ខ្យល់ព្យុះសង្ឃរាអូស្កា បោកបក់លើប្រទេសគុយបាកាលពីចុងសប្តាហ៍ បណ្តាលឱ្យមនុស្សស្លាប់ចំនួន៦នាក់
ហាវ៉ាណា៖ ការដាច់ចរន្តអគ្គិសនី បានប៉ះពាល់ដល់ប្រជាជន១០លាននាក់របស់ប្រទេស ដែលគ្រប់គ្រងដោយរបបកុម្មុយនីស្ដ បន្ទាប់ពីការខូចខាតនៃរោងចក្រថាមពលដ៏ធំបំផុតរបស់ប្រទេស បានធ្វើឱ្យប៉ះពាល់ដល់បណ្តាញទាំងមូល។
ក្រុមហ៊ុនអគ្គិសនីរបស់រដ្ឋធានីបានឱ្យដឹងថា គិតត្រឹមរសៀលថ្ងៃចន្ទទី២១ ខែតុលា ជិត៩០ភាគរយនៃអ្នកប្រើប្រាស់នៅក្នុងទីក្រុងហាវ៉ាណា ជាជម្រករបស់មនុស្ស២លាននាក់ បានទទួលថាមពលឡើងវិញ។
ទោះយ៉ាងណាក៏ដោយ អ្នកស្រុកជាច្រើននៅខាងក្រៅទីក្រុងហាវ៉ាណា នៅតែគ្មានអគ្គិសនីប្រើប្រាស់ដដែល។ ប្រទេសគុយបា នៅតែស្ថិតក្នុងភាពងងឹតកាលពីថ្ងៃអាទិត្យ នៅពេលដែលព្យុះសង្ឃរាអូស្កា បានបោកបក់នៅភាគខាងកើតនៃប្រទេស និងជាព្យុះប្រភេទទី១ បណ្តាលឱ្យមនុស្សស្លាប់ និងការខូចខាតជាច្រើន ជាពិសេសក្នុងខេត្តភាគខាងកើតប្រទេស។
ព្យុះសង្ឃរាអូស្កាបានចុះខ្សោយទៅជាព្យុះត្រូពិចបន្តិច ប៉ុន្តែនៅតែត្រូវបានគេរំពឹងថា នឹងនាំមកនូវទឹកជំនន់ភ្លាមៗ ដែលគំរាមកំហែងដល់អាយុជីវិត រួមជាមួយនឹងការរអិលបាក់ដី នេះបើតាមមជ្ឈមណ្ឌលព្យុះសង្ឃរាជាតិអាម៉េរិក។
ទូរទស្សន៍រដ្ឋបានរាយការណ៍ថា ដំបូលផ្ទះ និងជញ្ជាំងផ្ទះរាប់សិបខ្នងត្រូវបានខូចខាត ហើយបង្គោលអគ្គិសនី និងដើមឈើជាច្រើនដើមបានដួលរលំ។ បណ្តាញអគ្គិសនីមិនដំណើរការ ដោយសារតែការបិទរោងចក្រថាមពលដើរដោយធ្យូងថ្មដ៏ធំបំផុតទាំង៨របស់កោះ។ នេះបើយោងតាមប្រធានផ្នែកផ្គត់ផ្គង់អគ្គិសនីនៅក្រសួងថាមពល។
យោងតាមស្ថាប័នអគ្គិសនីជាតិ UNE ថាមពលត្រូវបានស្តារឡើងវិញក្នុងរយៈពេលខ្លីដល់ប្រជាជន៣សែននាក់ មុនពេលបណ្តាញអគ្គិសនីដាច់ម្ដងទៀត។ អាជ្ញាធរ បាន ផ្អាក ថ្នាក់ រៀន និង សកម្មភាព អាជីវកម្ម រហូត ដល់ ថ្ងៃ ពុធ និងដាក់បន្តដំណើរការ តែ មន្ទីរពេទ្យ និង សេវា សំខាន់ៗប៉ុណ្ណោះ ។
ប្រទេសគុយបា បង្កើតបានត្រឹមតែមួយភាគបីនៃអគ្គិសនី ដែលខ្លួនត្រូវការ ដូច្នេះដើម្បីមានអគ្គិសនីប្រើគ្រប់គ្រាន់ កោះនេះជួលរោងចក្រថាមពលអណ្តែតទឹកចំនួន៧ពីក្រុមហ៊ុនតួកគី ហើយថែមទាំងបានបន្ថែមម៉ាស៊ីនភ្លើងដើរដោយម៉ាស៊ូតតូចៗជាច្រើនផងដែរ។
គួរបញ្ជាក់ថា ព្យុះសង្ឃរាអូស្កា នឹងបន្ថែមបន្ទុកកាន់តែធ្ងន់ដល់សេដ្ឋកិច្ច ខណៈកោះនេះកំពុងស្ថិតក្នុងវិបត្តិសេដ្ឋកិច្ចដ៏ទូលំទូលាយរួចទៅហើយ ជាវិបត្តិសេដ្ឋកិច្ចដ៏អាក្រក់បំផុតចាប់តាំងពីការដួលរលំនៃសហភាពសូវៀត ដែលបានឧបត្ថម្ភធនយ៉ាងខ្លាំងដល់គុយបា៕