លោកជំទាវរដ្ឋមន្ត្រី ចម និម្មល អនុញ្ញាតឲ្យនាយកជាន់ខ្ពស់នៃក្រុមហ៊ុនTikTok ចូលជួបសម្តែងការគួរសម និងពិភាក្សាការងារ
ភ្នំពេញ៖ នាថ្ងៃពុធ ទី៩ ខែតុលា ឆ្នាំ២០២៤ នៅរដ្ឋធានីវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអនុញ្ញាតជូន លោកស្រី DYAN Shinto E. Nugroho នាយកជាន់ខ្ពស់ទទួលបន្ទុកផ្នែកគោលនយោបាយសាធារណៈអាស៊ីអាគ្នេយ៍ ក្រុមហ៊ុនTikTok និងក្រុមការងារ ចូលជួបសម្តែងការគួរសម និងពិភាក្សាការងារ។
ក្នុងឱកាសនោះ ភាគីទាំងពីរបានផ្លាស់ប្តូរយោបល់លើតួនាទីដ៏សំខាន់នៃពាណិជ្ជកម្មឌីជីថលក្នុងការជំរុញធុរកិច្ចនៅកម្ពុជា។ លោកជំទាវរដ្ឋមន្រ្តី ក៏បានគូសបញ្ជាក់ជូនអាទិភាពមួយចំនួន ក្នុងការជំរុញការទាញប្រយោជន៍ពីការប្រើប្រាស់បច្ចេកវិទ្យាព័ត៌មានវិទ្យាក្នុងការជំរុញការធ្វើអាជីវកម្ម ដូចជា អក្ខរកម្មឌីជីថល ការជួយគាំ្រទ្រ និងការពង្រឹងសមត្ថភាពដល់អាជីវកម្មសេដ្ឋកិច្ចក្រៅប្រព័ន្ធ ធុរកិច្ចថ្មី និងសហគ្រាសធុន តូច មធ្យម ជាដើម។
លោកជំទាវរដ្ឋមន្រ្តី ក៏បានសង្កត់ធ្ងន់លើភាពចាំបាច់នៃការពង្រឹងសុវត្ថិភាពចំណីអាហារ និងការការពារអ្នកប្រើប្រាស់ ក្នុងការកសាងជំនឿទុកចិត្ត និងភាពជឿជាក់របស់អតិថិជន ផងដែរ។ លើសពីនេះ ភាគីទាំងពីរ ក៏បានពិភាក្សាលើកិច្ចសហប្រតិបត្តិការប្រព័ន្ធទូទាត់ឌីជីថលក្នុងតំបន់ និងពិព័រណ៍ពាណិជ្ជកម្ម ក្នុងការលើកកម្ពស់ការលក់ផលិតផលក្នុងស្រុក ក៏ដូចជាការសម្រួលនិងជំរុញបន្ថែម វិស័យទេចរណ៍ ជាដើម ៕
