សម្តេចធិបតី៖ តម្លៃសុខសន្តិភាព ទោះដេកយល់សុបិនក៏នៅតែនិយាយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា សម្តេចមិននឿយណាយក្នុងការនិយាយ ឬរំលឹកពីតម្លៃសុខសន្តិភាពនោះឡើយ ទោះនិយាយរហូតដេកយល់សុបិនពីពាក្យសម្តីសម្តេចនិយាយរឿងសន្តិភាព ក៏នៅតែនិយាយ។

សម្តេចធិបតី បានលើកឡើងបែបនេះក្នុងឱកាសអញ្ជើញសម្ពោធវិថីតេជោសន្តិភាពឆ្នេរអង្កោល ប្រវែងសរុប ១២.៦៤៥ម៉ែត្រ ក្រោមកម្ចីឥណទានសម្បទាន ពីធនាគារអភិវឌ្ឍន៍អាស៊ី ស្ថិតនៅភូមិអ្នេរអង្កោល ឃុំឆ្នេរអង្កោល ស្រុកដំណាក់ចង្អើរ ខេត្តកែប នាព្រឹកថ្ងៃទី១១ ខែវិច្ឆិកា ឆ្នាំ២០២៤នេះ។

សម្តេចធិបតី បានថ្លែងថា គ្មានសុខសន្តិភាព មិនមាននរណាមកលេងខេត្តកែបនោះឡើយ ដូច្នេះត្រូវរួមគ្នាថែរក្សាឱ្យបានសុខសន្តិភាព។

បន្ថែមពីនេះសម្តេចធិបតី បានថ្លែងថា ការរំលឹករឿងរក្សាសុខសន្តិភាព មិនមែនជាការគំរាមនរណាទេ តែដើម្បីថែរក្សាបានភាពសុខសាន្តរបស់ប្រជាពលរដ្ឋគ្រប់រូប៕