ឥណ្ឌូណេស៊ី បង្កើនការត្រួតពិនិត្យ លើការគ្រប់គ្រងកាកសំណល់តាមផ្ទះ

ហ្សាការតា៖ យោងតាមទីភ្នាក់ងារសារព័ត៌មានជាតិឥណ្ឌូណេស៊ី Antara បានឱ្យដឹងថា ក្រសួងបរិស្ថានរបស់ប្រទេសឥណ្ឌូណេស៊ី បានចេញសេចក្តីណែនាំដល់ប្រធានតំបន់ទាំងអស់ក្នុងប្រទេស ជាពិសេសកន្លែងចាក់សំរាមដែលកំពុងប្រតិបត្តិការ (TPAs) ដើម្បីបង្កើនការអនុវត្តការគ្រប់គ្រងកាកសំណល់ និងពង្រឹងការត្រួតពិនិត្យ។

រដ្ឋមន្ត្រីក្រសួងបរិស្ថាន និងជាប្រធានទីភ្នាក់ងារត្រួតពិនិត្យបរិស្ថានឥណ្ឌូណេស៊ី (BPLH) លោក ហានីហ្វ ហ្វៃសូល នូរ៉ូហ្វីក បានគូសបញ្ជាក់ថា ប្រព័ន្ធគ្រប់គ្រងកាកសំណល់ក្នុងស្រុកពឹងផ្អែកយ៉ាងខ្លាំងលើកន្លែងចាក់សំរាម ដែលដំណើរការកាកសំណល់៨៦០៧តោនជារៀងរាល់ថ្ងៃ ពីរដ្ឋធានីហ្សាការតា។ ដើម្បីដោះស្រាយបញ្ហានេះ លោក នូរ៉ូហ្វីក បានសង្កត់ធ្ងន់លើតម្រូវការសម្រាប់ការអនុវត្តការគ្រប់គ្រងកាកសំណល់ និងការអភិវឌ្ឍឧស្សាហកម្មគ្រប់គ្រងកាកសំណល់ប្រកបដោយនិរន្តរភាព។

រដ្ឋមន្ត្រីក្រសួងបរិស្ថាន បានសង្កត់ធ្ងន់ថា៖«យើងបានចេញលិខិតផ្លូវការទៅកាន់ប្រធានតំបន់ទាំងអស់ ឱ្យធ្វើឱ្យប្រសើរឡើងជាបន្ទាន់នូវកន្លែងចាក់សំរាមអនាម័យ និងគ្រប់គ្រងឱ្យបានល្អ»។

រដ្ឋមន្រ្តីដដែលបាន កត់ សម្គាល់ ថា សេចក្ដី ណែនាំ នេះ ស្រប នឹង ច្បាប់ មាត្រា១៨ ឆ្នាំ២០០៨ ស្ដីពី ការ គ្រប់ គ្រង សំរាមដើម្បីធានាបាននូវការគ្រប់គ្រងសំណល់ប្រកបដោយប្រសិទ្ធភាព ខណៈក្រសួងបរិស្ថានក៏បានណែនាំដល់រដ្ឋាភិបាលក្នុងតំបន់ឱ្យធ្វើការត្រួតពិនិត្យឱ្យបានហ្មត់ចត់ និងចាត់វិធានការយ៉ាងម៉ឺងម៉ាត់ចំពោះភាគីដែលធ្វេសប្រហែស ឬល្មើសច្បាប់វិន័យ។

គួរបញ្ជាក់ថា ឥណ្ឌូណេស៊ីបានបង្កើតកាកសំណល់ចំនួន ៣៨,៤លានតោន ក្នុងឆ្នាំ២០២៣។ នេះបើយោងតាមទិន្នន័យពីប្រព័ន្ធព័ត៌មានគ្រប់គ្រងកាកសំណល់ជាតិឥណ្ឌូណេស៊ី(SIPSN)៕