ប្រធានាធិបតីកូរ៉េខាងត្បូង កំពុងប្រឈមមុខនឹងការខឹងសម្បារ និងការទាមទារឱ្យចុះចេញពីតំណែង ក្រោយប្រកាសដាក់ឲ្យប្រើច្បាប់អាជ្ញាសឹក ៣ម៉ោង
សេអ៊ូល៖ ប្រធានាធិបតីកូរ៉េខាងត្បូង លោក យូន ស៊ុកយុល កំពុងប្រឈមមុខនឹងការខឹងសម្បារ និងការទាមទារឱ្យលោកចុះចេញពីតំណែង បន្ទាប់ពីការសម្រេចចិត្តរបស់គាត់ក្នុងការដាក់ចេញនូវច្បាប់អាជ្ញាសឹក ដែល៣ម៉ោងក្រោយមកត្រូវលុបចោលវិញ។
ការសម្រេចចិត្តប្រកាសប្រើច្បាប់អាជ្ញាសឹកដ៏គួរឱ្យភ្ញាក់ផ្អើលរបស់លោក យូន កាលពីយប់ថ្ងៃអង្គារទី៣ ខែធ្នូ បានធ្វើឱ្យមនុស្សគ្រប់គ្នាភ្ញាក់ផ្អើល រួមទាំងអ្នកនយោបាយ និងសម្ព័ន្ធមិត្តជិតស្និទ្ធបំផុតរបស់ប្រទេសកូរ៉េខាងត្បូងជុំវិញពិភពលោក។ ភ្លាមៗក្រោយការប្រកាសប្រើច្បាប់អាជ្ញាសឹក ចលាចលបានផ្ទុះឡើង។ ការប្រកាសរបស់លោក យូន បានជំរុញឱ្យមនុស្សរាប់ពាន់នាក់ប្រមូលផ្តុំគ្នាតវ៉ានៅសភា។ ប៉ូលិស និងទាហានត្រូវដាក់ពង្រាយភ្លាមៗទៅរដ្ឋសភា។ ទាហានដែលកាន់ឧបករណ៍ប្រយុទ្ធពេញដៃ រួមទាំងកាំភ្លើងវាយប្រហារ បានព្យាយាមរារាំងក្រុមបាតុករឱ្យនៅឆ្ងាយពីរដ្ឋសភា ខណៈដែលឧទ្ធម្ភាគចក្រ Blackhawk របស់យោធាបានហោះពីលើ ហើយបានចុះចតនៅក្បែរនោះ។ យ៉ាងណាមិញ ៣ ម៉ោងក្រោយមកលោក យូន បានប្រកាសលុបចោលច្បាប់អាជ្ញាសឹកវិញ ក្រោយសមាជិកសភាបោះឆ្នោតប្រឆាំង។
បាតុករនៅតាមដងផ្លូវនៅតែបន្តនាព្រឹកថ្ងៃពុធទី៤ ខែធ្នូនេះ ដោយអំពាវនាវឱ្យលោក យូន លាលែងពីតំណែង។ ការតវ៉ាបន្ថែមទៀតត្រូវបានគេរំពឹងថានឹងធ្វើឡើងនៅថ្ងៃពុធជាមួយនឹងសម្ព័ន្ធសហជីពដ៏ធំបំផុតរបស់កូរ៉េខាងត្បូង សហភាពសហជីពកូរ៉េ គ្រោងនឹងធ្វើបាតុកម្មនៅទីក្រុងសេអ៊ូល និងប្តេជ្ញាធ្វើកូដកម្មរហូតដល់លោក យូន លាលែងពីតំណែង។ ស្ថានទូតសហរដ្ឋអាម៉េរិកបានជំរុញឱ្យពលរដ្ឋអាម៉េរិកនៅក្នុងប្រទេសកូរ៉េខាងត្បូងជៀសវាងការធ្វើដំណើរទៅតំបន់ដែលការតវ៉ាកំពុងកើតឡើង ខណៈដែលនិយោជកធំៗមួយចំនួនរួមមាន Naver Corp និង LG Electronics Inc បានណែនាំនិយោជិតឱ្យធ្វើការពីផ្ទះ។
