រថយន្តក្រុងដឹកអ្នកដំណើរ ១គ្រឿង ក្រឡាប់នៅស្រុកអូរជ្រៅ បណ្តាលឱ្យមនុស្ស ១២នាក់រងរបួសធ្ងន់ស្រាល
ភ្នំពេញ៖ នៅម៉ោង៥និង៣០នាទីទាបភ្លឺ ថ្ងៃទី៦ ខែធ្នូ ឆ្នាំ២០២៤នេះ មានករណីរថយន្តក្រុងដឹកអ្នកដំណើរមួយគ្រឿងក្រឡាប់បណ្តាលឱ្យមនុស្ស១២នាក់រងរបួសធ្ងន់ និងស្រាល។ ហេតុការណ៍នេះបានកើតទ្បើងនៅតាមបណ្តោយផ្លូវជាតិលេខ៥ចំណុចការ៉ាសាំងស្ថិតភូមិសូរិយ៉ា ឃុំកូប ស្រុកអូរជ្រៅ ខេត្តបន្ទាយមានជ័យ ហើយមូលហេតុ គឺបណ្តាលមកពីអ្នកបើកងងុយដេក។
បើតាមប្រភពពីអ្នកដំណើរដែលជិះក្នុងរថយន្ត បានឱ្យដឹងថា មុនពេលគ្រោះថ្នាក់កើតឡើង គាត់បានជិះរថយន្តក្រុមហ៊ុនដឹកអ្នកដំណើរឈ្មោះ«សំណាងហុងស៊ីង» បានចេញដំណើរពីភ្នំពេញម៉ោង៥ល្ងាចកាលពីថ្ងៃទី៥ធ្នូ។
ប្រភពបន្តថា អ្នកដំណើរក្នុងរថយន្តមានខ្លះកំពុងដេក ឯខ្លះទៀតកំពុងអង្គុយជជែកគ្នា ព្រោះរថយន្តមាន២ជាន់ហើយមកដល់ចំណុចគ្រោះថ្នាក់នៅម៉ោង៥កន្លះទាបភ្លឺ ស្រាប់តែរថយន្តបានក្រឡាប់ បណ្តាលឱ្យមានអ្នករបួសធ្ងន់ និងស្រាល។ ពេលនោះអ្នកដំណើរក៏នាំគ្នាវារចេញតាមកញ្ចក់ដែលបែក ខណៈនោះឃើញមានរថយន្តសង្គ្រោះនៃមន្ទីពេទ្យបង្អែកស្រុកអូរជ្រៅ មកដឹកសង្គ្រោះទៅកាន់មន្ទីពេទ្យ។
ទន្ទឹមនឹងនោះ មន្ត្រីនគរបាលចរាចរណ៍ស្រុកអូរជ្រៅ បានឱ្យដឹងថា គ្រោះថ្នាក់ចរាចរណ៍ដែលកើតឡើងនេះគឺបង្កឡើងដោយអ្នកបើកបរអាចបើកក្នុងស្ថានភាពងងុយដេកទើបបណ្តាលឱ្យរថយន្តធ្លាក់ផ្លូវ និងបង្កឱ្យមានជាគ្រោះថ្នាក់បែបនេះ។ ក្រោយកើតហេតុអ្នកបើកបរបានគេចខ្លួនបាត់ស្រមោលតែម្តង សន្សល់ទុកនៅតែអ្នករងរបួសអង្គុយចាំរថយន្តសង្គ្រោះតែប៉ុណ្ណោះ។ ដោយទ្បែកចំពោះរថយន្តត្រូវបានស្ទូចយកទៅរក្សាទុកនៅអធិការដ្ឋាននគរបាលស្រុកអូរជ្រៅដើម្បីអនុវត្តតាមច្បាប់ចរាចរណ៍ផ្លូវគោក៕
