ព្យុះត្រូពិច Trami បោកបក់ឆ្ពោះទៅហ្វីលីពីន ជាមួយនឹងភ្លៀងធ្លាក់ខ្លាំង
ម៉ានីល៖ ហ្វីលីពីននៅថ្ងៃទី២៣ ខែតុលា បានផ្អាកការងាររដ្ឋាភិបាល និងបិទសាលារៀន ហើយធនាគារកណ្តាលរបស់ខ្លួន បានបញ្ឈប់ការជួញដូររូបិយបណ្ណបរទេស ដោយសារតែព្យុះត្រូពិចត្រាមី (Trami) ដែលកំពុងបក់បោកឆ្ពោះទៅឆ្នេរសមុទ្រភាគខាងកើតនៃកោះលូហ្សុន (Luzon) របស់ប្រទេសនេះ។
ទីភ្នាក់ងារព្យាករណ៍អាកាសធាតុរដ្ឋប៉ាហ្គាសា (PAGASA) បានរាយការណ៍ថា នៅម៉ោង៥ព្រឹក ម៉ោងក្នុងស្រុក ចំណុចកណ្តាលរបស់ព្យុះត្រាមី ត្រូវបានប៉ាន់ស្មានចុងក្រោយថាស្ថិតនៅចម្ងាយ១៨០គីឡូម៉ែត្រពីកណ្តាលទីក្រុង Virac ក្នុងខេត្ត Catanduanes។ ប៉ាហ្គាសា បានព្រមានអំពីខ្យល់បក់ខ្លាំង ភ្លៀងធ្លាក់ខ្លាំង និងខ្យល់ព្យុះបោកបក់នៅក្នុងទីប្រជុំជនជាប់មាត់សមុទ្រក្នុងផ្លូវរបស់ព្យុះទីហ្វុង។ ព្យុះត្រាមី បាននាំមកនូវភ្លៀងធ្លាក់យ៉ាងខ្លាំង ដែលបង្ខំឱ្យរដ្ឋបាលក្នុងតំបន់ ជម្លៀសអ្នកស្រុកទីតាំងមានសុវត្ថិភាព។ ព្យុះដែលកំពុងបក់បោកក្នុងល្បឿន៨៥គីឡូម៉ែត្រក្នុងមួយម៉ោង ក៏បានបណ្តាលឱ្យមានការផ្អាកការងាររបស់រដ្ឋាភិបាល និងសាលារៀននៅទូទាំងកោះលូហ្សុនផងដែរ។
ទន្ទឹមគ្នានោះ ធនាគារកណ្តាលហ្វីលីពីនក៏បានផ្អាកការជួញដូររូបិយបណ្ណ និងប្រតិបត្តិការរូបិយវត្ថុសម្រាប់មួយថ្ងៃ។ ការិយាល័យរបស់ប្រធានាធិបតីបានប្រកាសថា ភ្នាក់ងារដែលពាក់ព័ន្ធនឹងការឆ្លើយតបនឹងគ្រោះមហន្តរាយ និងសេវាកម្មសំខាន់ៗនៅតែបើកដំណើរការជាធម្មតា។ លោកប្រធានាធិបតី ហ្វឺឌីណាន់ ម៉ាកូស បានលុបចោលកិច្ចប្រជុំទាំងអស់នៅថ្ងៃពុធ ដើម្បីផ្តោតលើការសម្របសម្រួលកិច្ចខិតខំប្រឹងប្រែងស្វែងរក និងជួយសង្គ្រោះ និងជំនួយដ៏ទូលំទូលាយរបស់រដ្ឋាភិបាល ហើយនឹងកោះប្រជុំបន្ទាន់មួយនៅទីស្នាក់ការយោធាដើម្បីពិភាក្សាអំពីកិច្ចខិតខំប្រឹងប្រែងកាត់បន្ថយគ្រោះមហន្តរាយ។ គួរបញ្ជាក់ថា ព្យុះត្រាមីក៏កំពុងបោះពួយឆ្ពោះទៅប្រទេសវៀតណាម៕