ឯកឧត្តម សួស ប្រាថ្នា អញ្ជើញចូលរួមក្នុងកិច្ចប្រជុំក្រុមមន្ត្រីជាន់ខ្ពស់កម្ពុជា-ថៃ ដើម្បីពិភាក្សាលើរបៀបវារៈសំខាន់ៗ ក្នុងកំណត់ហេតុ នៃកិច្ចប្រជុំ ត្រៀមសម្រាប់កិច្ចប្រជុំពេញអង្គ
ភ្នំពេញ៖ នារសៀលថ្ងៃពុធ ទី២៣ ខែតុលា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញចូលរួមក្នុងកិច្ចប្រជុំក្រុមមន្ត្រីជាន់ខ្ពស់កម្ពុជា-ថៃ ដើម្បីពិនិត្យ ពិភាក្សាលើរបៀបវារៈសំខាន់ៗ និងផ្តល់ធាតុចូលមួយចំនួនលើសេចក្តីព្រាងកំណត់ហេតុនៃកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨ ក្រោមអធិបតីភាពឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ និងជាប្រធានក្រុមមន្ត្រីជាន់ខ្ពស់នៃព្រះរាជាណាចក្រកម្ពុជា និងឯកឧត្តម អាន់ ហ្ស៊ីត សាំផាន់ថារ៉ាត់ លេខាធិការអចិន្ត្រៃយ៍ក្រសួងមហាផ្ទៃ និងជាប្រធានក្រុមមន្ត្រីជាន់ខ្ពស់នៃព្រះរាជាណាចក្រថៃ។ កិច្ចប្រជុំនេះដែរ មានការចូលរួមពីថ្នាក់ដឹកនាំតំណាងក្រសួង ស្ថាប័នពាក់ព័ន្ធកម្ពុជា និងប្រតិភូថៃជាច្រើនរូបផងដែរ។
ក្នុងឱកាសនោះ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ និងជាប្រធានក្រុមមន្ត្រីជាន់ខ្ពស់នៃព្រះរាជាណាចក្រកម្ពុជា បានមានប្រសាសន៍ស្វាគមន៍ និងសំដែងនូវសេចក្តីរីករាយយ៉ាងកក់ក្តៅចំពោះវត្តមាន ឯកឧត្តម អាត់ហ្ស៊ីត សាំផាន់ថារ៉ាត់ ព្រមទាំងមន្ត្រីជាន់ខ្ពស់នៃភាគីថៃ ដែលបានអញ្ជើញចូលរួមក្នុងកិច្ចប្រជុំមន្ត្រីជាន់ខ្ពស់នៃកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨ នាឱកាសដ៏ថ្លៃថ្លានេះ។
ឯកឧត្តមបានបន្តថា កិច្ចប្រជុំមន្ត្រីជាន់ខ្ពស់កម្ពុជា-ថៃ នាពេលនេះគឺជាកិច្ចប្រជុំមួយដ៏មានសារៈសំខាន់ដែល ភាគីទាំងពីរតែងតែរៀបចំឡើង ដើម្បីពិភាក្សាលើការឯកភាពគ្នាអំពីកិច្ចការសំខាន់ៗមួយចំនួនសម្រាប់បម្រើដល់ការរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃលើកទី៨ ដែលនឹងប្រព្រឹត្តទៅនាថ្ងៃស្អែកនេះ។
ឯកឧត្តមបន្តទៀតថា កិច្ចប្រជុំអភិបាលខេត្តជាប់ព្រំដែនកម្ពុជា-ថៃលើកទី៨ គឺជាយន្តការទ្វេភាគីដ៏មានសារៈសំខាន់ដែលភាគីទាំងពីរបានផ្លាស់ប្តូរវេនគ្នារៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ តាមការព្រមព្រៀងគ្នាចាប់តាំងពីកិច្ចប្រជុំលើកទី១ ដែលបានរៀបចំធ្វើឡើងនៅទីក្រុងប៉ាតាយ៉ា នៃព្រះរាជាណាចក្រថៃ កាលពីឆ្នាំ១៩៩៩ និងកិច្ចប្រជុំលើកទី៧ តាមរយៈ Video Conference កាលពីថ្ងៃទី១៦ ខែកញ្ញា ឆ្នាំ២០២២កន្លងទៅ។
ឯកឧត្តមបានបន្ថែមទៀតថា កិច្ចប្រជុំលើកទី៨នេះនឹងធ្វើការ ពិនិត្យ និងវាយតម្លៃនូវលទ្ធផលនៃកិច្ចសហប្រិតបត្តិការរវាងអាជ្ញាធរខេត្តជាប់ព្រំដែននៃប្រទេសទាំងពីរលើគ្រប់វិស័យ ចាប់តាំងពីឆ្នាំ២០២២ រហូតមកដល់ពេលបច្ចុប្បន្ន និងកំណត់ទិសដៅការងារកិច្ចសហប្រតិបត្តិការជាបន្តបន្ទាប់ទៀត។
ជាងនេះទៅទៀត ឯកឧត្តមក៏បានលើកឡើងដែរថា តាមរយៈលទ្ធផលនៃកិច្ចប្រជុំលើកទី៨នេះ នឹងជួយជំរុញ និងលើកកម្ពស់ថែមទៀតនូវយន្តការកិច្ចសហប្រតិបត្តិការរវាងអាជ្ញាធរខេត្តជាប់ ព្រំដែនកម្ពុជា-ថៃ ឱ្យបានកាន់តែជិតស្និទ្ធ ប្រកបដោយស្មារតីសាមគ្គីភាព មិត្តភាព និងទទួលបានប្រសិទ្ធភាពខ្ពស់ ជាពិសេសជួយជំរុញការអភិវឌ្ឍនៅខេត្តជាប់ព្រំដែនឱ្យកាន់តែមានការរីកចម្រើនបន្ថែមទៀត និងលើកកម្ពស់ជីវភាពរស់នៅរបស់ប្រជាជននៅតាមតំបន់ជាប់ព្រំដែនកាន់តែប្រសើរឡើង ៕
