មេដឹកនាំថ្មីរបស់ក្រុម Hezbollah ប្តេជ្ញាថានឹងបន្តយុទ្ធសាស្រ្តសង្រ្គាមរបស់អ្នកជំនាន់មុន

បេរូត៖ មេដឹកនាំថ្មីរបស់ Hezbollah លោក Sheikh Naim Qassem បានបញ្ជាក់កាលពីថ្ងៃពុធថា លោកនឹងបន្តយុទ្ធសាស្រ្តសង្រ្គាម ដែលបានអនុម័តដោយអ្នកស្នងតំណែងមុនរបស់លោក Sayyed Hassan Nasrallah ដោយគាំទ្ររណសិរ្ស Gaza។

លោក Qassem បានឲ្យដឹងនៅក្នុងសុន្ទរកថាតាមទូរទស្សន៍ជាលើកដំបូងបន្ទាប់ពីការតែងតាំងរបស់គាត់ជាអគ្គលេខាធិការថ្មីរបស់ Hezbollah ថា កម្មវិធីការងាររបស់ខ្ញុំគឺជាការបន្តនៃកម្មវិធីរបស់លោក Sayyed Hassan Nasrallah លើគ្រប់វិស័យ នយោបាយ ជីហាដ សង្គម និងវប្បធម៌។

លោក Qassem បានសង្កត់ធ្ងន់ថា ការគាំទ្រតំបន់ Gaza គឺចាំបាច់ដើម្បីប្រឈមមុខនឹងការគំរាមកំហែងដែលបង្កឡើងដោយអ៊ីស្រាអែលនៅក្នុងតំបន់។

លោកបានថ្លែងថា អ្នកប្រាកដជាត្រូវចាញ់ព្រោះនេះជាដីរបស់យើង ចូរចេញពីទឹកដីរបស់យើង ប្រសិនបើអ្នកនៅ អ្នកនឹងត្រូវបង់ថ្លៃយ៉ាងធ្ងន់។

លោក Qassem ក៏បានបញ្ជាក់ដែរថា អ៊ីរ៉ង់បាននិងកំពុងគាំទ្រក្រុម Hezbollah ដោយគ្មានចេតនាលាក់កំបាំងណាមួយឡើយ។

លោកបានបន្តថា យើងកំពុងរំដោះទឹកដីលីបង់ នៅពេលដែលយើងប្រយុទ្ធជាមួយអ៊ីស្រាអែលជាមួយបុរសលីបង់នៅតាមព្រំដែនរបស់យើង អ៊ីរ៉ង់មិនប្រើប្រាស់ពួកយើងដើម្បីប្រយុទ្ធជាមួយអ៊ីស្រាអែលដូចដែលមនុស្សមួយចំនួនបានបញ្ជាក់នោះទេ។

ខណៈដែលទទួលស្គាល់ថា ក្រុម Hezbollah ត្រូវបានរងផលប៉ះពាល់ដោយការធ្វើឃាតលោក Nasrallah លោក Qassem បានបញ្ជាក់ជាថ្មីថា ក្រុមនេះមានសមត្ថភាពបំពេញមុខតំណែងទំនេរទាំងអស់។

ចាប់តាំងពីថ្ងៃទី២៣ ខែកញ្ញាមក កងទ័ពអ៊ីស្រាអែលបាននិងកំពុងធ្វើយុទ្ធនាការផ្លូវអាកាសដ៏ខ្លាំងក្លាមួយប្រឆាំងនឹងប្រទេសលីបង់ ដែលបង្ហាញពីការកើនឡើងដ៏គ្រោះថ្នាក់ជាមួយក្រុមហេសបូឡា។

ចាប់តាំងពីថ្ងៃទី៨ ខែតុលា ឆ្នាំ២០២៣ មក ក្រុមហេសបូឡា និងកងទ័ពអ៊ីស្រាអែល បាននិងកំពុងបាញ់ប្រហារគ្នានៅទូទាំងព្រំដែនលីបង់ និងអ៊ីស្រាអែល ចំពេលមានការព្រួយបារម្ភអំពីជម្លោះកាន់តែទូលំទូលាយ ខណៈដែលសង្រ្គាមរវាងក្រុមហាម៉ាស់ និងអ៊ីស្រាអែលនៅតែបន្តនៅក្នុងតំបន់ហ្គាហ្សាស្ទ្រីប។