សម្ដេចធិបតី ចាត់ទុកការបង្កើត «ចលនាជាតិតស៊ូ» របស់ក្រុមប្រឆាំងក្រៅប្រទេស គ្រាន់តែជាការបង្កើតព្រឹត្តិការណ៍ ទាក់ទាញចំណាប់អារម្មណ៍

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានចាត់ទុកការបង្កើត «ចលនាជាតិតស៊ូ» របស់ក្រុមប្រឆាំងជ្រុលនិយមដែលកំពុងរស់នៅក្រៅប្រទេស គ្រាន់តែជាការបង្កើតព្រឹត្តិការណ៍ ទាក់ទាញចំណាប់អារម្មណ៍ប៉ុណ្ណោះ ។

ក្នុងឱកាសអញ្ជើញសម្ពោធ «វិថីតេជោសន្តិភាព​ឆ្នេរអង្កោល» នាថ្ងៃទី១១ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត បានអះអាងថា សមាជិកស្មោះស្ម័គ្រ និងមន្ដ្រីជាន់ខ្ពស់របស់ក្រុមប្រឆាំងទាំងអស់ បានដើរចេញពីបក្ខពួកខ្លួន ហើយងាកមកចូលរួមជាមួយរាជរដ្ឋាភិបាលកម្ពុជា និងគណបក្សប្រជាជនកម្ពុជាវិញ។

សម្ដេចមហាបវរធិបតី បញ្ជាក់ថា «ប៉ុន្មានខែនេះមានការបង្កើតចលនាមិនចេះចប់ ចលនាក្រៅប្រទេស មានទាំងរដ្ឋាភិបាលស្រមោលនៅក្រៅប្រទេសទៀត ។ ខ្ញុំមិនដឹងថាបង្កើតធ្វើអ្វី គោលដៅអ្វី តែបើតាមការវិភាគគោលដៅនៅដដែលបង្កើតអ្វីប្លែក។ ចុងក្រោយនេះមានចលនាដែលប្រជាពលរដ្ឋក្នុងប្រទេសធ្លាប់ជាសមាជិកបក្សរបស់គាត់ គាំទ្រគាត់ បានចេញមកចូលរួមជាមួយរាជរដ្ឋាភិបាល ជាមួយគណបក្សប្រជាជនកម្ពុជា ទាំងមន្ដ្រីជាន់ខ្ពស់របស់គាត់ទាំងក្នុងប្រទេស ក្រៅប្រទេស អ្នកគាំទ្រសំខាន់របស់គាត់ជាច្រើន»។

សម្ដេចបវរធិបតី ហ៊ុន ម៉ាណែត ថ្លែងបន្ថែមថា មនុស្សមួយចំនួននៅតែបន្ដចិញ្ចឹមចិត្តញុះញង់ អុជអាល និងបបួលមនុស្សឲ្យបែងចែកបក្ខពួក បែកបាក់គ្នា ក្នុងនោះមានទាំងការបង្កើតរដ្ឋាភិបាលស្រមោលក្រៅប្រទេស ហើយធ្វើសកម្មភាពនៅតាមបណ្ដាញសង្គមតាំងខ្លួនជានាយករដ្ឋមន្ដ្រី។ មិនតែប៉ុណ្ណោះ បែរជាឆ្លៀតចោទប្រកាន់មកលើរាជរដ្ឋាភិបាលកម្ពុជា ថាជារាជរដ្ឋាភិបាលមិនស្របច្បាប់ ទាំងដែលកាលពីខែកក្កដា ឆ្នាំ២០២៣កន្លងទៅ មានប្រជាពលរដ្ឋរហូតដល់ជាង៨លាននាក់ទៅបោះឆ្នោត តាមរដ្ឋធម្មនុញ្ញ។

សម្ដេចមហាបវរធិបតី ក៏បានព្រមានទុកថា រាជរដ្ឋាភិបាលកម្ពុជា មិនអាចអន់ឱនឲ្យបានឡើយ ចំពោះការធ្វើសកម្មភាពទាំងឡាយណាដែលហួសព្រំដែនច្បាប់ ក្នុងចេតនាបង្កចលាចលសង្គម បង្កើតអស្ថិរភាព ៕