គណៈប្រតិភូក្រសួងសាធារណការ និងក្រសួងសេដ្ឋកិច្ច ធ្វើទស្សនកិច្ចសិក្សាបច្ចេកទេសនៃការសិក្សារៀបចំ និងគ្រប់គ្រងផ្លូវល្បឿនលឿននៅប្រទេសហ្វីលីពីន
ភ្នំពេញ៖ ចាប់ពីថ្ងៃទី២៦ ដល់២៩ ខែវិច្ឆិកា ឆ្នាំ២០២៤ ឯកឧត្តម ហេង រត្នពិសិដ្ឋ និង ឯកឧត្តម កែន រដ្ឋា អគ្គនាយក នៃក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជា ដែលមានការចូលរួមពីប្រតិភូបច្ចេកទេសនៃក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ ដើម្បីធ្វើទស្សនកិច្ចសិក្សាបច្ចេកទេស លើការរៀបចំ និងគ្រប់គ្រងផ្លូវល្បឿនលឿន ដោយមានការសហការរៀបចំ និងសម្របសម្រួលពី ក្រសួងសាធារណការ និងផ្លូវល្បឿនលឿន (DPWH) និងមជ្ឈមណ្ឌលភាពជាដៃគូរវាងរដ្ឋ និងឯកជន នៃប្រទេសហ្វីលីពីន (PPP Center)។
ដំណើរទស្សនកិច្ចនេះមានគោលបំណងបង្កើនការយល់ដឹង និងផ្លាស់ប្តូរបទពិសោធន៍ ដល់គណៈប្រតិភូកម្ពុជា អំពីការអនុវត្តភាពជាដៃគូរវាងរដ្ឋ និងឯកជន (PPP) របស់ប្រទេសហ្វីលីពីន ជាពិសេសទាក់ទងនឹងការអភិវឌ្ឍហេដ្ឋារចនាសម្ព័ន្ធ ក្របខ័ណ្ឌគោលនយោបាយ និងច្បាប់ ការគ្រប់គ្រងការអនុវត្តកិច្ចសន្យាសម្បទាន និង ឧត្តមានុវត្តន៍នៃការអនុវត្តគម្រោង PPP ព្រមទាំងលើកកម្ពស់កិច្ចសហប្រតិបត្តិការរវាងប្រទេសទាំងពីរក្នុងការអភិវឌ្ឍគម្រោងហេដ្ឋារចនាសម្ព័ន្ធប្រកបដោយដចីរភាព និងធុននឹងការប្រែប្រួលអាកាសធាតុ។
គណៈប្រតិភូកម្ពុជាបានធ្វើបទបង្ហាញអំពីគម្រោង ក្នុងក្របខណ្ឌភាពជាដៃគូរវាងរដ្ឋ និងឯកជន ជាពិសេសគម្រោងផ្លូវល្បឿនលឿនភ្នំពេញ-ក្រុងព្រះសីហនុ និងបានស្តាប់បទបង្ហាញ អំពីឧត្តមានុវត្តន៍លើគម្រោងសំខាន់ៗ ផ្តោតលើ ការរៀបចំគម្រោង ការគ្រប់គ្រងហានិភ័យ និងការចូលរួមរបស់អ្នកពាក់ព័ន្ធ រួមទាំងក្រសួងសាធារណការ និងផ្លូវល្បឿនលឿន (DPWH) និងមជ្ឈមណ្ឌលភាពជាដៃគូរវាងរដ្ឋ និងឯកជន (PPP Center) នៃប្រទេសហ្វីលីពីន។
បន្ថែមពីនេះ គណៈប្រតិភូនៃប្រទេសកម្ពុជា និងប្រទេសហ្វីលីពីន បានជជែកពិភាក្សា និងសិក្សាឈ្វេងយល់ អំពីវិធីសាស្ត្រនៃការរៀបចំរចនាសម្ព័ន្ធគម្រោង ការរៀបចំ និងគ្រប់គ្រងដំណើរការផ្លូវល្បឿនលឿន ការជំរុញការអនុវត្តច្បាប់ PPP និងយន្តការគាំទ្រ បញ្ហាប្រឈមនានា និងការសម្របសម្រួលគម្រោងសំដៅឲ្យបានតម្លាភាព និងគណនេយ្យភាពក្នុងការបណ្តាក់ទុនក្នុងភាពជាដៃគូរវាងរដ្ឋ និងឯកជន។
គួរបញ្ជាក់ថា ដំណើរទស្សនកិច្ចសិក្សានេះមានរយៈពេល៤ថ្ងៃចាប់ពីថ្ងៃទី២៥ ដល់២៨ខែវិច្ឆិកា ឆ្នាំ២០២៤ ដោយមានការពិភាក្សាខាងលើ និងការចុះទៅទស្សនកិច្ចផ្ទាល់នៅទីតាំង គម្រោងផ្លូវល្បឿនលឿនសំខាន់ៗនៅប្រទេសហ្វីលីពីន ដូចជាផ្លូវល្បឿនលឿន Cavite-Laguna Expressway (CALAX) ផ្លូវល្បឿនលឿន NAIA Expressway (NAIAX) និង ផ្លូវ NLEX Connector Road ៕
