សូមបង្កើនការប្រុងប្រយ័ត្ន! ក្រុមជនខិលខូចចាប់ផ្ដើមប្រើវិធីសាស្ដ្រផលិតមាសក្លែងក្លាយ ចរាចរលក់ចែកចាយលើបណ្តាញសង្គម
ភ្នំពេញ៖ ថ្មីៗនេះ មាសក្លែងក្លាយ ដែលប្រើប្រាស់វត្ថុធាតុម្យ៉ាងជ្រលក់ជាមួយទឹកមាស កំពុងចរាចរលក់ដូរលើបណ្ដាញសង្គមដោយក្រុមជនខិលខូច ក្នុងចេតនាដើម្បីបន្លំជនរងគ្រោះ ព្រមជាមួយបច្ចេកទេសកាត់តវីដេអូ ដើម្បីបោកប្រាស់ឱ្យជនរងគ្រោះជឿទុកចិត្ត ពោលគឺថែមទាំងប្រើប្រាស់វិធីសាស្ដ្រធ្វើតេស្តសាកល្បងតាមបែបប្រពៃណីផងដែរ។ នេះបើតាមការឱ្យដឹងពីអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ នៅថ្ងៃទី២៥ ខែតុលា ឆ្នាំ២០២៤។
ក្រុមការងារបច្ចេកទេស នៃនាយកដ្ឋានការពារសុវត្ថិភាពបច្ចេកវិទ្យាឌីជីថល បានបញ្ជាក់ថា ជាការពិតណាស់ការទិញលក់ដែលគ្មានប្រភពច្បាស់លាស់នៅលើប្រព័ន្ធផ្សព្វផ្សាយ តាមបណ្តាញសង្គម ធ្វើឱ្យអ្នកទិញពិបាកផ្ទៀងផ្ទាត់ផលិតផល តម្លៃ និងសេវាផ្សេងៗ ខណៈហាងទិញលក់មាសដែលបានលិខិតអនុញ្ញាតត្រឹមត្រូវពីអាជ្ញាធរ ការធានាទិញចូលវិញ ក្នុងតម្លៃសមរម្យតាមលក្ខន្តិកៈបានកំណត់ ដែលអ្នកទិញអាចជឿទុកចិត្តបាន ។
បន្ថែមលើនេះ សូមប្រជាពលរដ្ឋមេត្តាប្រុងប្រយ័ត្នលើការជាវ ឬទិញមាស តាមបណ្តាប្រភពពីបណ្តាញសង្គមផ្សេងៗដូចខាងក្រោម៖ ១.សូមជ្រើសរើសហាងលក់គ្រឿងអលង្កាមានអាជ្ញាបណ្ណ និងទទួលស្គាល់ដោយអាជ្ញាធរច្បាស់លាស់។ ២.ហាងដែលមានប្រើប្រាស់ឧបករណ៍មានលក្ខណៈស្ដង់ដារបច្ចេកទេស ដើម្បីពិនិត្យមាសឱ្យបានត្រឹមត្រូវ។ ៣.សូមរាយការណ៍មកកាន់អាជ្ញាធរសមត្ថកិច្ចជាបន្ទាន់ ក្នុងករណីសង្កេតឃើញ ឬសង្ស័យថា មានការលក់មាសក្លែងក្លាយ៕
