ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល អញ្ជើញចូលរួមកិច្ចប្រជុំពិគ្រោះយោបល់ស្តីពី “ការត្រួតពិនិត្យឡើងវិញគោលនយោបាយពាណិជ្ជកម្មកម្ពុជាលើកទី៣”

ភ្នំពេញ៖ ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការក្រសួងសុខាភិបាល អមដោយមន្ត្រីជំនាញ នៃនាយកដ្ឋានឱសថ ចំណីអាហារ បរិក្ខាពេទ្យ និងគ្រឿងសម្អាង និងនាយកដ្ឋានសហប្រតិបត្តិការអន្តរជាតិ កាលពីថ្ងៃទី១៦ ដល់ថ្ងៃទី១៨ ខែតុលា ឆ្នាំ២០២៤ បានអញ្ជើញចូលរួមកិច្ចប្រជុំពិគ្រោះយោបល់ស្តីពី “ការត្រួតពិនិត្យឡើងវិញគោលនយោបាយពាណិជ្ជកម្មកម្ពុជាលើកទី៣” នៅទីស្តីការក្រសួងពាណិជ្ជកម្ម។

កិច្ចប្រជុំពិគ្រោះយោបល់ ត្រូវបានរៀបចំឡើងដោយក្រុមការងារត្រួតពិនិត្យឡើងវិញគោលនយោបាយ របស់អង្គការពាណិជ្ជកម្មពិភពលោក សហការជាមួយក្រសួងពាណិជ្ជកម្ម នៃព្រះរាជាណាចក្រកម្ពុជា ដែលមានការឣញ្ជើញចូលរួមពីតំណាងក្រសួងពាក់ព័ន្ធ។

កិច្ចប្រជុំនេះ ប្រព្រឹត្តទៅក្នុងគោលបំណងពិគ្រោះយោបល់ជាមួយតំណាងបណ្តាក្រសួងពាក់ព័ន្ធ នៃព្រះរាជាណាចក្រកម្ពុជា អំពីទិន្នន័យស្ថិតិ និងឯកសារចាំបាច់ ក្នុងការប្រមូលចងក្រងត្រៀមសរសេររបាយការណ៍ សម្រាប់កិច្ចប្រជុំ 3rd Trade Review Policy ដែលនឹងប្រព្រឹត្តទៅនាខែមីនា ឆ្នាំ២០២៥ នៅទីក្រុងហ្សឺណែវ ប្រទេសស្វីស។

ឯកឧត្តមរដ្ឋលេខាធិការ ក៏បានដឹកនាំមន្ត្រីជំនាញនៃនាយកដ្ឋានឱសថ ចំណីអាហារ បរិក្ខាពេទ្យ និងគ្រឿងសម្អាង ជួបប្រជុំពិភាក្សាជាមួយក្រុមជំនាញការរបស់ឣង្គការពាណិជ្ជកម្មពិភពលោក និងធ្វើបទបង្ហាញចែករំលែកឣំពីបទដ្ឋានគតិយុត្តិ ស្តីពីលក្ខខណ្ឌតម្រូវលើស្លាកសញ្ញាពាក់ព័ន្ធនឹងផលិតផលសុខាភិបាល” ក្នុងប្រទេសកម្ពុជា។

សូមជម្រាបជូនផងដែរថា គោលបំណងនៃ Trade Policy Review (TRP) គឺសំដៅជំរុញសមាជិកគោរពតាមវិធាន គោលការណ៍ និងការសន្យារបស់ខ្លួនក្រោមក្របខ័ណ្ឌ នៃកិច្ចព្រមព្រៀងពាណិជ្ជកម្មពហុភាគីនេះ និងវាយតម្លៃលើតម្រូវការនៃការអភិវឌ្ឍ សេដ្ឋកិច្ច គោលនយោបាយ និងពិនិត្យលើផលប៉ះពាល់នៃគោលនយោបាយពាណិជ្ជកម្ម និងការអនុវត្តទៅលើប្រព័ន្ធពាណិជ្ជកម្មពហុភាគី៕