គណៈប្រតិភូគណៈកម្មការទី៨នៃរដ្ឋសភា ជួបប្រជុំពិភាក្សាការងារជាមួយថ្នាក់ដឹកនាំខេត្តក្រចេះ ដើម្បីចុះពិនិត្យការអនុវត្តច្បាប់ និងគោលនយោបាយនានារបស់រាជរដ្ឋាភិបាលពាក់ព័ន្ធនឹងវិស័យទាំង៤ ដែលគណៈកម្មការទទួលបន្ទុក

ភ្នំពេញ៖ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា (គណៈកម្មការទី៨) ដឹកនាំដោយ ឯកឧត្តមបណ្ឌិត ឈុន សុីរុន លេខាធិការគណៈកម្មការ តំណាងឱ្យ លោកជំទាវ ឡោក ខេង ប្រធានគណៈកម្មការ បានអញ្ជើញជួបប្រជុំ ពិភាក្សាការងារជាមួយឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ និងមានការចូលរួមពី ឯកឧត្ដម ពេជ្រ ប៊ុនធិន តំណាងរាស្ត្រមណ្ឌលខេត្តក្រចេះ ដើម្បីចុះពិនិត្យការអនុវត្តច្បាប់ និងគោលនយោបាយនានារបស់រាជរដ្ឋាភិបាល ពាក់ព័ន្ធនឹងវិស័យទាំង៤ ដែលគណៈកម្មការទទួលបន្ទុក នាព្រឹកថ្ងៃទី១៨ ខែតុលា ឆ្នាំ២០២៤ នៅសាលប្រជុំសាលាខេត្តក្រចេះ។

ឯកឧត្តមបណ្ឌិត ឈុន ស៊ីរុន បានលើកឡើងពីការតាមដានការអនុវត្តច្បាប់ និងលើកកម្ពស់ការអនុវត្តគោលនយោបាយរបស់រាជរដ្ឋាភិបាលអាណត្តិទី៧នៃរដ្ឋសភា ឱ្យស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលដែលផ្តោតសំខាន់ទៅលើកំណើនការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាក្នុងឆ្នាំ២០៣០ និងឆ្នាំ២០៥០។

ក្នុងឱកាសនោះដែរ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ បានមានប្រសាសន៍ថា អាជ្ញាធរខេត្តបានយកចិត្តទុកដាក់អភិវឌ្ឍន៍ខេត្តក្រចេះឱ្យមានការរីកចម្រើនលើគ្រប់វិស័យទាំងអស់ ក្នុងនោះមានវិស័យចំនួន៤ ដែលខេត្តធ្វើការពង្រឹង រួមមាន វិស័យសុខាភិបាល ខេត្តបានចាត់វិធានការណ៍ជាច្រើនសម្រាប់ផ្សព្វផ្សាយពីបញ្ហាជំងឺមិនឆ្លង (ជំងឺទឹកនោមផ្អែម ជំងឺលើសសម្ពាធឈាម ជំងឺមហារីក ជំងឺបេះដូង ជំងឺផ្លូវចិត្ត) តាមមណ្ឌលសុខភាព និងមន្ទីរពេទ្យបង្អែក ព្រមទាំងពង្រឹងសមត្ថភាពអ្នកគ្រូពេទ្យ លោកគ្រូពេទ្យឱ្យមានសមត្ថភាពខ្ពស់សម្រាប់ព្យាបាលជំងឺ។ វិស័យកិច្ចការនារីពង្រឹងការលើកកម្ពស់សមត្ថភាពស្រ្តីតាមរយៈការបង្កើតឱកាសឱ្យស្ត្រីក្រីក្រ ស្ត្រីមេម៉ាយគ្មានទីពឹង និងក្មេងស្រីបោះបង់ការសិក្សាចូលរៀនវគ្គបណ្តុះបណ្តាលវិជ្ជាជីវៈជាច្រើនផ្នែកបន្ថែមទៀត ដើម្បីឱ្យមានជំនាញ និងទទួលបានប្រាក់ខែអាចចិញ្ចឹមខ្លួនឯងបាន។

