កងទ័ពស៊ូដង់បើកការវាយលុកដ៏ធំនៅក្នុងរដ្ឋធានី Khartoum
បរទេស៖ កងកម្លាំងប្រដាប់អាវុធស៊ូដង់ (SAF) បានចាប់ផ្តើមការវាយលុកដ៏ធំមួយនៅក្នុងរដ្ឋធានី Khartoum របស់ប្រទេសនេះ ដើម្បីទទួលបានទឹកដីដែលធ្លាប់បានបាត់បង់ទៅឱ្យកងកម្លាំងប្រដាប់អាវុធរហ័ស (RSF) នៅពេលសង្គ្រាមស៊ីវិលផ្ទុះឡើងជាងមួយឆ្នាំមុន នេះបើយោងតាមរបាយការណ៍ប្រព័ន្ធផ្សព្វផ្សាយជាច្រើន។
ការវាយឆ្មក់តាមអាកាសលើទីតាំង RSF ត្រូវបានធ្វើឡើងនៅក្នុងរដ្ឋធានី និងតំបន់ជាប់គ្នាកាលពីថ្ងៃព្រហស្បតិ៍នៅពេលព្រឹកព្រលឹម នេះបើតាមការរាយការណ៍របស់ Al Jazeera ដោយដកស្រង់ប្រភពយោធា។ វាគឺជាការវាយប្រហារដ៏ធំបំផុតក្នុងរយៈពេលប៉ុន្មានខែ។
សាក្សីបានប្រាប់រ៉យទ័រអំពីការទម្លាក់គ្រាប់បែក និងការប៉ះទង្គិចគ្នាយ៉ាងធ្ងន់ធ្ងរ នៅពេលដែលទាហានរដ្ឋាភិបាលបានរុញច្រានឆ្ពោះទៅកាន់ស្ពានឆ្លងកាត់ទន្លេនីល និងភ្ជាប់ទីក្រុង Khartoum ទៅកាន់ទីក្រុងជិតខាង Omdurman និង Bahri។ ប្រភពកងទ័ពបានបញ្ជាក់ថា កងកម្លាំងរបស់ពួកគេបានឆ្លងកាត់ស្ពាននៅ Khartoum និង Bahri រួចហើយ ប៉ុន្តែ RSF បានអះអាងថា ខ្លួនបានបដិសេធការប៉ុនប៉ងនេះ។
Ahmed Abdalla អាយុ ៤៨ឆ្នាំជាអ្នកស្រុកបានប្រាប់រ៉យទ័រថា កងទ័ពកំពុងធ្វើការវាយប្រហារដោយកាំភ្លើងធំនិងការវាយប្រហារតាមអាកាសលើ Halfaya និង Shambat នៅ Bahri។
អ្នកស្រុកម្នាក់ទៀតនៅទីក្រុង Khartoum បានប្រាប់ Al Jazeera ថាយើងកំពុងអង្គុយជាមួយអ្នកជិតខាង ដោយរំពឹងថានឹងមានព្រឹត្តិការណ៍បន្ទាប់ ដោយបន្ថែមថា មានក្តីសង្ឃឹមថា កងទ័ពនឹងដណ្តើមយកទីក្រុងមកវិញ ដោយសារតែប្រជាជនមានការធុញទ្រាន់នឹងកងជីវពល។
អ្នកនាំពាក្យក្រសួងសុខាភិបាលរដ្ឋ Khartoum លោក Mohamed Ibrahim តាមសេចក្តីរាយការណ៍ បានឲ្យដឹងថា យ៉ាងហោចណាស់មនុស្ស ៤នាក់បានស្លាប់ និង ១៤នាក់ផ្សេងទៀតបានរងរបួសនៅក្នុងការបាញ់ផ្លោងដោយ RSF លើសង្កាត់លំនៅដ្ឋានក្នុងខេត្ត Karari ភាគខាងជើងនៃ Omdurman នៅព្រឹកថ្ងៃព្រហស្បតិ៍។
