ឯកឧត្តម ហង្ស វិចិត្រ អញ្ជើញបើកវគ្គបណ្តុះបណ្តាលស្តីពី “នីតិវិធីនៃការរៀបចំ និងការអនុវត្តថវិកាសមិទ្ធកម្ម និងអង្គភាពថវិកា”

ភ្នំពេញ៖ ឯកឧត្តម ហង្ស វិចិត្រ អគ្គនាយករដ្ឋបាល និងហិរញ្ញវត្ថុ​ នៃអគ្គលេខាធិការដ្ឋានរដ្ឋសភា នាថ្ងៃពុធ ទី១៣ ខែវិច្ឆិកា ឆ្នាំ២០២៤ បានអញ្ជើញជាអធិបតីក្នុងពិធីបើកសិក្ខាសាលាបណ្តុះបណ្តាលស្តីពី “នីតិវិធីនៃការរៀបចំ និងការអនុវត្តថវិកាសមិទ្ធកម្ម និងអង្គភាពថវិកា” ដោយមានការអញ្ជើញចូលរួមពី ឯកឧត្តម ហុក ប៉េងសែ អគ្គនាយករងនៃអគ្គនាយកដ្ឋានថវិកា ក្រសួងសេដ្ឋកិច្ច និងហិរញ្ញវត្ថុ​ ព្រមទាំងថ្នាក់ដឹកនាំក្រសួង គ្រូឧទ្ទេសជាមន្រ្តីជំនាញនៃក្រសួងសេដ្ឋកិច្ច និងហិរញ្ញវត្ថុ និងសិក្ខាកាមមកពីគ្រប់នាយកដ្ឋាននៃអង្គភាពថវិកាចំណុះឱ្យអគ្គលេខាធិការដ្ឋានរដ្ឋសភា សរុបប្រមាណ១០៥រូប។

វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណងផ្តល់ជាមូលដ្ឋាននូវចំណេះដឹងបន្ថែមពាក់ព័ន្ធនឹងនីតិវិធីនៃការរៀបចំ និងការអនុវត្តថវិកាសមិទ្ធកម្ម និងអង្គភាពថវិកា ជូនដល់មន្ត្រីជំនាញនៅគ្រប់អង្គភាពថវិកា ដែលស្ថិតក្រោមអាណាប័កអគ្គលេខាធិការដ្ឋានរដ្ឋសភា ដើម្បីធានាប្រសិទ្ធភាព ស័ក្តិសិទ្ធិភាព តម្លាភាព និងគណនេយ្យភាព ក្នុងការអនុវត្តថវិការបស់អង្គភាពថវិកាទាំងអស់។

សូមជម្រាបជូនថា អគ្គលេខាធិការដ្ឋានរដ្ឋសភា បាននឹងកំពុងចូលរួមអនុវត្តយ៉ាងសកម្មស្របតាមចក្ខុវិស័យ យុទ្ធសាស្ត្រ និងផែនការសកម្មភាពរួមនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ហើយការរៀបចំវគ្គបណ្តុះបណ្តាលនៅថ្ងៃនេះ បានផ្តល់ជាចំណេះដឹងបន្ថែមដល់សិក្ខាកាមជាមន្ត្រីបង្គោលទាំងអស់នៃគ្រប់អង្គភាពថវិការបស់អគ្គលេខាធិការដ្ឋានរដ្ឋសភា យកទៅបំពេញបន្ថែមលើការអនុវត្តការងារគាំទ្រដល់ការគ្រប់គ្រង និងអនុវត្តថវិកា ដើម្បីត្រៀមលក្ខណៈជំរុញឱ្យអង្គភាពថវិកានាយកដ្ឋានទាំងអស់ក្លាយទៅជាអាណាប័កផ្ទេរសិទ្ធិជាបន្តបន្ទាប់ក្នុងពេលខាងមុខនេះ​ ៕