ខេត្តបន្ទាយមានជ័យ កំពុងប្រឈមនឹងជំនន់ទឹកភ្លៀងដែលធ្លាក់ពីខេត្តប៉ៃលិន តែមិនទាន់មានប៉ះពាល់ផ្ទះសម្បែងផ្លូវថ្នល់ និងស្រែរបស់ប្រជាពលរដ្ឋនៅឡើយទេ

ភ្នំពេញ៖ ទឹកប្រឡាយនិងព្រែកនៃឃុំសឿ និងឃុំចំណោមកំពុងហក់ឡើងខ្លាំង ខណៈដែលជំនន់ទឹកភ្លៀងពីធ្លាក់ខេត្តប៉ៃលិនមកឈមនឹងខេត្តបន្ទាយមានជ័យនៅថ្ងៃទី២១ ខែតុលា ឆ្នាំ២០២៤នេះ។

បើតាមលោក ជា ទី មេឃុំសឿបានបញ្ជាក់ឱ្យដឹងថា នៅប្រឡាយព្រែកឃុំសៀទឹកកំពុងហក់ឡើងខ្លាំង ដែលនេះបណ្ដាលមកពីទឹកភ្លៀងដែលធ្លាក់ពីខេត្តប៉ៃលិន។ តែយ៉ាងណាក្ដីវាមិនទាន់មានប៉ះពាល់ផ្ទះសម្បែងផ្លូវថ្នល់ និងស្រែរបស់ប្រជាពលរដ្ឋនៅឡើយទេ ពោលគឺទឹក ហក់ឡើងខ្លាំងតែមិនទាន់ដល់កម្រិតប្រកាសអាសន្ននៅឡើយ។

សូមបញ្ជាក់ថាលោក រ័ត្ន ដាស៊ីណង់ អភិបាលស្រុកមង្គលបូរីបានបញ្ជាក់ដែរថា ទឹកដែលហក់ឡើងខ្លាំងនៅព្រែកឃុំសឿ និងព្រែកឃុំចំណោមអាចធ្លាក់ឃុំតហាត់ទឹក តែពេលនេះក៏មិនទាន់មានប៉ះពាល់ដល់ផ្ទះសម្បែង ផ្លូវថ្នល់ និងដំណាំកសិកម្មប្រជាកសិករ នៅឡើយទេ ព្រោះស្រូវត្រូវបានប្រជាកសិករច្រូតកាត់អស់ហើយដែលរួមមាន ប្រភេទស្រូវស្រាលជាដើម។

លោក ឡាយ សុធី អនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យបានបញ្ជាក់ថា ទឹកដែលហក់ឡើងខ្លាំងនេះជាជំនន់ទឹកភ្លៀងដែលធ្លាក់ក្នុងរយៈពេល២-៣ថ្ងៃមកនេះ។ នៅផ្នែកខាងលើដែលស្រុងធ្លាក់មកប្រឈមខេត្តបន្ទាយមានជ័យ មានដូចជាឃុំសឿ ឃុំចំណោម និងឃុំរហាត់ទឹក ស្រុកមង្គលបូរី តែមិនប៉ះពាល់ដល់ប្រជាពលរដ្ឋនៅឡើយទេ គឺទឹកហក់ឡើងខ្លាំងតែនៅព្រែកសឿ ព្រែកចំណោមតែប៉ុណ្ណោះ ខណៈ នៅសំណង់ពោធិ៍២ដើម កម្រិតទឹកនៅ១ម៉ែត្រទៀតទើបប្រកាសអាសន្ន។

ចំពោះស្ថានភាពធាតុអាកាសនាថ្ងៃដដែលនេះវិញ បន្ទាប់ពីខេត្តបន្ទាយមានជ័យ  ទទួលឥទ្ធិពលពីកម្រិតសម្ពាធទាប ខេត្តនេះនឹងមានសីតុណ្ហភាពចាប់ពី ២៣អស្សាសេ-៣០អស្សាសេ ខ្យល់ប្រែប្រួលទិសមានល្បឿនពី ១-៤ម៉ែត្រ/វិនាទី។ នៅថ្ងៃនេះដល់ថ្ងៃទី២៤ តុលា ក៏អាចមានភ្លៀង ផ្គរ រន្ទះ ក្នុងកម្រិពីតតិចទៅច្រើន គ្របដណ្ដប់លើផ្ទៃដីប្រហែល ២០-២០ភាគរយ៕