សម្ដេចធិបតី៖ នយោបាយឈ្នះឈ្នះរបស់សម្តេចតេជោ ដែលបញ្ចប់សង្រ្គាមក្នុងរយៈពេល ៥០០ឆ្នាំ មានលក្ខណៈពិសេសពីរ ដែលមិនធ្លាប់មានពីមុនមក

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា នយោបាយឈ្នះឈ្នះរបស់សម្តេចតេជោ ហ៊ុន សែន ដែលបានបញ្ចប់សង្រ្គាមក្នុងរយៈពេល៥០០ឆ្នាំ មានលក្ខណៈពិសេសពីរ ដែលពីមុនមកមិនដែលមាន ។

ក្នុងឱកាសអញ្ជើញជាអធិបតី «សម្ពោធសមិទ្ធផលនានាក្នុងតំបន់អភិវឌ្ឍន៍បឹងជង្រុកតេជោឈ្នះឈ្នះនៅស្រុកម៉ាឡៃ ខេត្តបន្ទាយមានជ័យ» នៅព្រឹកថ្ងៃទី២៩ ខែវិច្ឆិកា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងបន្តថា លក្ខណៈពិសេសទាំងពីរនោះមាន៖ ទី១-បញ្ចប់សង្រ្គាមហើយបង្រួបបង្រួមទឹកដី, ទី២-សន្តិភាពនៅបានយូរអង្វែងជាងពេលណាទាំងអស់

សម្ដេចធិបតីលើកឡើងថា នៅថ្ងៃទី២៩ ខែធ្នូ គឺជាថ្ងៃគំរប់ខួប ២៦ ឆ្នាំនៃទិវាសន្តិភាពដែលរាជរដ្ឋាភិបាលចេញអនុក្រឹត្យកាលពីឆ្នាំទៅ ហើយឆ្នាំនេះជាឆ្នាំទីមួយដែលយើងចាប់ផ្តើមអបអរសាទរដោយបង្កើតជាថ្ងៃឈប់សម្រាកនៅថ្ងៃទី២៩ ខែធ្នូ ឆ្នាំ២០២៤ ដោយកំណត់យកថ្ងៃទី២៩ ខែធ្នូ ឆ្នាំ១៩៩៨ ជាថ្ងៃបញ្ចប់សង្រ្គាមរ៉ាំរៃនៅកម្ពុជាដោយនយោបាយឈ្នះឈ្នះរបស់សម្តេចតេជោ ហ៊ុន សែន ៕