សមាជិកសភាកូរ៉េខាងត្បូងនៅថ្ងៃពុធក៏បានអំពាវនាវឱ្យមានការដកតំណែងលោក យូន ដែលបង្កឱ្យមានវិបត្តិនយោបាយដ៏ធំបំផុតក្នុងរយៈពេលជាច្រើនទសវត្សរ៍នៅក្នុងប្រទេសមានសេដ្ឋកិច្ចធំបំផុតទី៤ របស់អាស៊ី។ ក្រុមសមាជិកសភាមកពីគណបក្សប្រឆាំងបានបញ្ជាក់ថា ពួកគេគ្រោងនឹងស្នើច្បាប់មួយដើម្បីដកតំណែងប្រធានាធិបតីពីលោក យូន នៅថ្ងៃពុធ ដែលគួរតែត្រូវបានបោះឆ្នោតក្នុងរយៈពេល៧២ ម៉ោង។ យោងតាមមន្ត្រីប្រធានាធិបតីម្នាក់ ប្រធានបុគ្គលិក និងលេខាធិការជាន់ខ្ពស់របស់លោក យូន បានស្នើសុំលាលែងពីតំណែង។
លោក យូន មិនបានឆ្លើយតបជាសាធារណៈភ្លាមៗចំពោះការទាមទាររបស់គណបក្សប្រឆាំងនោះទេ។ ប៉ុន្តែការិយាល័យរបស់លោក យូន បានបង្ហាញថា ទីប្រឹក្សាប្រធានាធិបតីជាន់ខ្ពស់ និងលេខាសម្រាប់លោក បានស្នើឱ្យលាលែងពីតំណែងជាសមូហភាព ហើយប្រធានាធិបតីក៏បានលុបចោលកាលវិភាគផ្លូវការនៅព្រឹកថ្ងៃពុធផងដែរ។ ការដកតំណែងលោក យូន នឹងត្រូវការការគាំទ្រពីពីរភាគបីនៃសភា ឬ២០០ នៃសមាជិក៣០០។ គណបក្សប្រជាធិបតេយ្យ និងគណបក្សប្រឆាំងតូចៗផ្សេងទៀតរួមគ្នាមាន ១៩២ អាសនៈ។ គួរបញ្ជាក់ថា ប្រសិនបើលោក យូន លាលែងពីតំណែង ឬត្រូវបានដកចេញពីតំណែង លោកនាយករដ្ឋមន្ត្រី ហាន ឌុក-សូ (Han Duck-soo) នឹងបំពេញតួនាទីជាអ្នកដឹកនាំរហូតដល់ការបោះឆ្នោតថ្មីមួយត្រូវបានប្រារព្ធឡើង។
ភាពចលាចលនយោបាយក្នុងប្រទេសកូរ៉េខាងត្បូង បានបង្កឱ្យមានការព្រួយបារម្ភពីអន្តរជាតិ។ រដ្ឋមន្ត្រីការបរទេសអាម៉េរិក លោក អាន់តូនី ប្លីងខេន (Antony Blinken) បាននិយាយថា លោកស្វាគមន៍ការសម្រេចចិត្តរបស់លោក យូន ក្នុងការលុបចោលការប្រើច្បាប់អាជ្ញាសឹក។ លោកបាននិយាយនៅក្នុងសេចក្តីថ្លែងការណ៍មួយថា៖«យើងបន្តរំពឹងថាការខ្វែងគំនិតគ្នាខាងនយោបាយនឹងត្រូវបានដោះស្រាយដោយសន្តិវិធី និងស្របតាមនីតិរដ្ឋ»។ ទីភ្នាក់ងារសារព័ត៌មានយ៉ុនហាប់ បានរាយការណ៍ថា កិច្ចពិភាក្សាការពារជាតិដែលបានគ្រោងទុក និងសមយុទ្ធយោធារួមគ្នារវាងកូរ៉េខាងត្បូង និងសហរដ្ឋអាម៉េរិក ត្រូវបានពន្យារពេល។ នាយករដ្ឋមន្ត្រីស៊ុយអែតក៏បានពន្យារពេលដំណើរទស្សនកិច្ចទៅកាន់កូរ៉េខាងត្បូងផងដែរ៕
