រដ្ឋលេខាធិការក្រសួងការងារ ចូលរួមដង្ហែអង្គកឋិនទានសាមគ្គី ដើម្បីវេរប្រគេនព្រះសង្ឃដែលគង់ចាំវស្សាអស់កាលត្រីមាស ក្នុងពុទ្ធសីមា វត្តមណិរតនារាម (វត្តទួលទំពូង) ក្នុងខណ្ឌចំការមន
ភ្នំពេញ៖ នៅព្រឹកថ្ងៃអាទិត្យ ២រោច ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២០ ខែតុលា ឆ្នាំ២០២៤នេះ លោកជំទាវ ស៊ើង សរសុចិត្តា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខណ្ឌចំការមន បានចូលរួមដង្ហែអង្គកឋិនទានសាមគ្គី ដើម្បីវេរប្រគេនព្រះសង្ឃដែលគង់ចាំវស្សាអស់កាលត្រីមាស ក្នុងពុទ្ធសីមា វត្តមណិរតនារាម (វត្តទួលទំពូង) ក្នុងខណ្ឌចំការមន រាជធានីភ្នំពេញ។
បុណ្យកឋិនទានសាមគ្គី នៅវត្តទួលទំពូងនាពេលនេះ ត្រូវបានផ្តួចផ្តើមដោយ ឯកឧត្តមបណ្ឌិត អុិត សំហេង តំណាងរាស្ត្ររាជធានីភ្នំពេញ សមាជិករដ្ឋសភានីតិកាលទី៧ និងលោកជំទាវព្រមទាំងបុត្រ រួមនិងឯកឧត្តម ហេង សួរ និងលោកជំទាវព្រមទាំងបុត្រ និងថ្នាក់ដឹកនាំ មន្ត្រីរាជការនៃក្រសួងការងារ និងបណ្តុះបណ្តាលវិជ្ជាជីវៈ រួមទាំងការចូលរួមពី ឯកឧត្តម លោកជំទាវ អ្នកឧកញ៉ា លោក លោកស្រី ជាពុទ្ធបរិស័ទ ជាច្រើនទៀត។
សូមបញ្ជាក់ថា បុណ្យកឋិន ជាពិធីបុណ្យមួយចាប់ផ្ដើមធ្វើបន្ទាប់ពីបុណ្យចេញវស្សា។ បុណ្យកឋិន តែងត្រូវបានដង្ហែទៅកាន់ទីអារាមនីមួយៗ ចាប់ពីថ្ងៃ ១រោច ខែអស្សុជ ដល់ថ្ងៃទី១៥កើត ខែកត្តិក ៕ 
