ថៃចាប់ខ្លួន សមាជិកក្រុមឧក្រិដ្ឋកម្មជប៉ុន យ៉ាគូហ្សា ២នាក់ ដែលចាប់ជំរិតទារប្រាក់ពីជនជាតិជប៉ុនម្នាក់ ៣០ម៉ឺនបាត ដោយវាយដំ និងបង្ខំឱ្យស៊ីលាមក

បរទេស៖ បុរសជនជាតិជប៉ុនពីរនាក់ ដែលជាប់ចោទពីបទចាប់ជំរិត ទារប្រាក់ពីជនជាតិជប៉ុនដូចគ្នា មុនពេលវាយដំលើរាងកាយ និងបង្ខំឱ្យជនរងគ្រោះស៊ីលាមក គឺត្រូវបានប៉ូលីសរបស់ប្រទេសថៃចាប់ខ្លួន នៅរមណីយដ្ឋានមួយក្នុងខេត្ត Chon Buri ។

យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយកាលពីថ្ងៃទី៦ ខែវិច្ឆិកា ឆ្នាំ២០២៤ បានឱ្យដឹងថា ជនសង្ស័យត្រូវបានគេអះអាងថា ជាសមាជិកនៃអង្គការឧក្រិដ្ឋកម្មជប៉ុនមួយឈ្មោះ យ៉ាគូហ្សា (Yakuza)។

ឧត្តមសេនីយ៍ Theeradej Thamsuthee ប្រធានផ្នែកស៊ើបអង្កេត នៅការិយាល័យប៉ូលីសក្រុងបាងកក បានបង្ហាញព័ត៌មានលម្អិតកាលពីថ្ងៃពុធ។

លោកបានបន្តថា ជនរងគ្រោះជនជាតិជប៉ុនមិនត្រូវ បានបញ្ចេញឈ្មោះបានដាក់ពាក្យបណ្តឹងនៅប៉ុស្តិ៍ប៉ូលិស ផាយ៉ាថៃ និងប៉ុស្តិ៍ Chok ។ ជនរងគ្រោះបាននិយាយថា បុរសបីនាក់បានចាប់គាត់យកទៅផ្ទះមួយ។ ពួកគេបានទាមទារប្រាក់ ៣០០.០០០ បាត ដោយអះអាងថា វាជាការគិតថ្លៃសេវាក្នុងការរៀបចំទិដ្ឋាការ របស់គាត់នៅច្រកទ្វារប៉ោយប៉ែតរបស់កម្ពុជា។

ជនរងគ្រោះនិយាយថា គាត់មិនមានលុយច្រើននោះទេ គាត់បានបង់ប្រាក់ឲ្យអ្នកទាំងបីចំនួន ១៣៥.០០០ បាត ប៉ុន្តែពួកគេមិនពេញចិត្តនោះឡើយ។ គាត់ត្រូវបានគេនាំទៅតំបន់ស្មៅក្រាស់ៗ ដែលគាត់និយាយថា គេគំរាមសម្លាប់គាត់។ ផ្ទុយទៅវិញ ពួកគេបាននាំគាត់ទៅសណ្ឋាគារមួយនៅផ្លូវ Kaset-Nawamin ក្នុងទីក្រុងបាងកក ហើយបានឃុំខ្លួនគាត់នៅទីនោះ។
ដើមបណ្តឹងបាននិយាយថា អ្នកចាប់របស់គាត់បានវាយដំគាត់ ពេញមួយយប់នៅក្នុងបន្ទប់សណ្ឋាគារ មុនពេលបង្ខំគាត់ឱ្យស៊ីលាមក និងទាមទារប្រាក់បន្ថែមពីគាត់។
ក្រោយមកក្រុមអ្នកស៊ើបអង្កេត បានកំណត់អត្តសញ្ញាណជនល្មើសទាំងបីនាក់នោះឈ្មោះ Niki Fuku អាយុ ៤៥ ឆ្នាំ; Tomiki Asai អាយុ ២៦ ឆ្នាំ ទាំង២ជនជាតិជប៉ុន; និងបុរសជនជាតិថៃម្នាក់ដែលគេស្គាល់ថាឈ្មោះ ប៉ៅ អាយុ ៣៥ឆ្នាំ។ ដីការបស់តុលាការត្រូវបានទទួល សម្រាប់ការចាប់ខ្លួនពួកគេ។ ឈ្មោះ ប៉ៅ ត្រូវបានចាប់ខ្លួន ប៉ុន្តែជនសង្ស័យជនជាតិជប៉ុន ទាំងពីរនាក់បានរត់គេចខ្លួន។