នាយករដ្ឋមន្ត្រី អំពាវនាវដល់វិនិយោគិនបរទេស ជួយផ្សព្វផ្សាយព័ត៌មានពិត ដើម្បីលុបបំបាត់ព័ត៌មានប្រឌិត

ភ្នំពេញ៖ ក្នុងពិធីសំណេះសំណាល និងពិសាភោជនាហារសាមគ្គីជាមួយពាណិជ្ជករ ត្រកូលលីន ពិភពលោក នាល្ងាចថ្ងៃទី១២ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បាន មានប្រសាសន៍អំពាវនាវដល់វិនិយោគិនទាំងអស់ជួយផ្សព្វផ្សាយព័ត៌មានពិតដែលកំពុង មើលឃើញស្រាប់ ដើម្បីលុបបំបាត់ព័ត៌មានប្រឌិត ដែលផ្សាយចោទប្រកាន់នាំឲ្យមានការយល់ច្រឡំ និងប៉ះពាល់ដល់កេរ្ដិ៍របស់កម្ពុជា។

សម្ដេចធិបតី ហ៊ុន ម៉ាណែត បានថ្លែងថា សម្ដេចសូមអំពាវនាវដល់ភ្ញៀវកិត្តិយសជាតិ និងអន្តរជាតិ ដែលមានវត្តមាននៅទីនេះ សូមជួយធ្វើការផ្សព្វផ្សាយនូវព័ត៌មានពិតរបស់កម្ពុជា ទៅឲ្យមិត្តភ័ក្ត បងប្អូន ដៃគូសហការ និងក្រុមគ្រួសាររបស់អស់លោក-លោកស្រី ហើយអញ្ជើញពួកគាត់មកលេង មកមើល និងស្វែងយល់ពីកម្ពុជា។

សម្តេចធិបតី នាយករដ្ឋមន្ត្រី បានមានប្រសាសន៍ថា កម្ពុជាស្វាគមន៍ជានិច្ចនូវការអញ្ជើញមកដល់របស់ភ្ញៀវបរទេសទាំងអស់ មិនថាមកវិនិយោគ, មកដើរលេងកម្សាន្ត ឬមកសិក្សាស្វែងយល់នោះទេ គឺកម្ពុជាស្វាគមន៍ជានិច្ច។ សម្ដេចបន្ដថា កម្ពុជាពិតជាមានសុខសុវត្ថិភាពពិតប្រាកដមែន ដែលភ្ញៀវអន្តរជាតិអាចមកកម្សាន្ដ ដោយមិនមានក្តីបារម្ភ។

សម្ដេចធិបតី បានសង្កត់ធ្ងន់ថា មហាសន្និបាតសភាពាណិជ្ជកម្មត្រកូលលីនពិភពលោក នៅពេលនេះមិនត្រឹមតែជាកម្មវិធី ដែលកៀរគរនូវវិនិយោគគិនតែប៉ុណ្ណោះទេ ប៉ុន្តែជាកម្មវិធីមួយ ដែលអាចបង្ហាញទៅពិភពលោក ឲ្យបានឃើញតថភាពជាក់ស្តែង និងពិតប្រាកដរបស់ប្រទេសកម្ពុជា ដែលមានសុខសុវត្តិភាពពិតប្រាកដមែន មិនដូចជាអ្វីដែលពួកគាត់បានមើលឃើញ តាមរយៈប្រព័ន្ធផ្សព្វផ្សាយមួយចំនួននោះទេ ៕