ឯកឧត្តម ឆាយ ឫទ្ធិសែន ជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ចំនួន២ឃុំ ក្នុងស្រុកទឹកផុស

ភ្នំពេញ៖ នាព្រឹកថ្ងៃសៅរ៍ ១៤កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែធ្នូ ឆ្នាំ២០២៤ ឯកឧត្តម ឆាយ ឫទ្ធិសែន សមាជិកគណ:កម្មាធិការកណ្តាលគណបក្សប្រជាជនកម្ពុជា អនុប្រធានទី១ ក្រុមការងារគណបក្សចុះមូលដ្នានខេត្តកំពង់ឆ្នាំង និងជាប្រធានក្រុមការងារគណបក្សចុះមូលដ្ឋានស្រុកទឹកផុស និងស្រុកសាមគ្គីមានជ័យ បានអញ្ជើញជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ឃុំទួលខ្ពស់ និងឃុំក្បាលទឹក ស្រុកទឹកផុស ខេត្តកំពង់ឆ្នាំង។

ពិធីនេះក៏មានការអញ្ជើញចូលរួមពី ឯកឧត្ដមប្រធាន អនុប្រធានក្រុមការងារថ្នាក់កណ្ដាល ថ្នាក់ខេត្ត ស្រុក ឃុំ និងថ្នាក់ភូមិសរុប ១៧៥នាក់។

បន្ទាប់ពីបានស្ដាប់មតិស្វាគមន៍ និងរបាយការណ៍ស្ដីពីសកម្មភាពរបស់គណបក្សឃុំទួលខ្ពស់ និងឃុំក្បាលទឹករួចមក ឯកឧត្តម ឆាយ ឫទ្ធិសែន បានបានពាំនាំនូវប្រសាសន៍ផ្ដាំផ្ញើសាកសួរសុខទុក្ខ និងពរសព្ទសាធុការពីសំណាក់ថ្នាក់ដឹកនាំកំពូលរបស់គណបក្សប្រជាជនកម្ពុជាជូនចំពោះអង្គពិធីទាំងពីរ និងបានជម្រាបជូនសមាជិក សមាជិកានៃអង្គពិធីទាំងពីរអំពីតម្លៃនៃសុខសន្តិភាព ស្ថិរភាពនយោបាយ ក្រោមការដឹកនាំរបស់គណបក្សប្រជាជនកម្ពុជា មានសម្ដេចអគ្គមហាសេនាបតីតេជោ ហ៊ុន សែន ជាប្រធាននិងសម្ដេចមហាបវរធិបតី ហ៊ុន ម៉ាណែត ជាអនុប្រធានគណបក្ស និងជានាយករដ្ឋមន្រ្ដីនៃព្រះរាជាណាចក្រកម្ពុជា ដែលបានដាក់ចេញនូវយុទ្ធសាស្រ្ដបញ្ចកោណដំណាក់កាលទី១ ដើម្បីឈានទៅសម្រេចឱ្យបាននូវចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

ជាមួយគ្នានេះដែរ ឯកឧត្ដម បានថ្លែងអំណរគុណ ការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារគណបក្សគ្រប់លំដាប់ថ្នាក់ និងគណបក្សមូលដ្ឋាននៃឃុំទាំងពីរ ព្រមទាំងសមាជិកគណបក្សប្រជាជននៃឃុំទាំងពីរ ក្នុងការបំពេញតួនាទីភារកិច្ច ជាពិសេសការបន្តជឿជាក់ ស្រឡាញ់គាំទ្រ និងបោះឆ្នោតជូនគណបក្សប្រជាជន ដែលទទួលបានជ័យជម្នះគ្រប់អាណត្តិកន្លងមកនេះ។

លើសពីនេះ ឯកឧត្ដមប្រធាន បានសំណូមពរឱ្យក្រុមការងារគណបក្ស និងគណបក្សមូលដ្ឋានបន្តអនុវត្តការងារចិញ្ចឹមចលនាឱ្យបានកាន់តែសកម្ម ដើម្បីបង្កើនប្រជាប្រិយភាពរបស់គណបក្ស ឈានទៅសម្រេចបាននូវជ័យជម្នះដូចការគ្រោងទុក ៕