ឯកឧត្តម សេង ញ៉ក់ ចូលរួមជំនួបជាមួយសភាប្រជាជនចិន
ភ្នំពេញ៖ ឯកឧត្តម សេង ញ៉ក់ សមាជិកគណៈកម្មការទី៨នៃរដ្ឋសភា បានចូលរួមកិច្ចជំនួបសន្ទនារវាងអាយប៉ា និងសភាសង្កេតការណ៍អាយប៉ា គឺសភាប្រជាជនចិន នៅក្នុងថ្ងៃទី២០ ខែតុលា ឆ្នាំ២០២៤ នៅក្នុងមហាសន្និបាតលើកទី៤៥ ដែលរដ្ឋសភាប្រទេសឡាវធ្វើជាម្ចាស់ផ្ទះ។
កិច្ចប្រជុំរវាងអាយប៉ា និងសភាសង្កេតការណ៍ បានប្រារព្ធធ្វើឡើងក្រោមមូលបទ៖ កិច្ចសហប្រតិបត្តិការសភាឆ្ពោះទៅរកសមាហរណកម្ម និងកំណើនប្រកបដោយបរិយាបន្ន។
ឯកឧត្តម សេង ញ៉ក់ បានស្នើឱ្យមានការពិភាក្សាអំពីក្របខ័ណ្ឌនីតិប្បញ្ញត្តិ ដែលជំរុញសមាហរណកម្មក្នុងតំបន់ ការសម្របសម្រួលពាណិជ្ជកម្ម និងការតភ្ជាប់ហេដ្ឋារចនាសម្ព័ន្ធ ស្របតាមគោលដៅទូលំទូលាយនៃគំនិតផ្តួចផ្តើមខ្សែក្រវាត់ និងផ្លូវ (BRI)។ BRI និងផែនការមេស្តីពីការតភ្ជាប់អាស៊ានឆ្នាំ២០២៥របស់ចិន អាចត្រូវបានសម្របសម្រួលក្នុងការកសាងហេដ្ឋារចនា សម្ព័ន្ធដែលតភ្ជាប់ប្រទេសអាស៊ានជាមួយប្រទេសចិន។
ឯកឧត្តមបានលើកឡើងបន្តថា កិច្ចសន្ទនានេះបានបង្ហាញពីទំនាក់ទំនងមិត្តភាពដ៏រឹងមាំ និងការវិវឌ្ឍរវាងអាយប៉ា និងចិន ដោយសង្កត់ធ្ងន់លើសារៈសំខាន់នៃកិច្ចសហប្រតិបត្តិការ និងផលប្រយោជន៍ទៅវិញទៅមក ៕