លោក វ្ល៉ាឌីមៀ ពូទីន៖ រុស្ស៊ីយកអ៊ុយក្រែន ជាទីលានសាកល្បងមីស៊ីលថ្មី

មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅថ្ងៃសុក្រទី ២២ ខែវិច្ឆិកាថា រុស្ស៊ីនឹងបន្តធ្វើតេស្តមីស៊ីល លឿនជាងសំឡេង Oreshnik ថ្មីរបស់ខ្លួនក្នុងការប្រយុទ្ធ។

លោក ពូទីន បាននិយាយមួយថ្ងៃបន្ទាប់ពីរុស្ស៊ីបានបាញ់អាវុធរយៈចម្ងាយមធ្យមថ្មីចូលទៅក្នុងអ៊ុយក្រែនជាលើកដំបូងដែលជាជំហានដែលលោកបាននិយាយថាត្រូវបានជំរុញដោយអ៊ុយក្រែនប្រើប្រាស់មីស៊ីលផ្លោងរបស់អាម៉េរិកនិងមីស៊ីលឆ្លងទ្វីបរបស់អង់គ្លេសដើម្បីវាយប្រហាររុស្ស៊ី។

លោកបានពណ៌នាអំពីការប្រើប្រាស់មីស៊ីល Oreshnik  ជាលើកដំបូងថាជាការធ្វើតេស្តជោគជ័យ ហើយបាននិយាយថា ការវាយប្រហារដោយមីស៊ីលនេះនឹងកើតឡើងជាបន្តបន្ទាប់ទៀត។

លោក ពូទីន បាននិយាយនៅក្នុងសេចក្តីអធិប្បាយតាមទូរទស្សន៍ទៅកាន់មន្ត្រីការពារជាតិ និងអ្នកអភិវឌ្ឍមីស៊ីលថា៖«យើងនឹងបន្តការសាកល្បងទាំងនេះ រួមទាំងក្នុងលក្ខខណ្ឌប្រយុទ្ធ អាស្រ័យលើស្ថានភាព និងលក្ខណៈនៃការគំរាមកំហែងផ្នែកសន្តិសុខលើប្រទេសរុស្ស៊ី។ លើសពីនេះ យើងមានស្តុកអាវុធបែបនេះរួចរាល់សម្រាប់ប្រើប្រាស់»។

មីស៊ីល កម្រិត មធ្យម មានសមត្ថភាពវាយប្រហារបានរយៈ ចម្ងាយ ពី ៣០០០ គីឡូម៉ែត្រ ទៅ ៥៥០០ គីឡូម៉ែត្រ ដែល អាច បាញ់ បាន គ្រប់ ទីកន្លែង នៅ អឺរ៉ុប ឬ ភាគ ខាងលិច សហរដ្ឋអាម៉េរិក ពី រុ ស្ស៊ី។ អ្នកជំនាញផ្នែកសន្តិសុខបានលើកឡើងថា លក្ខណៈពិសេសថ្មីនៃមីស៊ីល Oreshnik គឺថាវាផ្ទុកក្បាលគ្រាប់ជាច្រើនដែលមានសមត្ថភាពវាយប្រហារក្នុងពេលដំណាលគ្នានូវគោលដៅផ្សេងៗគ្នា ដែលជាធម្មតាត្រូវបានផ្សារភ្ជាប់ជាមួយនឹងមីស៊ីលផ្លោងអន្តរទ្វីបរយៈចម្ងាយឆ្ងាយដែលត្រូវបានរចនាឡើងដើម្បីបំពាក់ក្បាលគ្រាប់នុយក្លេអ៊ែរ។

វិមានក្រឹមឡាំង អះអាងថា ការបាញ់មីស៊ីល Oreshnik គឺជាការព្រមានដល់លោកខាងលិច ប្រឆាំងនឹងការចាត់វិធានការ និងការសម្រេចចិត្ត ដោយមិនប្រុងប្រយ័ត្នបន្ថែមទៀតក្នុងការគាំទ្រអ៊ុយក្រែន។ មីស៊ីល Oreshnik ត្រូវបានបាញ់ដោយធម្មតា មិនមានបំពាក់ក្បាលគ្រាប់នុយក្លេអ៊ែរនោះទេ៕