យុវជនកូរ៉េខាងជើងជាង ១.៤លាននាក់ដាក់ពាក្យចូលបម្រើកងទ័ពបន្ទាប់ពីឧប្បត្តិហេតុការលុកលុយរបស់យន្តហោះគ្មានមនុស្សបើករបស់កូរ៉េខាងត្បូង
សេអ៊ូល៖ ទីភ្នាក់ងារព័ត៌មានមជ្ឈិមកូរ៉េ (KCNA) បានរាយការណ៍នៅថ្ងៃពុធ ទី១៦ ខែតុលានេះថា យុវជនជាង ១.៤លាននាក់ នៅសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) បានដាក់ពាក្យចូលរួម ឬចូលបម្រើយោធាឡើងវិញ នៅដើមសប្តាហ៍នេះ។
KCNA បានឲ្យដឹងថា មន្ត្រី និងយុវជន និងសិស្សានុសិស្សជាង ១.៤លាននាក់នៅទូទាំងប្រទេសបានស្ម័គ្រចិត្តចូលរួម ឬចូលបម្រើកងទ័ពនៅថ្ងៃទី១៤ និង ១៥ ខែតុលា បន្ទាប់ពីមានការចោទប្រកាន់ថាយន្តហោះគ្មានមនុស្សបើករបស់កូរ៉េខាងត្បូងបានជ្រៀតចូលទីក្រុងព្យុងយ៉ាង រដ្ឋធានីនៃកូរ៉េខាងជើង។
កូរ៉េខាងជើងបានហៅឧប្បត្តិហេតុយន្តហោះគ្មានមនុស្សបើកថាជាការញុះញង់ដ៏ធ្ងន់ធ្ងរនៃការរំលោភលើអធិបតេយ្យភាពរបស់ខ្លួន។
ក្រសួងការបរទេសកូរ៉េខាងជើងបានចេញសេចក្តីថ្លែងការណ៍មួយកាលពីល្ងាចថ្ងៃសុក្រសប្តាហ៍មុន ដោយចោទប្រកាន់កូរ៉េខាងត្បូងថាបានបញ្ជូនយន្តហោះគ្មានមនុស្សបើកពីលើទីក្រុងព្យុងយ៉ាង។ យោធាកូរ៉េខាងត្បូងបានបដិសេធការចោទប្រកាន់នេះ។
ទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូងបានរាយការណ៍ថា នៅក្នុងសញ្ញាចុងក្រោយបំផុតនៃភាពតានតឹងកាន់តែខ្លាំងឡើងរវាងប្រទេសទាំងពីរ យោធាកូរ៉េខាងជើងបានបំផ្ទុះផ្នែកខ្លះនៃខ្សែ Gyeongui និង Donghae ភាគខាងជើងនៃបន្ទាត់ព្រំដែនយោធាកាលពីថ្ងៃអង្គារ។
កូរ៉េខាងជើងនៅមិនទាន់ឆ្លើយតបនឹងការអះអាងពីការផ្ទុះនៅតាមដងផ្លូវនោះទេ។