គណៈប្រតិភូគណៈកម្មការទី៨ នៃរដ្ឋសភា ជំរុញឱ្យមណ្ឌលសុខភាពអូរជុំ ក្នុងឃុំអូរជុំ យកចិត្តទុកដាក់លើបញ្ហាជំងឺមិនឆ្លង (NCDs)
ភ្នំពេញ៖ នាថ្ងៃទី១៦ ខែតុលា ឆ្នាំ២០២៤ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី (គណៈកម្មការទី៨) នៃរដ្ឋសភា ដឹកនាំដោយ ឯកឧត្តមបណ្ឌិត ឈុន ស៊ីរុន លេខាធិការ តំណាងឱ្យគណៈកម្មការ បានជំរុញមណ្ឌលសុខភាពអូរជុំយកចិត្តទុកដាក់ពិនិត្យលើបញ្ហាជំងឺមិនឆ្លង (NCDs) ស្ថិតនៅក្នុងឃុំអូរជុំ ស្រុកអូរជុំ ខេត្តរតនគិរី។
ក្នុងឱកាសនោះដែរ លោក សុំ តាវ ប្រធានមណ្ឌលសុខភាពអូរជុំបានឱ្យដឹងថា មណ្ឌលសុខភាពនេះមានបុគ្គលិកចំនួន១០នាក់ សម្រាប់បម្រើសេវាជូនប្រជាពលរដ្ឋចំនួន ១១,៦៥៣នាក់ គ្របដណ្តប់លើ៣ឃុំ(មាន១៦ភូមិ) និងមកពីភូមិឧបសម្ព័ន្ធចំនួន២៣ទៀត ដែលស្ថិតនៅឆ្ងាយពីគ្នាផងដែរ។ ប្រជាពលរដ្ឋដែលមកទទួលសេវានៅមណ្ឌលសុខភាពនេះ មានការកើនឡើង ដោយសារមានក្រុមសុខភាពភូមិជួយសម្រួល និងជួយដោះស្រាយជាបឋមឱ្យទាន់ពេលវេលាដល់ប្រជាពលរដ្ឋ ព្រមទាំងបានមកពិនិត្យ ពិគ្រោះជំងឺផ្នែកខាងក្រៅ ពិនិត្យផ្ទៃពោះ សម្រាលកូន ចាក់វ៉ាក់សាំងដល់កុមារ និងសេវាផ្សេងៗទៀត ព្រមទាំងមានទទួលសេវាព្យាបាលបឋមសម្រាប់ជំងឺមិនឆ្លងដូចជា ជំងឺទឹកនោមផ្អែម ជំងឺលើសសម្ពាធឈាម ជំងឺមហារីកមាត់ស្បូន និងជំងឺផ្លូវចិត្តជាដើម។ បញ្ហាជំងឺមិនឆ្លងនេះ កើតឡើងបណ្តាលមកពីប្រជាពលរដ្ឋទទួលទានរបបអាហារមិនប្រុងប្រយ័ត្ន ដែលនេះគឺជាឃាតករលាក់មុខ និងបានសម្លាប់ប្រជាពលរដ្ឋក្នុងមួយថ្ងៃចំនួន១៦៤នាក់ ក្នុងឆ្នាំ២០១៦ ហើយមកដល់បច្ចុប្បន្ននេះ នឹងអាចកើនឡើងជាបន្តបន្ទាប់ ប្រសិនបើបងប្អូនមិនបានប្រុងប្រយ័ត្ន។
មណ្ឌលសុខភាពអូរជុំ បានទទួលអ្នកជំងឺទឹកនោមផ្អែម ១៤៩នាក់ អ្នកជំងឺលើសសម្ពាធឈាម ១២៤នាក់ និងពិនិត្យស្រាវជ្រាវរកជំងឺមហារីកមាត់ស្បូន និងករណីអ្នកជំងឺផ្លូវចិត្តមួយចំនួនដែលបានមកទទួលសេវាពិនិត្យជំងឺមិនឆ្លង នៅមណ្ឌលសុខភាពនេះ។ ប្រជាពលរដ្ឋដែលបានមកទទួលសេវានៅមណ្ឌលសុខភាពនេះ ដោយបានប្រើប្រាស់ប័ណ្ណ (ប.ស.ស) មានចំនួនតិចតួចនៅឡើយ (៨៦ករណី) ភាគច្រើនជាមន្ត្រីរាជការ តែប័ណ្ណសមធម៌មានចំនួនច្រើន(១,០៧៩ករណី)។ រីឯការបង់ថ្លៃសេវាដោយថវិកាផ្ទាល់ខ្លួនមានចំនួនច្រើន (១៩៧៦ករណី) និងមានការលើកលែងបង់ថ្លៃសេវាត្រឹមតែ (២៩ករណី) ប៉ុណ្ណោះ។
ទទ្ទឹមនឹងនោះ មណ្ឌលសុខភាពបានជួបបញ្ហាប្រឈមមួយចំនួនដូចជា ត្រូវពង្រឹងសមត្ថភាពបុគ្គលិកពេទ្យបន្ថែមទៀត ខ្វះបរិក្ខារពេទ្យ និងខ្វះឱសថសំរាប់ព្យាបាលជំងឺ បញ្ហាកត្តាភូមិសាស្ត្រ និងផ្លូវគមនាគមន៍នៅតំបន់ដាច់ស្រយាល ព្រមទាំងការយល់ដឹងរបស់ប្រជាពលរដ្ឋតាមសហគមន៍នៅមានកម្រិត។
បន្ទាប់ពីបានស្តាប់របាយការណ៍របស់លោកប្រធានមណ្ឌលសុខភាពរួចមក ឯកឧត្តមបណ្ឌិត ឈុន ស៊ីរុន បានមានប្រសាសន៍ថ្លែងអំណរគុណ និងកោតសរសើរដល់បុគ្គលិកពេទ្យក្នុងមណ្ឌលសុខភាព ដែលខិតខំបម្រើសេវាសុខភាពជូនប្រជាពលរដ្ឋឱ្យទាន់ពេលវេលា តាមរយៈក្រុមសុខភាពភូមិ និងយកចិត្តទុកដាក់ជួយផ្សព្វផ្សាយបន្ថែមទៀតពីផលប៉ះពាល់នៃជំងឺមិនឆ្លង ពិសេស ការទទួលទានគ្រឿងស្រវឹង និងភេសជ្ជៈផ្អែម ជូនប្រជាពលរដ្ឋឱ្យបានយល់ដឹងកាន់តែច្បាស់ តាមរយៈគណៈទ្រទ្រង់សុខភាពភូមិ នៅមុនពេលបើកវេទិកាសាធារណៈភូមិ-ឃុំមានសុវត្ថិភាព ព្រមទាំងមានការលើកទឹកចិត្តដល់គណៈទ្រទ្រង់សុខភាពភូមិ និងក្រុមគ្រួសាររបស់គាត់ ឱ្យមកទទួលសេវាសុខភាពដោយមិនយកកម្រៃ និងត្រូវផ្សព្វផ្សាយដាក់ប៉ាណូអប់រំដោយប្រើពាក្យទទួលទានខ្លាញ់តិច អំបិលតិច និងស្ករតិច តាមមណ្ឌលសុខភាព មន្ទីរពេទ្យបង្អែក និងតាមទីប្រជុំជន ដើម្បីឱ្យយល់ដឹងពីជំងឺមិនឆ្លង និងផលប៉ះពាល់នៃជំងឺនេះ ៕