ឧបនាយករដ្ឋមន្ត្រី សាយ សំអាល់៖ ការកសាងលំនៅឋានទំនើប គឺឆ្លើយតបតម្រូវការជាក់ស្ដែងប្រជាជន
ភ្នំពេញ៖ ក្នុងពិធីសម្ពោធជាផ្លូវការប៊ូយ៉ុងថោន កាលពីព្រឹកថ្ងៃទី៨ ខែតុលា ឆ្នាំ២០២៤ ស្ថិតក្នុងភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានចាត់ទុក ប៊ូយ៉ុងថោន ជាការចូលរួមដ៏ត្រឹមត្រូវក្នុងការកសាងលំនៅឋាន ទំនើបឆ្លើយតបតាមតម្រូវ ការជាក់ស្ដែងរបស់ប្រជាជន កម្ពុជានិង ស្របតាមគោលដៅដែលរាជរដ្ឋាភិបាលកម្ពុជាចង់បាន។
ឯកឧត្តមឧបនាយករដ្ឋមន្ត្រី បានបន្តថា ឯកឧត្តមមានបំណងចង់បានស្ថាបត្យកម្មដូច ប៊ូយ៉ុងថោននេះដើម្បីផ្លាស់ប្ដូរផ្នត់គំនិតរបស់ប្រជាជនកម្ពុជា ដោយ ចង់ឃើញប្រជាជនកម្ពុជានាថ្ងៃអនាគតជាប្រជាជនដែលមានវប្បធម៌ អរិយធម៌ ទំនៀមទម្លាប់ប្រពៃណី វាងវៃ និងសមត្ថភាពខ្ពស់។
ឯកឧត្តមឧបនាយករដ្ឋមន្ត្រី បានកោតសរសើរក្រុមហ៊ុនប៊ូយ៉ុងដែលបានចូលរួមយ៉ាងសកម្មក្នុងការអភិវឌ្ឍវិស័យសំណង់ និងអចលន ទ្រព្យនៅកម្ពុជា និងថ្លែងអំណរគុណដល់ក្រុមហ៊ុនប៊ូយ៉ុងដែលបាន ចូលរួមឆ្លើយតបនឹងទស្សនៈវិស័យវែងឆ្ងាយ របស់សម្ដេចមហា បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តមឧបនាយករដ្ឋមន្រ្តី ក៏បានស្នើដល់ក្រុមហ៊ុនប៊ូយ៉ុងធ្វើ យ៉ាងណា ពិចារណាលើការកំណត់តម្លៃលំនៅឋានឱ្យបានសមរម្យស្របតាមលទ្ធភាព និងសមត្ថភាពជាក់ស្ដែងរបស់ប្រជាជន កម្ពុជា។
សូមជម្រាបថា ប៊ូយ៉ុងថោន មិនត្រឹមតែក្លាយ ជាតំបន់លំនៅឋានទំនើប ប៉ុណ្ណោះទេ តែបង្ហាញអំពីទំនាក់ទំនងដ៏ល្អជាយូរឆ្នាំរវាងកម្ពុជា និង សាធារណរដ្ឋកូរ៉េផងដែរ ៕
