រដ្ឋមន្ត្រី ថោ ជេដ្ឋា ស្នើឲ្យក្រុមហ៊ុន Delphos ពិនិត្យលទ្ធភាពកៀរគរទុនវិនិយោគជួយដល់ក្រសួងធនធានទឹក កសាងប្រព័ន្ធធារាសាស្ត្រប្រកបដោយសក្តានុពល នៅតាមបណ្តាខេត្តជុំវិញបឹងទន្លេសាប

ភ្នំពេញ៖ នៅរសៀលថ្ងៃពុធ ៥រោច ខែកត្ដិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២០ ខែវិច្ឆិកា ឆ្នាំ២០២៤នេះ នៅទីស្ដីការក្រសួង ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអនុញ្ញាតឱ្យលោក Andrew Brown ប្រធានក្រុមហ៊ុន Delphos និងសហការីចូលជួបសម្តែងការគួរសម និងពិភាក្សាការងារ។

ក្នុងឱកាសនោះ ឯកឧត្ដមរដ្ឋមន្ត្រី បានស្វាគមន៍យ៉ាងកក់ក្ដៅដល់គណៈប្រតិភូតំណាងក្រុមហ៊ុន Delphos និងបានថ្លែងអំណរគុណចំពោះកិច្ចសហការរបស់ក្រុមហ៊ុនក្នុងការកៀរគរទុនវិនិយោគសម្រាប់គម្រោងនានានៅកម្ពុជា ដើម្បីចូលរួមចំណែកជាមួយរាជរដ្ឋាភិបាលក្នុងការជំរុញកំណើនសេដ្ឋកិច្ច សម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០។

ឯកឧត្តមរដ្ឋមន្ត្រីបានជម្រាបតំណាងក្រុមហ៊ុនថា ក្នុងនាមជាសេនាធិការឱ្យរាជរដ្ឋាភិបាល ក្រសួងធនធានទឹក និងឧតុនិយម បានកំណត់នូវចក្ខុវិស័យសម្រាប់ការដឹកនាំ កំណត់នូវអាទិភាពការងារ និងបានដាក់ចេញនូវផែនការយុទ្ធសាស្ត្រច្បាស់លាស់សម្រាប់អនុវត្ត ជាពិសេសការកសាងអាងទឹកធំៗ ដូចជា អាងទឹករក្សា អាងទឹកដូនទ្រី អាងទឹកដងកាំបិត និងគម្រោងរំដោះទឹក និងពង្វាងទឹកជំនន់ក្នុងភូមិសាស្ត្ររាជធានីភ្នំពេញ និងខេត្តកណ្តាលជាដើម ស្របតាមគោលនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់ ប្រកបដោយភាពឈ្លាសវៃ និងប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ជាមួយគ្នានេះ ឯកឧត្តមរដ្ឋមន្ត្រី ក៏បានថ្លែងនូវការគាំទ្រចំពោះកិច្ចសហប្រតិបត្តិការនានាជាមួយក្រុមហ៊ុនក្នុងការកសាងប្រព័ន្ធធារាសាស្ត្រនៅកម្ពុជាដែលមានភាពធន់នឹងអាកាសធាតុ និងការធ្វើទំនើបកម្មប្រព័ន្ធធារាសាស្ត្រ ដើម្បីធានានូវសន្តិសុខទឹកសម្រាប់បម្រើឱ្យគ្រប់វិស័យ។

ទន្ទឹមនឹងនេះ ឯកឧត្តមរដ្ឋមន្ត្រីបានស្នើឱ្យក្រុមហ៊ុនពិនិត្យលទ្ធភាពក្នុងការកៀរគរទុនវិនិយោគជួយដល់ក្រសួងធនធានទឹក និងឧតុនិយម កសាងប្រព័ន្ធធារាសាស្ត្រប្រកបដោយសក្តានុពល និងមាននិរន្តរភាពនៅតាមបណ្តាខេ ត្តជុំវិញបឹងទន្លេសាប ដូចជា ខេត្តកំពង់ធំ សៀមរាប កំពង់ឆ្នាំង ពោធិ៍សាត់ បាត់ដំបង បន្ទាយមានជ័យជាដើម ក៏ដូចជាជួយកាត់បន្ថយគ្រោះធម្មជាតិដែលរួមមានគ្រោះទឹកជំនន់ និងគ្រោះរាំងស្ងួតផងដែរ។

សូមបញ្ជាក់ថា ក្រុមហ៊ុន Delphos ជាក្រុមហ៊ុនប្រឹក្សាហិរញ្ញវត្ថុដ៏ធំមួយមានមូលដ្ឋាននៅសហរដ្ឋអាម៉េរិកដែលមានប្រតិបត្តិការរយៈពេល ៣៧ឆ្នាំ មកហើយ និងមានបណ្តាញសហការជាមួយស្ថាប័នហិរញ្ញវត្ថុជាច្រើននៅលើពិភពលោកដូចជា ADB, US DFC, FinDev Canada, Austria Development Bank ជាដើម ដោយបានប្រឹក្សា និងកៀរគរថវិកាសម្រាប់គម្រោងនានាបានប្រមាណ ២០ប៊ីលានដុល្លារអាម៉េរិក។ នៅកម្ពុជា ក្រុមហ៊ុន Delphos កំពុងធ្វើការលើកគម្រោងជាច្រើនជាមួយក្រុមហ៊ុននានាដូចជា OCIC និង RMA ជាដើម ៕