សម្ដេចធិបតី៖ សុខសន្តិភាព និងសុវត្ថិភាព ធ្វើឱ្យទេសចរទាំងជាតិ និងអន្តរជាតិ បានដើរលេងកម្សាន្តនៅកម្ពុជាគ្រប់ទីកន្លែងទាំងអស់

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា សុខសន្តិភាព និងសុវត្ថិភាព បានធ្វើឱ្យទេសចរទាំងជាតិ និងអន្តរជាតិ បានដើរលេងកម្សាន្តនៅកម្ពុជាគ្រប់ទីកន្លែងទាំងអស់ និងគ្រប់រដូវកាលមិនថា រដូវប្រាំង ឬ រដូវវស្សានោះឡើយ។

សម្ដេចធិបតី ហ៊ុន ម៉ាណែត បានមានប្រសាសន៍យ៉ាងដូច្នេះ ធ្វើឡើងក្នុងឱកាសដែលសម្តេចអញ្ជើញជាអធិបតីក្នុងពិធីបើកព្រឹត្តិការណ៍បុណ្យសមុទ្រ លើកទី១១ ឆ្នាំ២០២៤ នៅខេត្តកំពត ក្រោមប្រធានបទ «អបអរបេតិកភណ្ឌ និងចីរភាព នៃតំបន់ឆ្នេរ» នៅរាត្រីថ្ងៃទី១៣ ខែធ្នូ ឆ្នាំ២០២៤នេះ។

ក្នុងឱកាសនោះ សម្ដេចធិបតី ហ៊ុន ម៉ាណែត បានសម្ដែងការអបអរសាទរចំពោះសមិទ្ធផលថ្មីៗក្នុងខេត្តកំពតក្នុងមួយ និងសមិទ្ធផលធំៗជាច្រើនទាក់ទងវិស័យទេសចរណ៍ ការសម្ពោធកំពង់ផែពហុបំណងកំពតដែលជាផែទឹកជ្រៅដែលជំរុញវិស័យឧស្សាហកម្មនិងទេសចរណ៍។

សម្ដេចធិបតី ក៏បានសាទរចំពោះខេត្តកំពតដែលសម្រេចបាននូវ សមិទ្ធផលជាច្រើន ជាពិសេសនៅក្នុងឆ្នាំ២០២៤នេះ ខេត្តកំពតបានសម្ពោធនូវកំពង់ផែទឹកជ្រៅពហុបំណង និងសម្ពោធឱ្យប្រើប្រាស់ជាបណ្ដោះអាសន្ននូវកំពង់ផែទេសចរណ៍អន្តរជាតិបន្ថែមទៀត។

សម្ដេចធិបតី នាយករដ្ឋមន្ត្រី បានថ្លែងថា ការមកជួបជុំគ្នារៀបចំពិធីបុណ្យសមុទ្រនិងការមកដើរលេងកំសាន្តរៀបចំតាំងពិពណ៌នៅផលិតផលជាច្រើននាពេលនេះគឺបង្ហាញពីផលនៃសន្តិភាពដែលយើងបានខិតខំកសាងសន្តិភាពនេះដោយលំបាក ដែលមានសម្ដេចអគ្គមហាសេនាបតីតេជោហ៊ុនសែនជាស្ថាបនិកសន្តិភាព ៕