគារ រៀបចំកិច្ចប្រជុំត្រួតពិនិត្យការងារនព្វមាស ឆ្នាំ២០២៤ និងផ្សព្វផ្សាយផែនការយុទ្ធសាស្ត្ររយៈពេល ៥ឆ្នាំ

ភ្នំពេញ៖ អគ្គនាយកដ្ឋានពន្ធនាគារ បានរៀបចំកិច្ចប្រជុំត្រួតពិនិត្យការងារនព្វមាស ឆ្នាំ២០២៤ និងផ្សព្វផ្សាយផែនការយុទ្ធសាស្ត្ររយៈពេល ៥ឆ្នាំ (២០២៤ ដល់ ២០២៨) ក្រោមអធីបតីភាព ឯកឧត្តម ឆែម សាវុធ រដ្ឋលេខាធិការក្រសួងមហាផ្ទៃ ទទួលការងារអគ្គនាយកដ្ឋានពន្ធនាគារ ដោយមានការអញ្ជើញចូលរួមពី ឯកឧត្តម អនុរដ្ឋលេខាធិការ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកពន្ធនាគារ ឯកឧត្តម លោកជំទាវ អគ្គនាយករង ប្រធាននាយកដ្ឋាន ប្រធានមណ្ឌលអប់រំកែប្រែ ពន្ធនាគាររាជធានី-ខេត្ត និងមន្រ្តីពាក់ព័ន្ធជាច្រើនរូបផងដែរ។

ឯកឧត្តម ឈន សាណាត អគ្គនាយក នៃអគ្គនាយកពន្ធនាគារ បានធ្វើសេចក្តីរាយការណ៍សង្ខេបអំពីសកម្មភាព និងកិច្ចការងាររបស់អគ្គនាយកដ្ឋានពន្ធនាគារដែលសម្រេចបានរយៈពេល៩ខែកន្លងមក។

នាឱកាសនោះឯកឧត្តមរដ្ឋលេខាធិការ ក៏បានផ្តល់អនុសាសន៍មួយចំនួន៖

ទី១៖ ធ្វើការយកចិត្តទុកដាក់រាល់កិច្ចការងារគ្រប់គ្រងដឹកនាំ និងត្រូវពង្រឹងសមត្ថភាពដល់មន្រ្តីលើបច្ចេកវិទ្យាឌីចីថល

ទី២៖ ការងារគ្រប់គ្រងជនជាប់ឃុំ សូមឲ្យជំរុញការងារអនុវត្តទាំងអស់ត្រូវស្របតាមបទបញ្ជាផ្ទៃក្នុងរបស់អគ្គនាយកដ្ឋានពន្ធនាគារឲ្យបានជាប្រចាំ និងឲ្យមានប្រសិទ្ធភាពខ្ពស់

ទី៣៖ ពង្រឹងការងារសន្តិសុខ សុវត្ថិភាព និងសណ្ដាប់ធ្នាប់ ឲ្យស្របទៅតាមបទដ្ឋាន គឺគ្រប់គ្រងមន្ត្រីសន្តិសុខឲ្យមានវិន័យ និងមានសីលធម៌

ទី៤៖ កិច្ចការងារអភិវឌ្ឍន៍វិជ្ជាជីវៈត្រូវផ្ដល់សេវាអប់រំ និងស្ដារនីតិសម្បទានហើយធ្វើដោយការយកចិត្តទុកដាក់ចំពោះកិច្ចការពាក់ព័ន្ធទៅនឹងចំណេះដឹងរបស់ជនជាប់ឃុំ

ទី៥៖ យកចិត្តទុកដាក់រាល់កិច្ចការងារបណ្ដុះបណ្ដាលវិជ្ជាជីវៈ និងសមាហរណកម្មហើយត្រូវពង្រឹងលើកិច្ចការងារគ្រប់គ្រងសមិទ្ធផលដែលទទួលបានមកពីការផលិតកម្មតាមបណ្ដាពន្ធនាគាររាជធានី-ខេត្ត ៕