លោក យ៉ាំ ណារិទ្ធ ដឹកនាំកិច្ចប្រជុំផ្សព្វផ្សាយ ការអនុវត្តពិធី សារម៉ុង រ៉េ អាល់ ស្តីពីសារធាតុបំផ្លាញ ស្រទាប់អូស្សូន នៅកម្ពុជា
បន្ទាយមានជ័យ៖ យើងទាំងអស់គ្នា គួរយល់ដឹង និងចូលរួមយ៉ាងសកម្ម នៅក្នុងកិច្ចគាំពារបរិស្ថានចូលរួមកាត់បន្ថយសារធាតុបំផ្លាញស្រទាប់អូហ្សូន និងការពារផ្ទៃមេឃពណ៌ខៀវ ផ្ទៃមេឃគ្មានឧស្ម័នពុល។ នេះគឺជា ប្រសាសន៍លើកឡើងរបស់លោក យ៉ាំ ណារិទ្ធ ដែលជាអនុប្រធាននាយកដ្ឋាន នៃក្រសួងបរិស្ថានក្នុងការផ្សព្វផ្សាយការអនុវត្តពិធី សារម៉ុងរ៉េអាល់ស្ដីពីសារធាតុបំផ្លាញស្រទាប់អូហ្សូន នៃកម្ពុជាដែលរៀបចំឡើងដោយក្រសួងបរិស្ថានសហការជាមួយមន្ទីរបរិស្ថានខេត្តបន្ទាយមានជ័យនាព្រឹកថ្ងៃទី២៧ ខែវិច្ឆិកា ឆ្នាំ២០២៤ ដែលមានការចូលរួមពីមន្ត្រីមន្ទីរអង្គភាពពាក់ព័ន្ធ សិប្បកម្ម ម៉ាស៊ីនត្រជាក់នៅក្នុងខេត្ត។
លោក ផៃ សុភី អនុប្រធានមន្ទីរបរិស្ថានខេត្តបន្ទាយមានជ័យបានបញ្ជាក់ថា៖ ការប្រជុំផ្សព្វផ្សាយនៅថ្ងៃនេះគឺមានសារៈសំខាន់ណាស់ យើងទាំងអស់គ្នា ត្រូវចូលរួមរៀបចំអនុវត្តឲ្យកាន់តែមានប្រសិទ្ធិភាពក្នុងការគាំទ្របរិស្ថាន ការអភិរក្សធនធានធម្មជាតិ ដើម្បីឆ្លើយតបនូវគោលនយោបាយ បញ្ចកោណ របស់រាជរដ្ឋាភិបាលកម្ពុជា និងបំផុសចលនាអប់រំការយល់ដឹង ឲ្យបានទូលំទូលាយ ដូចយើងទាំងអស់គ្នាបានស្វែងយល់តាមរយៈបទបង្ហាញរបស់ក្រសួងបរិស្ថាន គឺយើងជាប្រទេសកំពុងអភិវឌ្ឍន៍មានគោលដៅលុបបំបាត់សារធាតុ HCFC ដែលបំផ្លាញស្រទាប់អូហ្សូនឲ្យបាន១០០%ក្នុងឆ្នាំ២០៣០។
លោក យ៉ាំ ណារិទ្ធ អនុប្រធាននាយកដ្ឋាននៃក្រសួងបរិស្ថានបានគូសបញ្ជាក់ថា៖ កន្លងមករាជរដ្ឋាភិបាលកម្ពុជា បានអនុវត្តសារាចរលេខ០១ ស.រ ចុះថ្ងៃទី០២ ខែមករាឆ្នាំ២០២០ ស្ដីពីវិធានការទប់ស្កាត់កាត់បន្ថយការបំពុលខ្យល់សាធារណៈដើម្បីគ្រប់គ្រងទីតាំងប្រភពខ្យល់ឲ្យបានកាន់តែប្រសើរសម្រាប់ធានានូវសុវត្ថិភាពនិងសុខុមាលភាពដល់បងប្អូនប្រជាពលរដ្ឋទូទៅ រាជរដ្ឋាភិបាលបានធ្វើការណែនាំដល់ក្រសួង ស្ថាប័នពាក់ព័ន្ធត្រូវអនុវត្តនូវវិធានការនេះធ្វើការផ្សព្វផ្សាយ ឱ្យបានផុលផុសរួមគ្នាក្នុងការការពារទប់ស្កាត់បញ្ហាភ្លើងឆេះព្រៃ ការដុតសំណល់រឹង សំរាម នៅតាម ទីចំហរ ឬតាមទីសាធារណៈនិងការឆេះតាមទីលានចាក់សំរាម ដោយអប់រំប្រជាពលរដ្ឋឲ្យចូលរួមថែរក្សាប្រពៃណីដាំដើមឈើ រុក្ខជាតិបៃតង និងអប់រំប្រជាពលរដ្ឋឲ្យចូលរួមកាត់បន្ថយ ការប្រើប្រាស់យានយន្តចាស់ៗនាំឲ្យមានការបញ្ចេញផ្សែងខ្មៅច្រើននៅក្នុងបរិយាកាស ៕
