ភ្ជុំបិណ្ឌ៣ថ្ងៃ! ខេត្តបាត់ដំបងទាក់ទាញភ្ញៀវទេសចរបានជាង២១ម៉ឺននាក់ មកទស្សនាកម្សាន្តនៅតាមគោលដៅរមណីយដ្ឋាននានា

ភ្នំពេញ៖ អនុប្រធានមន្ទីរ និងជាអ្នកនាំពាក្យមន្ទីរទេសចរណ៍ខេត្តបាត់ដំបង លោក ហម អរុណ ថ្លែងឱ្យដឹងថា រយៈពេល៣ថ្ងៃ ចាប់ពីថ្ងៃទី១ ដល់ថ្ងៃទី៣ ខែតុលា ឆ្នាំ២០២៤ ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ មានភ្ញៀវទេសចរជាតិ អន្តរជាតិ និងប្រជាពលរដ្ឋប្រមាណជាង២១ម៉ឺននាក់បានមកទស្សនាកម្សាន្តនៅតាមគោលដៅរមណីយដ្ឋាននានាក្នុងខេត្តបាត់ដំបង។

លោកបន្ថែមថា ភ្ញៀវទេសចរ និងប្រជាពលរដ្ឋដែលបានអញ្ជើញមកទស្សនាកម្សាន្តតាមរមណីយដ្ឋាន គោលដៅទេសចរណ៍នានាក្នុងខេត្តបាត់ដំបង ក្នុងឱកាសបុណ្យភ្ជុំបិណ្ឌរយៈពេល៣ថ្ងៃ សរុបមានចំនួន២១៦,១៧៩ នាក់ កើនឡើង ១.៥៩% បើប្រៀបធៀបរយៈពេលដូចគ្នាឆ្នាំ២០២៣ មានចំនួន ២១២,៧៨៦ នាក់ ក្នុងនោះភ្ញៀវជាតិ ចំនួន ២១៥,៥៥៩ នាក់ កើនឡើង ១.៥២% ប្រៀបធៀបរយៈពេលដូចគ្នាឆ្នាំ២០២៣ មានចំនួន ២១២,៣២៩ នាក់។ភ្ញៀវអន្តរជាតិ ចំនួន ៦២០ នាក់ កើនឡើង ៣៥.៦៧% ប្រៀបធៀបរយៈពេលដូចគ្នាឆ្នាំ២០២៣ មានចំនួន ៤៥៧ នាក់។

លោក ហម អរុណ ឱ្យដឹងទៀតថា ពិធីបុណ្យភ្ជុំបិណ្ឌឆ្នាំ២០២៤នេះ ស្ថានភាពគោលដៅទេសចរណ៍មានការរៀបចំសណ្ដាប់ធ្នាប់បានល្អ ហើយតាមរមណីយដ្ឋាននានាទៀតសោត មានការគិតគូរលើសេវាកម្ម ការរក្សាតម្លៃម្ហូបអាហារ និងបដិសណ្ឋារកិច្ចជូនភ្ញៀវបានល្អ គ្មានបាតុភាពអ្វីកើតឡើង ដែលបង្កឱ្យមានភាពថ្នាំងថ្នាក់សម្រាប់ភ្ញៀវទេសចរនោះទេ ដែលទាំងនេះគឺបានចូលរួមសហការល្អពីម្ចាស់សេវាកម្ម ក្នុងវិស័យទេសចរណ៍ទាំងអស់ បន្ទាប់ពីក្រុមការងារជំនាញទេសចរណ៍របស់មន្ទីរទេសចរណ៍ខេត្តបាត់ដំបង ចុះផ្សព្វផ្សាយជាបន្តបន្ទាប់នៅតាមរមណីយដ្ឋានទេសចរណ៍ និងគោលដៅទេសចរណ៍ ដែលមាននៅក្នុងខេត្តបាត់ដំបង មិនឱ្យមានការតម្លើងថ្លៃលើមុខម្ហូប និងសេវាស្នាក់នៅតាមសណ្ឋាគារ ផ្ទះសំណាក់ឡើយ ដើម្បីផ្តល់នូវទំនុកចិត្ត និងជំនឿចិត្តដល់ភ្ញៀវទេសចរជាតិ និងអន្តរជាតិ ព្រមទាំងប្រជាពលរដ្ឋ ដែលបានមកលេងកម្សាន្ត និងចូលរួមធ្វើបុណ្យទានតាមទំនៀមទម្លាប់ ក្នុងវិស័យព្រះពុទ្ធសាសនា ប្រកបដោយភាពសប្បាយរីករាយគ្រប់ៗគ្នា។

សូមបញ្ជាក់ថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានទាំងរមណីយដ្ឋានបែបប្រវត្តិសាស្រ្ត វប្បធម៌ ប្រពៃណី សិល្បៈ និងម្ហូបអាហារ ដែលបានផ្ដល់បទពិសោធន៍ដ៏សំបូរបែបដល់អ្នកទេសចរដែលមកទស្សនាហើយចង់មកម្ដងទៀត ។ ខេត្តបាត់ដំបងមានរមណីយដ្ឋាននិងគោលដៅទេសចរណ៍សរុបចំនួន១១៥កន្លែងក្នុងនោះរួមមាន ៖ រមណីយដ្ឋានទេសចរណ៍ចំនួន២២កន្លែង សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិទេសចរណ៍ចំនួន៤កន្លែង៕