អភិបាលខេត្តបន្ទាយមានជ័យ ដឹកនាំកិច្ចប្រជុំគណៈបញ្ជាការឯកភាព ដេីម្បីត្រៀមទទួលបដិសណ្ឋារកិច្ចសម្តេចធិបតី សម្ពោធដាក់ឱ្យប្រើប្រាស់នូវសមិទ្ធផលនានា នៅក្នុងតំបន់អភិវឌ្ឍន៍បឹងជង្រុកតេជោ ឈ្នះ-ឈ្នះ

ភ្នំពេញ៖ នៅថ្ងៃទី២៤ ខែវិច្ឆិកា ឆ្នាំ ២០២៤ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកិច្ចប្រជុំគណៈបញ្ជាការឯកភាព ដេីម្បីត្រៀមទទួលបដិសណ្ឋារកិច្ចសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលនឹងអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់នូវសមិទ្ធផលនានា នៅក្នុងតំបន់អភិវឌ្ឍន៍បឹងជង្រុកតេជោ ឈ្នះឈ្នះ ស្ថិតនៅភូមិបឹងជង្រុកតេជោ ឈ្នះ-ឈ្នះ ឃុំទួលពង្រ ស្រុកម៉ាឡៃ ដែលនឹងប្រព្រឹត្តទៅនៅថ្ងៃទី២៩ ខែវិច្ឆិកា ឆ្នាំ២០២៤ នាពេលដ៏ខ្លីខាងមុខ។

កិច្ចប្រជុំក៏មានក៏មានការចូលរួមពីលោក-លោកស្រី អភិបាលរង តំណាងស្ថាប័នតុលាការ មេបញ្ជាការកងកម្លាំងគ្រប់ជាន់ថ្នាក់ បណ្ដាមន្ទីរ អង្គភាពពាក់ព័ន្ធ អភិបាលក្រុង-ស្រុកពាក់ព័ន្ធបានចូលរួម ប្រារព្ធ ធ្វើឡើង នៅសាលប្រជុំ ក សាលាខេត្តបន្ទាយមានជ័យ។

នាឱកាសនោះ ឯកឧត្ដម អ៊ុំ រាត្រី បានដាក់បទញ្ជារដល់គ្រប់កងម្លាំងពាក់ព័ន្ធគ្រប់ស្ថាប័ន ចូលរួមការពារសន្តិសុខសណ្តាបធ្នាប់ជូនថ្នាក់ដឹកនាំ ពិសេសជាប្រមុខរាដ្ឋាភិបាលកម្ពុជា ឱ្យបានល្អប្រសេីរ ដោយត្រូវដាក់ពង្រាយកងកម្លាំងនៅតាមគោលដៅប្រារព្ធពិធី ក៏ដូចជាតាមគោលដៅនីមួយៗដែលបានកំណត់ សំដៅធ្វេីយ៉ាងណា ការពារសន្តិសុខឱ្យបានល្អប្រសេីរជូនថ្នាក់ដឹកនាំ។

សូមបញ្ជាក់ផងដែរថា តំបន់អភិវឌ្ឍន៍បឹងជម្រុកតេជោ ឈ្នះ-ឈ្នះ ត្រូវបានបញ្ចប់ជម្លោះដីធ្លីរ៉ាំរ៉ៃ ដោយគោលនយោបាយ ឈ្នះ-ឈ្នះ ក្រោមការសម្របសម្រួលដឹកនាំដោះស្រាយដោយផ្ទាល់ពីឯកឧត្តមបណ្ឌិត ប៉ាន់ខែម ប៊ុនថន នាយករងខុទ្ទកាល័យសម្ដេចធិបតី នាយករដ្ឋមន្ត្រី បានសម្រេចជោគជ័យជាសមិទ្ធផលយ៉ាងត្រចះត្រចង់។ ក្រោយពេលដោះស្រាយបញ្ចប់នូវជម្លោះរ៉ាំរ៉ៃរយៈពេលប៉ុន្មានឆ្នាំមកនេះ ប្រជាពលរដ្ឋក៏ទទួលបាននូវដីកម្មសិទ្ធិស្របច្បាប់ និងមានការអភិវឌ្ឍរីកចម្រើនជាខ្លាំង ជាក់ស្ដែងមណ្ឌលសុខភាព សាលារៀន មានការអភិវឌ្ឍនិងរីកចម្រើនលើគ្រប់ទីកន្លែង មានផ្លូវបេតុងសម្រាប់បងប្អូនប្រជាពលរដ្ឋសមករាប់ធ្វេីដំណេីរដោយភាពងាយស្រួល ៕