អន្តរគណៈកម្មការរដ្ឋសភា ជួបប្រជុំជាមួយតំណាងរាជរដ្ឋាភិបាល ពិនិត្យសំណើសុំកែសម្រួលសេចក្តីព្រាងច្បាប់ស្តីពី ការអនុម័តលុបចោលកិច្ចព្រមព្រៀងពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម

ភ្នំពេញ៖ នារសៀលថ្ងៃទី១៣ ខែវិច្ឆិកា ឆ្នាំ២០២៤ អន្តរគណៈកម្មការរដ្ឋសភា រួមមាន គណៈកម្មការទី៥ នៃរដ្ឋសភា ដឹកនាំដោយ ឯកឧត្តម សួស យ៉ារ៉ា គណៈកម្មការទី៦ ដឹកនាំដោយ ឯកឧត្តម អង្គ វង្ស វឌ្ឍានា គណៈកម្មការទី៩ ដឹកនាំដោយ លោកជំទាវ និន សាផុន បានជួបប្រជុំជាមួយតំណាងរាជរដ្ឋាភិបាល ដឹកនាំដោយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងសហការី ដើម្បីពិនិត្យសំណើសុំកែសម្រួលសេចក្តីព្រាងច្បាប់ស្តីពី ការអនុម័តលុបចោលកិច្ចព្រមព្រៀងពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ទៅជាសេចក្តីព្រាងច្បាប់ស្តីពី និរាករណ៍ច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពីការជំរុញ និងសម្រួលពាណិជ្ជកម្ម តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម។

ក្នុងកិច្ចប្រជុំនេះ មានការអញ្ជើញចូលរួមពីឯកឧត្តម លោកជំទាវ ជាសមាជិក សមាជិកាគណៈកម្មការជំនាញនានារបស់រដ្ឋសភាផងដែរ ដែលជាស្មារតីរួមមួយនៅក្នុងដំណើរការពិនិត្យសិក្សាសេចក្តីព្រាងច្បាប់ឱ្យបានល្អិតល្អន់ មុននឹងឈានទៅដល់ការធ្វើសេចក្តីសម្រេចឱ្យបានត្រឹមត្រូវ និងមានប្រសិទ្ធភាពខ្ពស់សម្រាប់ការអនុវត្តជាក់ស្តែង៕