ឧបនាយករដ្ឋមន្ត្រី ហង់ជួន ណារ៉ុន អញ្ជើញចុះពិនិត្យការបោះពុម្ពលទ្ធផលប្រឡងបាក់ឌុបដោយផ្ទាល់ មុនប្រកាសផ្លូវការ
ភ្នំពេញ៖ ឯកឧត្ដម ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានអញ្ជើញចុះពិនិត្យការបោះពុម្ពលទ្ធផលប្រឡងបាក់ឌុបដោយផ្ទាល់ នៅមុនការប្រកាសលទ្ធផល នៅរសៀលថ្ងៃទី៣០ ខែតុលានេះនៅរាជធានីភ្នំពេញ និងខេត្តកណ្តាល និងនៅថ្ងៃទី៣១ ខែតុលា នៅតាមបណ្តាខេត្ត។ ការប្រកាសលទ្ធផល នឹងប្រកាសនៅតាមមណ្ឌលប្រឡង និងបណ្ដាញសង្គម។
បើតាមហ្វេសប៊ុកក្រសួងអប់រំ ថ្នាក់ដឹកនាំក្រសួងអប់រំ បានរៀបចំកិច្ចប្រជុំសម្រេច និងបោះពុម្ពលទ្ធផលប្រឡងសញ្ញាបត្រទុតិយភូមិ ក្រោមការត្រួតពិនិត្យដោយផ្ទាល់ពីលោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ និងមានការចូលរួមសង្កេតការណ៍ពីអង្គភាពប្រឆាំងអំពើពុករលួយ។
ពាក់ព័ន្ធនឹងដំណើរការប្រឡង កំណែ និងបូកពិន្ទុ ក្រសួងអប់រំ អះអាងថា «គ្រប់ដំណើរការនៃការប្រឡងសញ្ញាបត្រមធ្យមសិក្សាទុតិយភូមិ ត្រូវបានដំណើរការដោយរលូន ក្រោមការបំពេញការងារយ៉ាងយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់ ដើម្បីធានាបានដំណើរការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន»។
ក្រសួងអប់រំ យុវជន និងកីឡា នឹងប្រកាសលទ្ធផលប្រឡងនៅរាជធានីភ្នំពេញ និងខេត្តកណ្តាល នារសៀលថ្ងៃទី៣០ ខែតុលានេះ និងនៅថ្ងៃទី៣១ ខែតុលា ឆ្នាំ២០២៤ សម្រាប់ខេត្ត ផ្សេងៗនៅទូទាំងប្រទេស។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៨ តុលា ២០២៤ មានបេក្ខជនចុះឈ្មោះសរុប ១៣៧ ០៤០នាក់ ក្នុងនោះថ្នាក់វិទ្យាសាស្រ្តមាន ៣៩ ៣៥៨នាក់ និងថ្នាក់វិទ្យាសាស្រ្តសង្គមមាន ៩៧ ៦៨២នាក់៕