ឯកឧត្តមអភិបាលខេត្ត បានបន្តទៀតថា វិស័យសង្គមកិច្ច អតីតយុទ្ធជន យុវនីតិសម្បទា បានបើកប្រាក់គោលនយោបាយជូនជនពិការក្រីក្រ នៅតាមសហគមន៍ និងបានចែកស្បៀងជូនប្រជាពលរដ្ឋរងគ្រោះ និងជំរុញឱ្យដំណើរការជាបន្តបន្ទាប់នូវមជ្ឈ មណ្ឌលមនុស្សចាស់។ ចំពោះវិស័យការងារបណ្តុះ បណ្តាលវិជ្ជាជីវៈ ខេត្តបានផ្សព្វផ្សាយឱ្យយុវជនមកចុះឈ្មោះចូលរៀនជំនាញនៅសាលាពហុបច្ចេកទេស និងផ្សព្វផ្សាយពីសារៈប្រយោជន៍ដល់សហគមន៍ ព្រមទាំងផ្សព្វផ្សាយពីអត្ថប្រយោជន៍ការប្រើប្រាស់បណ្ណ ប.ស.ស ដល់កម្មករ កម្មការនី និងបុគ្គលស្វ័យនិយោជន៍តាមទីប្រជុំជន សហគមន៍។

ទន្ទឹមនឹងការរីកចម្រើនរបស់ខេត្ត ឯកឧត្តម វ៉ា ថន បានលើកយកបញ្ហាប្រឈមមួយចំនួនដែលខេត្តបានជួបប្រទះនាពេលកន្លងទៅតាមមន្ទីរនីមួយៗ ដោយកង្វះធនធានមនុស្ស កង្វះមន្ត្រីជំនាញ គ្រឿងបរិក្ខារពេទ្យ និងសម្ភារៈផ្សេងៗមួយចំនួនទៀត។

បន្ទាប់ពីបានស្តាប់នូវរបាយការណ៍ខេត្តរួចមក ឯកឧត្តមបណ្ឌិត ឈុន សុីរុន បានកោតសរសើរដល់ខេត្ត ដែលខិតខំបម្រើសេវាជូនប្រជាពលរដ្ឋស្របតាមយុទ្ធសាស្ត្រ បញ្ចកោណរបស់រាជរដ្ឋាភិបាល និងស្នើសុំឱ្យអាជ្ញាធរខេត្ត ត្រូវចេះលើកទឹកចិត្តដល់គណៈទ្រទ្រង់សុខភាពភូមិ ឱ្យខិតខំផ្សព្វផ្សាយពីហានិភ័យនៃជំងឺមិនឆ្លងជូនប្រជាពលរដ្ឋឱ្យបានយល់ដឹង និងចេះថែទាំសុខភាព ដោយធ្វើលំហាត់ប្រាណជាប្រចាំ និងទទួលទានម្ហូបអាហារដែលមានជាតិស្ករតិច អំបិលតិច ខ្លាញ់តិច និងបង្កើតវីដេអូអប់រំខ្លីៗទាក់ទងនឹងជំងឺមិនឆ្លង សម្រាប់ចាក់ផ្សាយតាមមណ្ឌលសុខភាព និងមន្ទីរពេទ្យបង្អែកខេត្ត ជូនដល់ប្រជាពលរដ្ឋមកទទួលសេវា ព្រមទាំងដកផ្ទាំងប៉ាណូផ្សព្វផ្សាយគ្រឿងស្រវឹង និងភេសជ្ជៈផ្អែមនៅតាមដងផ្លូវសាធារណៈនៅក្នុងខេត្ត។

ឯកឧត្តមបណ្ឌិត ក៏បានស្នើសុំឱ្យមន្ទីរកិច្ចការនារី និងមន្ទីរការងារចូលរួមសហការគ្នាចុះផ្សព្វផ្សាយទៅដល់ផ្ទះបងប្អូនប្រជាពលរដ្ឋនៅតាមភូមិ ឃុំ ឱ្យមកចូលរៀននៅសាលាបណ្ដុះបណ្ដាលពហុបច្ចេកទេសខេត្តឱ្យបានច្រើនថែមទៀត ដើម្បីអភិវឌ្ឍន៍ខ្លួនទៅជាកម្មករជំនាញ និងទទួលបានប្រាក់ខែខ្ពស់ និងពន្យល់ប្រជាពលរដ្ឋស្វ័យនិយោជន៍ឱ្យយល់ដឹងកាន់តែច្បាស់អំពីអត្ថប្រយោជន៍របស់ ប.ស.ស៕