មេបញ្ជាការកងជីវពលកំពូលប្តូរភាគីនៅក្នុងរដ្ឋអាហ្វ្រិកដែលហែកហួរដោយសង្រ្គាម
បរទេស៖ កងកម្លាំងប្រដាប់អាវុធស៊ូដង់ (SAF) បានប្រកាសថា មេបញ្ជាការជាន់ខ្ពស់នៃកងកម្លាំងគាំទ្ររហ័ស (RSF) ដែលជាគូប្រជែងបានចាកចេញពីបក្សពួក ហើយបានចូលរួមជាមួយកងទ័ព រួមជាមួយនឹងកងទ័ពរបស់គាត់មួយចំនួនទៀត។ ភាគីទាំងពីរបានជាប់ពាក់ព័ន្ធនឹងសង្គ្រាមដ៏ឃោរឃៅមួយនៅរដ្ឋអាហ្រ្វិកភាគឦសានអស់រយៈពេលជាង ១៨ខែ។
លោក Abu Aqla Muhammad Ahmed Kikil មេបញ្ជាការ RSF នៅរដ្ឋ El Gezira ភាគអាគ្នេយ៍ត្រូវបានគេរាយការណ៍ថាបានក្លាយជាឥស្សរជនជាន់ខ្ពស់ដំបូងគេដែលធ្វើការផ្លាស់ប្តូរចាប់តាំងពីការផ្ទុះឡើងនៃអរិភាពកាលពីឆ្នាំមុន។
នៅក្នុងសេចក្តីថ្លែងការណ៍មួយកាលពីថ្ងៃអាទិត្យ SAF បានសរសើរដល់ លោក Abu Aqla Muhammad Ahmed Kikil និងចំនួនដ៏ច្រើន នៃកងកម្លាំងរបស់គាត់ចំពោះការសម្រេចចិត្ត ដើម្បីចាកចេញពីក្រុមភេរវករ ដែលរបៀបវារៈគឺដើម្បីបំផ្លាញប្រទេស និងប្រយុទ្ធជាមួយកងទ័ពជាតិ។
កងទ័ពបានបញ្ជាក់ថា ខ្លួនស្វាគមន៍ចំពោះចំណាត់ការនេះ ដោយបន្ថែមថា ទ្វាររបស់ខ្លួននឹងនៅតែបើកចំហរសម្រាប់អ្នកណាម្នាក់ដែលនៅជាមួយប្រទេសជាតិ ហើយចុះចាញ់នឹងអង្គភាពយោធាដែលនៅជិតបំផុត។
កងទ័ពបានបន្ថែមថា យើងក៏បន្តការលើកលែងទោសរបស់ប្រធានក្រុមប្រឹក្សាអធិបតេយ្យភាព និងជាមេបញ្ជាការជាប្រធានកងកម្លាំងប្រដាប់អាវុធចំពោះពួកឧទ្ទាមណាដែលភាគីជាមួយប្រទេសជាតិ ហើយរាយការណ៍ទៅមូលដ្ឋានទ័ពដែលនៅជិតបំផុតនៅគ្រប់ផ្នែកទាំងអស់នៃស៊ូដង់។
RSF បានឆ្លើយតបដោយច្រានចោលការអះអាងរបស់កងទ័ពដែលថា លោក Abu Aqla Muhammad Ahmed Kikil បានចុះចាញ់ដោយសារតែរបៀបវារៈបំផ្លិចបំផ្លាញរបស់ខ្លួន។ ក្រុមទាហានប៉ារ៉ាមួយនេះបានឲ្យដឹងក្នុងសេចក្តីថ្លែងការណ៍មួយដែលបានដកស្រង់ដោយ Reuters ថាមន្ត្រីបានប្តូរភាគីបន្ទាប់ពីកិច្ចព្រមព្រៀងមួយ។
BBC ក៏បានដកស្រង់ប្រភពយោធាផងដែរថា អតីតមេដឹកនាំ RSF និងអ្នកប្រយុទ្ធរបស់គាត់បានចុះចាញ់បន្ទាប់ពីការចរចាជាច្រើនខែជាមួយកងទ័ព។
ការភៀសខ្លួននេះកើតឡើងនៅពេលដែលការប្រយុទ្ធគ្នារវាងបក្សពួកនៅតែបន្តនៅលើរណសិរ្សជាច្រើន ដោយ RSF ត្រូវបានគេរាយការណ៍ថាបានដណ្តើមកាន់កាប់ផ្នែកធំនៃទឹកដីរបស់ស៊ូដង់។
អង្គការសហប្រជាជាតិនិយាយថាជម្លោះដែលបានបន្តចាប់តាំងពីពាក់កណ្តាលខែមេសា ឆ្នាំ២០២៣ បានបណ្តាលឱ្យមានវិបត្តិមនុស្សធម៌ដ៏អាក្រក់បំផុតមួយរបស់ពិភពលោក។ យោងតាមរបាយការណ៍ថ្មីៗនេះរបស់បេសកកម្មស្វែងរកការពិតរបស់អង្គការសហប្រជាជាតិ មនុស្សរាប់ម៉ឺននាក់នៅក្នុងរដ្ឋអាហ្វ្រិកត្រូវបានសម្លាប់ ឬរងរបួស។ ប្រជាជនជិត ៨លាននាក់នៅក្នុងប្រទេសប្រមាណ ៤៧លាននាក់ត្រូវបានផ្លាស់ទីលំនៅខាងក្នុងដោយ ២លាននាក់ផ្សេងទៀតត្រូវបានបង្ខំឱ្យទៅប្រទេសជិតខាងជាជនភៀសខ្លួន។
កិច្ចចរចាសន្តិភាពជាច្រើន រួមទាំងការសម្រុះសម្រួលដោយអារ៉ាប៊ីសាអូឌីត និងសហរដ្ឋអាមេរិក បានបរាជ័យក្នុងការនាំយកបក្សពួកដែលកំពុងធ្វើសង្គ្រាមឱ្យយល់ព្រមលើបទឈប់បាញ់ពេញលេញមួយ។ អ្នកទាំងពីរបានប្តេជ្ញាថានឹងបន្តយកឈ្នះ។