រដ្ឋមន្រ្តីការពារជាតិចិន កំពុងត្រូវបានស៊ើបអង្កេតពីបទពុករលួយ ខណៈជោគវាសនាកំពុងស្ថិតក្នុងភាពស្រពេចស្រពិល
វ៉ាស៊ីនតោន៖ រដ្ឋមន្រ្តីការពារជាតិចិន លោក ដុង ជុន កំពុងត្រូវបានស៊ើបអង្កេតពីបទពុករលួយ ខណៈជោគវាសនារបស់រដ្ឋមន្ត្រីការពារជាតិចិនរូបនេះ កំពុងស្ថិតក្នុងភាពស្រពេចស្រពិល និងមិនច្បាស់លាស់នៅឡើយ។ ទន្ទឹមនឹងការជជែកវែកញែកជាច្រើនបានលេចឡើងជុំវិញរឿងរ៉ាវខាងលើនេះ។
កាសែត Financial Times បានរាយការណ៍ជាលើកដំបូងថា លោក ដុង ជុន កំពុងត្រូវបានស៊ើបអង្កេតជុំវិញអំពើពុករលួយ។ មន្ត្រីអាម៉េរិកម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះបានប្រាប់ទីភ្នាក់ងារសារព័ត៌មានរ៉យទ័រថា ការស៊ើបអង្កេតរបស់ចិនលើកងកម្លាំងគ្រប់គ្រងរ៉ុក្កែតយុទ្ធសាស្ត្ររបស់រដ្ឋធានីប៉េកាំង បានពង្រីកបញ្ហាផ្សេងទៀតនៅក្នុងវិស័យយោធា និងលទ្ធកម្មយោធា។ មន្ត្រីរូបនេះ បានបន្ថែមថា ការស៊ើបអង្កេតលើលោក ដុង មានសារសំខាន់ណាស់ ដោយសារតែប្រធានាធិបតីចិន លោក ស៊ី ជីនពីង ជាអ្នកតែងតាំងលោក ដុង ដោយផ្ទាល់។ យ៉ាងណា មន្ត្រីជាន់ខ្ពស់អាម៉េរិកម្នាក់ទៀត បានជំរុញឱ្យមានការប្រុងប្រយ័ត្នលើរបាយការណ៍អំពីការស៊ើបអង្កេតរបស់លោកដុង។
តើលោក ដុង ជុន កំពុងដើមតាមគន្លងអតីតរដ្ឋមន្រ្តីការពារជាតិចិន២រូបទៀតហើយមែនទេ? មែនទែនទៅ ប្រសិនបើលោក ដុង ជុន ជាប់ពាក់ព័ន្ធនឹងអំពើពុករលួយមែន លោកនឹងក្លាយជាអ្នកកាន់តំណែងរដ្ឋមន្ត្រីការពារជាតិចិនទី៣ ដែលត្រូវបានគេស៊ើបអង្កេតពីបទពុករលួយ បន្ទាប់ពីអតីតរដ្ឋមន្ត្រីការពារជាតិចិន លោក លី សាំងហ្វូ និងលោក វ៉ី ហ្វឹងហឺ ត្រូវបានបណ្តេញចេញពីតំណែងពាក់ព័ន្ធនឹងការប្រព្រឹត្តអំពើពុករលួយ។ គួរជម្រាបថា យោធារបស់ចិនកំពុងហែលឆ្លងការបោសសម្អាតប្រឆាំងអំពើពុករលួយយ៉ាងទូលំទូលាយចាប់តាំងពីឆ្នាំមុន ដោយយ៉ាងហោចណាស់មានឧត្តមសេនីយ៍កងទ័ពចិន៩នាក់ និងនាយកប្រតិបត្តិឧស្សាហកម្មការពារជាតិមួយចំនួនតូច ត្រូវបានដកចេញពីស្ថាប័ននីតិប្បញ្ញត្តិជាតិរហូតមកដល់បច្ចុប្បន្ន។
គួររំឭកថា អតីតរដ្ឋមន្រ្តីការពារជាតិចិនមុន២ រូបគឺលោក លី សាំងហ្វូ និងលោក វ៉ី ហ្វឹងហឺ ត្រូវបានបណ្តេញចេញពីបក្សកុម្មុយនីស្ដ ដោយសារការបំពានវិន័យយ៉ាងធ្ងន់ធ្ងរ ជុំវិញការប្រព្រឹត្តិអំពើពុករលួយ។ គ្រានោះ សេចក្តីថ្លែងការណ៍របស់បក្សកុម្មុយនីស្ដបានបញ្ជាក់ថា ៖«អ្នកទាំងពីរក្បត់ទំនុកចិត្តរបស់បក្ស និងគណៈកម្មាធិការយោធាមជ្ឈិម ដោយបានបំពុលបរិយាកាសនយោបាយរបស់យោធាយ៉ាងធ្ងន់ធ្ងរ និងបណ្តាលឱ្យខូចខាតយ៉ាងដំណំដល់ មុខមាត់មេដឹកនាំជាន់ខ្ពស់»។ ដូច្នេះ ចាំមើលទាំងអស់គ្នា តើជោគវាសនារបស់លោក ដុង ជុន នឹងដើរតាមគន្លងអតីតរដ្ឋមន្រ្តីការពារជាតិចិនទាំង២រូបមុនដែរឬយ៉ាងណា?។
