សម្ដេចធិបតី ហ៊ុន ម៉ាណែត ផ្ដាំទៅអ្នកនយោបាយមួយចំនួន កុំឲ្យយករឿងព្រំដែន ទៅធ្វើជាល្បែងនយោបាយរបស់ខ្លួន
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងផ្ដាំទៅកាន់អ្នកនយោបាយមួយចំនួន កុំឲ្យយករឿងព្រំដែន ទៅធ្វើជាល្បែងនយោបាយរបស់ខ្លួន ។
ក្នុងឱកាសអញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងទិសដៅការងារឆ្នាំ២០២៥ របស់ក្រសួងរ៉ែ និងថាមពល នាថ្ងៃទី២១ វិច្ឆិកានេះ សម្ដេចធិបតី ហ៊ុន ម៉ាណែត ក៏បានបញ្ជាក់ទៅកាន់អ្នកនយោបាយមួយចំនួន កុំយករឿងនយោបាយទៅភ្ជាប់ជាមួយរឿងបច្ចេកទេស ប៉ុន្ដែត្រូវធ្វើនយោបាយដោយគិតគូ ទៅលើផលប្រយោជន៍ជាតិជាធំ ។
ជាមួយគ្នានោះសម្ដេចមហាបវរធិបតី ហ៊ុន ម៉ាណែត បានស្នើដល់ប្រទេសជាមិត្ត ជាពិសេសប្រទេសដែលគាំទ្រប្រជាធិបតេយ្យស្របដោយច្បាប់ ជួយប្រាប់ទៅបុគ្គលមួយចំនួនតូច ដែលតែងនិយាយបំផ្លើសការពិត ចង់បង្កចលាចលនៅកម្ពុជា សូមកុំឱ្យធ្វើអ្វីដែលខុសច្បាប់ ដែលបង្កផលប៉ះពាល់ដល់ ស្ថិរភាព សុខសន្តិភាព និងការអភិវឌ្ឍនៅកម្ពុជា ៕
