បុណ្យភ្ជុំបិណ្ឌ! ពលរដ្ឋប្រមាណ៩ពាន់នាក់ធ្វើដំណើរទៅមកភ្នំពេញ-បាត់ដំបង តាមរថយន្តក្រុងដោយមិនបង់ប្រាក់

ភ្នំពេញ៖ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានថ្លែងឱ្យដឹងថា ក្នុងឱកាសពិធីបុណ្យភ្ជុំបិណ្ឌនេះ មានប្រជាពលរដ្ឋប្រមាណ៩ពាន់នាក់បានធ្វើដំណើរតាមរថយន្តក្រុងដោយជិះមិនបង់ប្រាក់ទៅមកភ្នំពេញ-បាត់ដំបងនិងពីបាត់ដំបង-ភ្នំពេញ។

លោក ព្រួញ រិទ្ធថា បានណែនាំដល់តៃកុងរថយន្តទាំងអស់ត្រូវបើកករគោរពច្បាប់ចរាចរណ៍ ហើយត្រូវយកចិត្តទុកដាក់គិតគូរជាប់ជានិច្ចចំពោះសុខសុវត្ថិភាពអ្នកដំណើរគ្រប់គ្នា។

នៅវេលាទៀបភ្លឺថ្ងៃទី៤ ខែតុលា ឆ្នាំ២០២៤ ឯកឧត្តម សុខ លូ អភិបាលខេត្តបាត់ដំបង បានអញ្ជើញជួបសំណេះសំណាលសួរសុខទុក្ខ និងជូនដំណើរប្រជាពលរដ្ឋជិះរថយន្តក្រុងដោយមិនបង់ប្រាក់ចេញពីទីតាំងចំណតផ្សារទំនើបភួពុយត្រឡប់ទៅរាជធានីភ្នំពេញវិញដើម្បីបន្តប្រកបកិច្ចការងារបន្ទាប់ពីធ្វើដំណើរមកលេងស្រុកកំណើតក្នុងឱកាសពិធីបុណ្យភ្ជុំបិណ្ឌ។

ប្រជាពលរដ្ឋបានបង្ហាញអារម្មណ៍សប្បាយរីករាយក្រៃលែង និងថ្លែងអំណរគុណយ៉ាងជ្រាលជ្រៅជូនចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបានផ្ដល់រថយន្តក្រុងឱ្យពួកគាត់ជិះទៅមកដោយមិនបង់ប្រាក់ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ។

ប្រជាពលរដ្ឋ បានលើកឡើងថា ការធ្វើដំណើរតាមរថយន្តក្រុងដែលរាជរដ្ឋាភិបាលផ្ដល់ជូន ពិតជាមានផាសុខភាព សុខសុវត្ថិភាពនិងទទួលបានយកចិត្តទុកដាក់ខ្ពស់ពីតៃកុងរថយន្តហើយការជិះរថយន្តក្រុងដោយមិនបង់ប្រាក់បានធ្វើឱ្យពួកគាត់កាត់បន្ថយការចំណាយលើសោហ៊ុយធ្វើដំណើរ និងសល់ថវិកាសម្រាប់ធ្វើបុណ្យទាននាឱកាសបុណ្យភ្ជុំបិណ្ឌនេះ។

សូមរំលឹកថា ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានផ្ដល់រថយន្តក្រុងជាង៦០០គ្រឿងសម្រាប់បម្រើសេវាដឹកជញ្ជូនសាធារណៈ ដែលមានរយៈពេល៦ថ្ងៃ ចាប់ពីថ្ងៃទី២៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៤ ដោយជិះមិនបង់ប្រាក់ដើម្បីជួយសម្រួលដល់ការចំណាយជូនបងប្អូនកម្មករ និយោជិត និងប្រជាពលរដ្ឋក្នុងការធ្វើដំណើរទៅលេងស្រុកកំណើតជួបជុំបងប្អូនក្រុមគ្រួសារ។សម្រាប់ខេត្តបាត់ដំបងមានរថយន្តចំនួន៨០គ្រឿងសម្រាប់ដឹកជញ្ជូនបងប្អូនកម្មករ និយោជិត និងប្រជាពលរដ្ឋទៅមកភ្នំពេញ-បាត់ដំបង និងពីបាត់ដំបង-ភ្នំពេញ៕