នាយករដ្ឋមន្ដ្រី ហ៊ុន ម៉ាណែត អំពាវនាវឪពុកម្ដាយ និស្សិតខ្មែរ សិក្សានៅអ៊ីស្រាអ៊ែល កុំព្រួយបារម្ភ ព្រោះរាជរដ្ឋាភិបាលបានយកចិត្តទុកនិងតាមដានជាប់ជាប្រចាំ

ភ្នំពេញ៖ ក្នុងឱកាសអញ្ជើញជាអធិបតីក្នុងពិធីខួបអនុស្សាវរីយ៍លើកទី៣០ ថ្ងៃបង្កើតកងពលតូចលេខ៧០ (១៥ តុលា ១៩៩៤ – ១៥ តុលា ២០២៤) នៅព្រឹកថ្ងៃទី១៥ ខែតុលា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានអំពាវនាវឪពុកម្ដាយ និងអាណាព្យាបាល របស់និស្សិតខ្មែរ សិក្សានៅអ៊ីស្រាអ៊ែល កុំព្រួយបារម្ភពីសុវត្ថិភាពកូនៗ ព្រោះរាជរដ្ឋាភិបាលបានយកចិត្តទុកនិងតាមដានជាប់ជាប្រចាំ ចំពោះសុវត្ថិភាពរបស់ពួកគាត់។

សម្ដេចធិបតី ហ៊ុន ម៉ាណែត បានលើកឡើងពីនិស្សិតខ្មែរកំពុងរៀន នៅក្នុងប្រទេសដែលមានសង្គ្រាម ហើយបាននិយាយប្រាប់សម្ដេចថា ខ្លួនស្គាល់ច្បាស់ណាស់ អំពីតម្លៃសន្ដិភាព។

សម្ដេចធិបតី នាយករដ្ឋមន្ត្រី បានប្រាប់ទៅដល់ក្រុមនិស្សិតខ្មែរនៅសិក្សានៅតំបន់កំពុងប្រមុខដាក់គ្នាថា រាជរដ្ឋាភិបាលកម្ពុជា មិនមានផែនការក្នុងការដឹកនិស្សិតខ្មែរពីប្រទេសនៅអ៊ីស្រាអអ៊ែលនោះទេ ប៉ុន្ដែការយកចិត្តទុកដាក់របស់រាជរដ្ឋាភិបាលចំពោះនិស្សិត និងប្រជាពលរដ្ឋរស់នៅតំបន់ទាំងនោះ គឺរាជរដ្ឋាភិបាល មិនចោលនោះទេ តែងតែតាមដានជាប់ជានិច្ច។

សម្ដេចធិបតី ក៏បានផ្ដាំទៅដល់ឪពុកម្ដាយនិស្សិតដែលកំពុងបន្តការសិក្សានៅប្រទេសអ៊ីស្រាអែលទាំង ២២០នាក់ថា កុំមានការព្រួយបារម្ភ ខណៈបច្ចុប្បន្នពួកគេកំពុងឋិតនៅតំបន់សុវត្ថិភាព ហើយរាជរដ្ឋាភិបាល បានយកចិត្តទុកដាក់ជាប្រចាំចំពោះនិស្សិតខ្មែរនៅទីនោះជាប់ជាប្រចាំ។

សម្ដេចធិបតី នាយករដ្ឋមន្ដ្រី បានគូសបញ្ជាក់ថា រាជរដ្ឋាភិបាលបានសម្រេចផ្អាកការបញ្ជូននិស្សិតរបស់កម្ពុជា ទៅតំបន់ប្រយុទ្ធនៅក្នុងតំបន់កាហ្សាដែលកំពុងប្រឈមនឹងការប្រយុទ្ធគ្នារវាងអ៊ីស្រាអែល និងប៉ាឡេស្ទីន ៕