World Bank ដាក់ចេញនូវយុទ្ធសាស្ត្រថ្មី ជំរុញឱកាសសេដ្ឋកិច្ចសម្រាប់ស្ត្រី

វ៉ាស៊ីនតោន៖ ធនាគារពិភពលោក បានបង្ហាញនូវយុទ្ធសាស្ត្រយេនឌ័រថ្មីមួយក្នុងគោលបំណងបង្កើនឱកាសសេដ្ឋកិច្ចសម្រាប់ស្ត្រី និងអនុញ្ញាតឱ្យមានការចូលរួមរបស់ពួកគេនៅក្នុងសេដ្ឋកិច្ចពិភពលោក តាមរយៈការគាំពារសង្គម និងការទទួលបានសេវាអ៊ីនធឺណិត និងមូលធន។

យុទ្ធសាស្ត្រយេនឌ័រ ២០២៤-២០៣០ មានគោលបំណងផ្តល់លទ្ធភាពឱ្យស្ត្រីចំនួន ៣០០លាននាក់បន្ថែមទៀត អាចប្រើប្រាស់អ៊ិនធឺណិតល្បឿនលឿន សេវាសំខាន់ៗ សេវាហិរញ្ញវត្ថុ ការអប់រំ និងឱកាសការងារនៅឆ្នាំ២០៣០។ វាក៏មានគោលបំណងជួយស្ត្រីចំនួន ២៥០លាននាក់ ជាមួយនឹងកម្មវិធីគាំពារសង្គម ដោយផ្តោតលើជនក្រីក្របំផុត និង ងាយរងគ្រោះបំផុត និងផ្តល់ឱ្យស្ត្រី និងអាជីវកម្មដែលដឹកនាំដោយស្ត្រីចំនួន ៨០លាននាក់បន្ថែមទៀតជាមួយនឹងដើមទុន ដើម្បីដោះស្រាយឧបសគ្គនៃកំណើនសហគ្រិនភាព។

ប្រធានធនាគារពិភព លោក អាចា បាងហ្គា បានលើកឡើងថា ការបង្កើនការចូលរួមផ្នែកសេដ្ឋកិច្ចរបស់ស្ត្រី មិនត្រឹមតែជួយជំរុញសេដ្ឋកិច្ចពិភពលោកប៉ុណ្ណោះទេ ប៉ុន្តែថែមទាំងពង្រឹងគ្រួសារ និងសហគមន៍ផងដែរ។

លោកបន្តថា តាមរយៈការពង្រឹងសេដ្ឋកិច្ច យើងកំពុងប្រាសចាកចេញពីភាពក្រីក្រ និងពង្រីកក្ដីសង្ឃឹម និងសេចក្ដីថ្លៃថ្នូរតាមដែលអាចធ្វើទៅបាន។