ប្រទេសស៊ូដង់បានធ្លាក់ចូលទៅក្នុងភាពវឹកវរកាលពីពាក់កណ្តាលខែមេសាឆ្នាំមុន នៅពេលដែលការប្រយុទ្ធគ្នាបានផ្ទុះឡើងនៅក្នុងរដ្ឋធានីរវាងយោធា និង RSF បន្ទាប់ពីភាពតានតឹងជាច្រើនខែលើការគ្រប់គ្រងប្រទេស។ ចាប់តាំងពីពេលនោះមក ជនស៊ីវិលរាប់ម៉ឺននាក់ត្រូវបានសម្លាប់ និងរងរបួស ជិតប្រាំបីលាននាក់បានផ្លាស់ទីលំនៅ និងពីរលាននាក់ទៀតត្រូវបានបង្ខំឱ្យភៀសខ្លួនទៅកាន់ប្រទេសជិតខាង នេះបើយោងតាមរបាយការណ៍ថ្មីៗនេះរបស់បេសកកម្មស្វែងរកការពិតរបស់អង្គការសហប្រជាជាតិ។ ប្រទេសដែលហែកហួរដោយសង្រ្គាម ប្រឈមមុខនឹងអ្វីដែលអង្គការសហប្រជាជាតិដាក់ឈ្មោះថាជាវិបត្តិមនុស្សធម៌ដ៏អាក្រក់បំផុតមួយរបស់ពិភពលោក។
ប្រតិបត្តិការយោធាទ្រង់ទ្រាយធំកាលពីថ្ងៃព្រហស្បតិ៍បានកើតឡើង បើទោះបីជាកិច្ចខិតខំប្រឹងប្រែងដឹកនាំដោយសហរដ្ឋអាមេរិក និងអារ៉ាប៊ីសាអូឌីត ដើម្បីធ្វើអន្តរការីបទឈប់បាញ់មួយ ដែលត្រូវបានពិភាក្សាផងដែរនៅខាងក្រៅសម័យប្រជុំមហាសន្និបាតអង្គការសហប្រជាជាតិលើកទី៧៩ នៅទីក្រុងញូវយ៉ក។
រដ្ឋមន្ត្រីការបរទេសរុស្ស៊ី លោក Sergei Lavrov ដែលកំពុងចូលរួមក្នុងកិច្ចប្រជុំអង្គការសហប្រជាជាតិ បានជួបពិភាក្សាទ្វេភាគីជាមួយមេដឹកនាំផ្តាច់ការរបស់ប្រទេសស៊ូដង់ និងមេបញ្ជាការ SAF លោកឧត្តមសេនីយ៍ Abdel Fattah al-Burhan លើមធ្យោបាយដើម្បីបញ្ចប់សង្គ្រាមរយៈពេល ១៧ខែ។
ក្នុងអំឡុងពេលនៃកិច្ចប្រជុំនោះ លោក Lavrov បានសង្កត់ធ្ងន់លើតម្រូវការសម្រាប់ការបញ្ឈប់អរិភាពមុនកាលកំណត់ និងការចាប់ផ្តើមនៃកិច្ចសន្ទនាថ្នាក់ជាតិដ៏ទូលំទូលាយ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសរុស្ស៊ី។
ទន្ទឹមនឹងនេះ នៅក្នុងសុន្ទរកថាទៅកាន់សភាកាលពីថ្ងៃព្រហស្បតិ៍ លោក al-Burhan បានឲ្យដឹងថា ខណៈដែលលោកគាំទ្រកិច្ចខិតខំប្រឹងប្រែងសន្តិភាព បទឈប់បាញ់អាចសម្រេចបានលុះត្រាតែ RSF ដកខ្លួនចេញពីតំបន់ដែលខ្លួនកាន់កាប់។
លោកបានចោទប្រកាន់ប្រទេសដែលមិនបញ្ចេញឈ្មោះថាបានផ្គត់ផ្គង់ RSF ជាមួយទាហានស៊ីឈ្នួល មូលនិធិ និងអាវុធ ដោយព្រមានថា កងទ័ពកំពុងបន្តកម្ចាត់ និងបណ្តេញអ្នកឈ្លានពានទាំងនេះ ទោះបីជាពួកគេស្វែងរកជំនួយ និងការគាំទ្រច្រើនប៉ុណ្ណាក៏ដោយ ។